ନୂଆଦିଲ୍ଲୀ,୨୨ା୯: ସୀମାରେ ଚାଇନା ସହ ବିବାଦ ପରେ ଭାରତ ସରକାର ହିମାଳୟ ନିକଟ ଭୂମିକୁ ବେଜିଂକୁ ଛାଡ଼ି ଦେଇଛନ୍ତି ବୋଲି ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଉଭୟ ପକ୍ଷ ସେନା ମଧ୍ୟରେ ବିବାଦୀୟ ସୀମାରୁ ସୈନ୍ୟ ପ୍ରତ୍ୟାହାର ଏବଂ ସେଠାରେ ବଫର ଜୋନ୍ କରିବା ପାଇଁ ବୁଝାମଣା ସମୟରେ ଭାରତ ସରକାର ପୂର୍ବରୁ ନୂଆଦିଲ୍ଲୀ ନିୟନ୍ତ୍ରଣରେ ଥିବା ଜାଗାକୁ ଚାଇନାକୁ ଟେକି ଦେଇଥିବା ନେଇ ରିପୋର୍ଟ ପ୍ରକାଶ ପାଇଛି।
ଜୁନ୍ରେ ଭାରତ ଓ ଚାଇନା ସୈନ୍ୟଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ପରଠାରୁ ସୀମାରେ ଉତ୍ତେଜନାମୂଳକ ସ୍ଥିତି ଲାଗି ରହିଥିଲା। ଚଳିତ ମାସରେ ଉଭୟ ପକ୍ଷ ମଧ୍ୟରେ ଆଲୋଚନା ପରେ ଗୋଗ୍ରା-ହଟ୍ ସ୍ପ୍ରିଙ୍ଗ୍ରୁ ସୈନ୍ୟ ପ୍ରତ୍ୟାହାର ପାଇଁ ଦୁଇ ଦେଶ ରାଜି ହୋଇଥିଲେ। ବିବାଦୀୟ ସ୍ଥାନରୁ ସୈନ୍ୟ ଫେରିବା ପରେ ବଫର ଜୋନ୍ ସୃଷ୍ଟି ହୋଇଥିବା ଏବଂ ସୀମାରେ ଭାରତର ପୂର୍ବ ସ୍ଥିତି ବଜାୟ ରହିଥିବା ଭାରତ ସରକାର କହିଥିଲେ। ହେଲେ ସ୍ଥାନୀୟ ନିର୍ବାଚିତ ପ୍ରତିନିଧି ଏବଂ ବାସିନ୍ଦାଙ୍କ କହିବା ଅନୁସାରେ, ସୈନ୍ୟ ପ୍ରତ୍ୟାହାର ପରେ ଭାରତ ସୀମା ଭିତରେ ଥିବା ଅଞ୍ଚଳରେ ବଫର ଜୋନ୍ କରାଯାଇଛି। ତାହା ପୂର୍ବରୁ ନୂଆଦିଲ୍ଲୀ ନିୟନ୍ତ୍ରଣରେ ଥିଲା। ଚାଇନା ଚାଲାକି କରି ଭାରତ ଦଖଲରେ ଥିବା ଭୂମିକୁ ପଶିଆସିଛି।
ଯେଉଁ ସ୍ଥାନ ଭାରତର ଥିଲା ସେଠାରୁ ଭାରତୀୟ ସୈନ୍ୟ ପଛକୁ ଫେରିଆସିଛନ୍ତି ବୋଲି ସ୍ଥାନୀୟ କାଉନସିଲର ଓନ୍ଚୋକ୍ ଷ୍ଟାଞ୍ଜିନ୍ କହିଛନ୍ତି। ଷ୍ଟାଞ୍ଜିନ୍ ଆହୁରି କହିଛନ୍ତି, ୨୦୨୧ରେ ଲଦାଖର ପାଙ୍ଗୋଙ୍ଗ୍ ହ୍ରଦ ନିକଟରୁ ସୈନ୍ୟ ପ୍ରତ୍ୟାହାର ପାଇଁ ଭାରତ ଓ ଚାଇନା ରାଜି ହୋଇଥିଲା। ସେତେବେଳେ ମଧ୍ୟ ଭାରତ ନିଜ ଅଞ୍ଚଳର ବଡ଼ ଭାଗ ଚାଇନାକୁ ଦେଇଥିଲା। ଚାଇନା ହାତକୁ କେତେକ ଅଞ୍ଚଳ ଚାଲିଯିବା ଦ୍ୱାରା ସେଠାକାର ବାସିନ୍ଦାଙ୍କ ସୁରକ୍ଷା ପ୍ରତି ବିପଦ ସୃଷ୍ଟି ହୋଇଛି। ଲୋକଙ୍କ ଜୀବିକା ପ୍ରଭାବିତ ହୋଇଛି। ଚାରଣ ଭୂମି ଉପରେ ବେଜିଂ କବଜା କରିଛି। ଏହାକୁ ନେଇ ଅନେକ ଥର ସ୍ବର ଉଠାଇଥିଲେ ବି କିଛି ସୁଫଳ ମିଳିନି। ସରକାର ଖୁସି ଖୁସିରେ ଜମି ଦାନ କରିଚାଲିଛନ୍ତି। ଏହା ଜାରି ରହିଲେ ଆମେ ଆଗକୁ ଆହୁରି ଅଧିକ ଜମି ହରାଇବା ବୋଲି ଷ୍ଟାଞ୍ଜିନ୍ କହିଛନ୍ତି।