ନୂଆଦିଲ୍ଲୀ,୧୨।୧୦: ଭାରତ ସମଗ୍ର ପୃଥିବୀକୁ ଅହିଂସାର ରାସ୍ତା ଦେଖାଇଛି। ସମ୍ପ୍ରତି ମହାତ୍ମା ଗାନ୍ଧୀଙ୍କ ଏହି ଆଦର୍ଶକୁ ପୃଥିବୀର ବିଭିନ୍ନ ରାଷ୍ଟ୍ରରେ ମାନି ନେଇଛନ୍ତି। ପୃଥିବୀ ବିଶ୍ୱ ଯୁଦ୍ଧର ବିଭୀଷିକାରେ ଜଳୁଥିବା ବେଳେ ଭାରତ ଅହିଂସାର ମାର୍ଗକୁ ଗ୍ରହଣ କରିଥିଲା। ଏହା ମାଧ୍ୟମରେ ବିଶ୍ୱ ମାନବାଧିକାର ଏବଂ ମାନବୀୟ ମୂଲ୍ୟବୋଧକୁ ଜଡ଼ିତ କରାଯାଇଥିଲା ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଜାତୀୟ ମାନବାଧିକାର କମିଶନର ୨୮ତମ ସ୍ଥାପନା ଦିବସ ଅବସରରେ ଏକ ଭିଡ଼ିଓ କନଫରେନ୍ସିଂ କାର୍ଯ୍ୟକ୍ରମରେ ଯୋଗଦେଇ କହିଛନ୍ତି।
ଭାରତବାସୀ ‘ଆତ୍ମଓ୍ବତ ସର୍ବଭୁତେଷୁ’ ଭଳି ଆଦର୍ଶରେ ଅନୁପ୍ରାଣିତ। ଅର୍ଥାତ୍ ସେମାନେ ଅନ୍ୟ ମଣିଷଙ୍କୁ ନିଜ ଭଳି ମନେ କରିଥାନ୍ତି। ଭାରତ ଲଗାତାର ପୃଥିବୀକୁ ମାନବତା ଏବଂ ଅଧିକାର ସମ୍ପର୍କରେ ନୂଆ ବାର୍ତ୍ତା ଦେବା ଜାରି ରଖିଛି। ବହୁ ସମୟରେ ବିଭିନ୍ନ ଘଟଣା ପ୍ରବାହରେ ପୃଥିବୀ ଭ୍ରମିତ ହେଉଥିବାବେଳେ ଭାରତ ସବୁବେଳେ ମାନବିକ ଅଧିକାର ପ୍ରତିଶ୍ରୁତିବଦ୍ଧତାକୁ ପୂରଣ କରିଛି।
ଭାରତ ସରକାର ଦେଶରେ ହେଉଥିବା ମାନବିକ ଅଧିକାର କ୍ଷୁର୍ଣ୍ଣ ମାମଲାର ଦୂର ପାଇଁ ବିଭିନ୍ନ ସ୍ତରରେ କାର୍ଯ୍ୟ ଜାରି ରଖିଛନ୍ତି। ଅନ୍ୟାୟ ଦୂର ପାଇଁ ପ୍ରୟାଶ ଜାରି ରହିଛି। ମୁସଲମାନ୍ ମହିଳାଙ୍କ କ୍ଷେତ୍ରରେ ତିନି ତଲାକ୍ ଆଇନକୁ ରଦ୍ଦ କରାଯାଇଛି। ସେହିପରି କର୍ମଜୀବୀ ମହିଳାଙ୍କ ସୁବିଧା ଲଊାଗି ୨୬ ସପ୍ତାହର ଦରମା ସହିତ ମାତୃତ୍ୱ ଛୁଟି ଘୋଷଣା କରାଯାଇଛି। ମହିଳାଙ୍କ ସୁରକ୍ଷା ପାଇଁ ଦେଶର ୭୦୦ରୁ ଅଧିକ ଜିଲାରେ ମେଡ଼ିକାଲ, ପୋଲିସ, ମାନସିକ ପରାମର୍ଶ ଏବଂ ଆଇନଗତ ସହାୟତା ପ୍ରଦାନ କରୁଥିବା ଓ୍ବାନ୍ ଷ୍ଟପ୍ ସେଣ୍ଟର ସ୍ଥାପନା କରାଯାଇଛି। ସେହିପରି ସେମାନଙ୍କ ଉପରେ ହେଉଥିବା ନିର୍ଯାତନାର ବିଚାର ଲାଗି ଦେଶରେ ୬୫୦ରୁ ଅଧିକ ଫାଷ୍ଟ ଟ୍ରାକ୍ କୋର୍ଟ ସ୍ଥାପନା କରାଯାଇଛି।
ଦେଶ ସବ୍କା ସାଥ୍, ସବ୍କା ବିକାଶ, ସବ୍କା ବିଶ୍ୱାସ, ସବ୍କା ପ୍ରୟାସ ଆଧାରରେ ଆଗେଇ ଚାଲିଛି। ଏପରିସ୍ଥଳେ ମାନବିକ ଅଧିକାରର ମୌଳିକତାକୁ ଜାରି ରଖିବା ସମସ୍ତଙ୍କର ଦାୟିତ୍ୱ ତଥା କର୍ତ୍ତବ୍ୟ ବୋଲି ପ୍ରଧାନମନ୍ତ୍ରୀ ଆହ୍ବାନ ଦେଇଛନ୍ତି। ମାନବିକ ଅଧିକାର ଦାୟିତ୍ୱ ତଥା କର୍ତ୍ତବ୍ୟକୁ ଏକା ସହିତ ବିଚାର ପରିସରଭୁକ୍ତ କରିବା ଆବଶ୍ୟକ। କିନ୍ତୁ ଭିନ୍ନ ଭିନ୍ନ ଭାବେ ନୁହେଁ। ଏନେଇ ସଚେତନତା ସୃଷ୍ଟିର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି।