ନୂଆଦିଲ୍ଲୀ,୨୮।୩ : ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଗିରଫଦାରୀ ଏବଂ କଂଗ୍ରେସର ବ୍ୟାଙ୍କ ଆକାଉଣ୍ଟକୁ ଅଚଳ କରାଯିବା ଘଟଣା ଉପରେ ଆମେରିକାର ମନ୍ତବ୍ୟ ଅବାଞ୍ଛିତ ବୋଲି ଭାରତର ବହିର୍ବ୍ୟାପାର ମନ୍ତ୍ରଣାଳୟ ଗୁରୁବାର କହିଛି। ଆମେରିକା ପରରାଷ୍ଟ୍ର ବିଭାଗର ମନ୍ତବ୍ୟ ଉପରେ ଭାରତ ବୁଧବାର ଏହାର ଦୂତାବାସ ଅଧିକାରୀମାନଙ୍କ ନିକଟରେ ପ୍ରତିବାଦ ଜଣାଇଥିଲା। ଆମ ନିର୍ବାଚନୀ ଓ ନ୍ୟାୟିକ ପ୍ରକ୍ରିୟା ଉପରେ ବାହ୍ୟ ହସ୍ତକ୍ଷେପ ଗ୍ରହଣୀୟ ନୁହେଁ ବୋଲି ବହିର୍ବ୍ୟାପାର ମନ୍ତ୍ରଣାଳୟ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛି। ଭାରତର ନ୍ୟାୟିକ ପ୍ରକ୍ରିୟା ଆଇନର ନିୟମାବଳୀ ଦ୍ୱାରା ପରିଚାଳିତ। ଗଣତାନ୍ତ୍ରିକ ବ୍ୟବସ୍ଥାକୁ ଅନୁସରଣ କରୁଥିବା ଅନ୍ୟମାନେ ସତ୍ୟତାକୁ ଗ୍ରହଣ କରିବାରେ ଅସୁବିଧା ହେବା କଥା ନୁହେଁ। ଯେକୌଣସି ପ୍ରକାର ଅନୁପଯୁକ୍ତ ବାହ୍ୟ ପ୍ରଭାବରୁ ଦେଶର ସ୍ବାଧୀନତା ଏବଂ ଗଣତାନ୍ତ୍ରିକ ଅନୁଷ୍ଠାନଗୁଡ଼ିକର ସୁରକ୍ଷା ପାଇଁ ପ୍ରତିଶ୍ରୁତିବଦ୍ଧ। ପାରସ୍ପରିକ ସମ୍ମାନ ଏବଂ ବୁଝାମଣା ଅନ୍ତର୍ଜାତୀୟ ସମ୍ପର୍କର ମୂଳଦୁଆ। ତେଣୁ ରାଷ୍ଟ୍ରଗୁଡ଼ିକ ଅନ୍ୟର ସାର୍ବଭୌମତ୍ୱ ଏବଂ ଆଭ୍ୟନ୍ତରୀଣ ବ୍ୟାପାରକୁ ସମ୍ମାନ ଜଣାଇବା ଆଶା କରାଯାଏ ବୋଲି ବହିର୍ବ୍ୟାପାର ମନ୍ତ୍ରଣାଳୟ କହିଛି।