ନୂଆଦିଲ୍ଲୀ, ୧୦।୮: ସମୁଦ୍ରରେ କେବୁଲ ବିଛାଇବାରେ ଭାରତ ଆତ୍ମନିର୍ଭରଶୀଳ ହୋଇଛି। ଏହା ଅର୍ନ୍ତଗତ ଚେନ୍ନାଇଠାରୁ ପୋର୍ଟବ୍ଲେୟାର ପର୍ଯ୍ୟନ୍ତ ୨୩୦୦ କିଲୋମିଟରର କେବୁଲ ବିଛାଯାଇଛି। ବିଏସ୍ଏନ୍ଏଲ୍ ପକ୍ଷରୁ ଏହା କରାଯାଇଛି। ଅପ୍ଟିକାଲ ଫାଇବର ବିଛା ହେବା ଦ୍ୱାରା ଏଠାରେ ଟେଲିକମ୍ ଯୋଗାଯୋଗ ବ୍ୟବସ୍ଥା ସୁଦୃଢ଼ ହୋଇପାରିବ। ଇଣ୍ଟରନେଟ୍ ସ୍ପିଡ୍ ପୂର୍ବ ତୁଳନାରେ ଦ୍ରୁତ ହେବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ଏହା ଦ୍ୱାରା ସୁରକ୍ଷା ବ୍ୟବସ୍ଥା ମଧ୍ୟ ବିକଶିତ ହୋଇପାରିବ। ସମୁଦ୍ରରେ ମୋଟ ୩୦ ହଜାର କିଲୋମିଟର ଅପ୍ଟିକାଲ ଫାଇବର ବିଛାଇବା ଲାଗି ଯୋଜନା କରାଯାଇଛି। ପୂର୍ବରୁ ବିଦେଶୀ ରାଷ୍ଟ୍ରରେ ଏଭଳି କେବୁଲ ବିଛା କାର୍ଯ୍ୟ କରାଯାଉଥିଲା। ତେବେ ଇତିମଧ୍ୟରେ ଭାରତ ମଧ୍ୟ ଏଭଳି କରିବାକୁ ସକ୍ଷମ ହୋଇଥିବା ପିଏଚଡି ଚ୍ୟାମ୍ବର ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରିର ଟେଲିକମ୍ କମିଟି ଅଧ୍ୟକ୍ଷ ସନ୍ଦୀପ୍ ଅଗ୍ରଓ୍ବାଲ କହିଛନ୍ତି। ଏହି କାର୍ଯ୍ୟର ଶୁଭାରମ୍ଭ ୨୦୧୮ ଡିସେମ୍ବରରେ ହୋଇଥିଲା। ଅପ୍ଟିକାଲ କେବୁଲ ଯୋଗୁ ଏଠାରେ ଇଣ୍ଟରନେଟ୍ ସ୍ପିଡ୍ ୪୦୦ ଜିବିପିଏସ୍ ରହିବ। ଫଳରେ ଲୋକେ ମାତ୍ର କିଛି ସେକେଣ୍ଡ ମଧ୍ୟରେ୪୦ ହଜାର ଗୀତ ଡାଉନଲୋଡ୍ କରିପାରିବେ।