ନାପିଦ୍ୱ,୧୬।୫ : ମ୍ୟାନମାରରେ ଚାଇନାର ବଢୁଥିବା ପ୍ରଭାବକୁ ଏବେ ଭାରତ ଏକ କଡ଼ା ଚ୍ୟାଲେଞ୍ଜ ଦେଇଛି। ଭାରତର ସହଯୋଗରେ ନିର୍ମିତ ଏକ ବନ୍ଦର ଏଠାରେ କାର୍ଯ୍ୟକ୍ଷମ ହୋଇଛି। ଏହି ବନ୍ଦର ମ୍ୟାନମାରର ଅନ୍ତର୍ଜାତୀୟ ବାଣିଜ୍ୟକୁ ବୃଦ୍ଧି କରିବ। ଏହି ବନ୍ଦର ମ୍ୟାନମାରର ରାଖାଇନ ପ୍ରଦେଶରେ ନିର୍ମିତ । ଗତ ମଙ୍ଗଳବାର ସିଟୱେ ବନ୍ଦର ନାମକ ବନ୍ଦରରେ ପ୍ରଥମ କାର୍ଗୋ ଜାହାଜ ପହଞ୍ଚିଥିଲା। ଏହି ଜାହାଜ କୋଲକାତା ଠାରୁ ଯାତ୍ରା ଆରମ୍ଭ କରିଥିଲା। ଜାହାଜକୁ ସ୍ବାଗତ କରିବା ପାଇଁ ଭାରତ ଏବଂ ମ୍ୟାନମାରର ସାମରିକ ଅଧିକାରୀମାନେ ସେଠାରେ ଉପସ୍ଥିତ ଥିଲେ।
ସିଟୱେ ବନ୍ଦର ହେଉଛି ଭାରତର ମଲ୍ଟି ମୋଡାଲ ଟ୍ରାଞ୍ଜିଟ ପରିବହନ ପ୍ରକଳ୍ପର ଏକ ଅଂଶ । ଏହି ପ୍ରକଳ୍ପ ଅଧୀନରେ କୋଲକାତା ଠାରୁ ମ୍ୟାନମାରର ପଶ୍ଚିମ ଉପକୂଳ ପର୍ଯ୍ୟନ୍ତ ଏକ ସମୁଦ୍ର ମାର୍ଗ ପ୍ରସ୍ତୁତ କରାଯାଇଛି। ସେହି ସ୍ଥାନରୁ ମ୍ୟାନମାରର ବିଭିନ୍ନ ସ୍ଥାନକୁ ସାମଗ୍ରୀ ପରିବହନ ପାଇଁ ସ୍ଥଳ ମାର୍ଗ ପ୍ରସ୍ତୁତ କରାଯାଉଛି। ଏଥିମଧ୍ୟରୁ ଗୋଟିଏ ରାସ୍ତା କାଲାଦାନ ନଦୀ ଦେଇ ଯିବାବେଳେ ଅନ୍ୟ ଏକ ରାଜପଥ ମଧ୍ୟ ନିର୍ମାଣ କରାଯାଉଛି। ଭାରତର ପରିବହନ ମନ୍ତ୍ରୀ ସର୍ବାନନ୍ଦ ସୋନୋୱାଲ କହିଛନ୍ତି ଏହି ସମୁଦ୍ର ମାର୍ଗ ସମାପ୍ତ ହେବା ପରେ ଭାରତର ଉତ୍ତର-ପୂର୍ବ ଅଞ୍ଚଳ ଦକ୍ଷିଣ-ପୂର୍ବ ଏସିଆ ସହିତ ସିଧାସଳଖ ସଂଯୁକ୍ତ ହୋଇଛି।
କାଲାଦାନ ପ୍ରକଳ୍ପ ନିର୍ମାଣ ପାଇଁ ଭାରତ ଏବଂ ମ୍ୟାନମାର ୨୦୦୮ରେ ଏକ ଚୁକ୍ତିନାମା ସୱାକ୍ଷର କରିଥିଲେ। ବନ୍ଦର ଖୋଲିବା ସମୟରେ ଭାରତୀୟ ଅଧିକାରୀମାନେ ଆଶା ପ୍ରକଟ କରିଛନ୍ତି ଏହା ଦେଶର ଉତ୍ତର-ପୂର୍ବ ଅଞ୍ଚଳକୁ ଭାରତ ମହାସାଗର ସହିତ ଯୋଡିବ ଏବଂ ସମଗ୍ର ଅଞ୍ଚଳରେ ଅର୍ଥନୈତିକ ବିକାଶ ପାଇଁ ପଥ ପରିଷ୍କାର କରିବ।
ବିଶ୍ଳେଷକମାନେ ସୂଚାଇ ଦେଇଛନ୍ତି ମ୍ୟାନମାର ମାଧ୍ୟମରେ ଚାଇନେ ମଧ୍ୟ ଭାରତ ମହାସାଗରରେ ପ୍ରବେଶ କରିବାକୁ ଚେଷ୍ଟା କରୁଛି। ଚାଇନାର ବୈଦେଶିକ ମନ୍ତ୍ରୀ ଚିନ ଗ୍ୟାଙ୍ଗ ଚଳିତ ମାସର ପ୍ରଥମ ସପ୍ତାହରେ ମିଆଁମାର ଗସ୍ତ କରିଛନ୍ତି।