ଆମ ଦେଶ ଭାରତରେ ଅନେକ ସ୍କୁଲ ରହିଛି। ମାତ୍ର ଏପରି ଏକ ସ୍କୁଲ ରହିଛି, ଯାହା ଦୁନିଆର ସବୁଠୁ ବଡ଼ ସ୍କୁଲ ଭାବରେ ପରିଗଣିତ। ଖାଲି ଏତିକି ନୁହେଁ, ଏହି ସ୍କୁଲ ଗିନିଜ୍ ବୁକ୍ରେ ମଧ୍ୟ ସ୍ଥାନ ପାଇଛି।
ଏପରି ଏକ ସ୍କୁଲ ଭାରତର ଲକ୍ଷ୍ନୌରେ ରହିଛି। ଏହାର ନାମ ସିଟି ମଣ୍ଟେସୋରି ସ୍କୁଲ। ଏହା ହେଉଛି ବିଶ୍ୱର ସବୁଠାରୁ ବଡ଼ ସ୍କୁଲ। ୧୯୫୯ରେ ଜଗଦୀଶ ଗାନ୍ଧୀଙ୍କ ଦ୍ୱାରା ପ୍ରତିଷ୍ଠିତ ଏହି ସ୍କୁଲରେ ବର୍ତ୍ତମାନ ୫୮,୦୦୦ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସହରରେ ୨୦ଟି କ୍ୟାମ୍ପସ ରହିବା ସହିତ ଏହି ସ୍କୁଲରେ ୧୦୦୦ରୁ ଅଧିକ ଶ୍ରେଣୀଗୃହ ଏବଂ ୩୭୦୦ କମ୍ପ୍ୟୁଟର ରହିଛି। ସ୍କୁଲର ୪୫୦୦ କର୍ମଚାରୀ ଅଛନ୍ତି। ଯେଉଁଥିରେ ଶିକ୍ଷକ, ସପୋର୍ଟ ଷ୍ଟାଫ୍, କ୍ଲିନର୍ସ, ରିକ୍ସାଚାଳକ ଏବଂ ବୈଦ୍ୟୁତିକ କର୍ମଚାରୀ, ବଢ଼େଇ ଏବଂ ମାଳୀ ମଧ୍ୟ ରହିଛନ୍ତି।
ଏହି ସ୍କୁଲ ୪ ଭାଗରେ ଚାଲିଥାଏ। ପ୍ରି-ପ୍ରାଇମେରୀ, ପ୍ରାଇମେରୀ, ଜୁନିଅର୍ ଏବଂ ଜୁନିଅର୍ସ୍। ଗୋଟିଏ ବିଲ୍ଡିଂରେ ୫ରୁ ୧୭ବର୍ଷ ବୟସର ୭,୫୦୦ରୁ ଅଧିକ ଛାତ୍ରୀଛାତ୍ରଙ୍କୁ ଶିକ୍ଷାଦାନ କରିବା ଏତେ ସହଜ ନୁହେଁ, କିନ୍ତୁ ସିଟି ମଣ୍ଟେସୋରି (ସିଏମ୍ଏସ୍) ଏହା କରିଛି। ଏହି ସ୍କୁଲର ନାମ ଗିନିଜ୍ ବୁକ ଅଫ୍ ଓ୍ବାଲର୍ଡ ରେକର୍ଡରେ ‘ବିଶ୍ୱର ସର୍ବବୃହତ ସ୍କୁଲ୍’ ଭାବରେ ରହିଛି। ପିଲାମାନଙ୍କର ସର୍ବଗୁଣୀୟ ବିକାଶ, ନୈତିକ ଚରିତ୍ର ବିକାଶ, ବିଶ୍ୱର ଦୃଷ୍ଟିକୋଣ ଏବଂ ଅନ୍ତର୍ଜାତୀୟ ଏକ୍ସପୋଜର୍ ଉପରେ ଏହି ସ୍କୁଲ ଗୁରୁତ୍ୱ ଦେଇଥାଏ।