ନୂଆଦିଲ୍ଲୀ,୪।୩ (ପି.ଟି.): ଇନ୍ଦୋରଠାରେ ଅନୁଷ୍ଠିତ ତୃତୀୟ ଟେଷ୍ଟରେ ଭାରତ ଶୋଚନୀୟଭାବେ ଅଷ୍ଟ୍ରେଲିଆଠାରୁ ପରାଜିତ ହୋଇଛି। ତେଣୁ ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲରେ ପ୍ରବେଶ କରିବାକୁ ହେଲେ ଭାରତକୁ ଅହମଦାବାଦରେ ହେବାକୁଥିବା ସିରିଜର ୪ର୍ଥ ତଥା ଅନ୍ତିମ ଟେଷ୍ଟରେ ବିଜୟୀ ହେବାକୁ ପଡ଼ିବ। ଯଦି ଏହି ଟେଷ୍ଟରେ ଭାରତ ହାରିଯାଏ କିମ୍ବା ଡ୍ର ରଖେ ତେବେ ଶ୍ରୀଲଙ୍କା-ନ୍ୟୁଜିଲାଣ୍ଡ ଟେଷ୍ଟ ସିରିଜର ଫଳାଫଳ ଉପରେ ଭାଗ୍ୟ ନିର୍ଭର କରିବ। ଇନ୍ଦୋରରେ ୯ ଉଇକେଟ ବିଜୟୀ ହୋଇ ଅଷ୍ଟ୍ରେଲିଆ ଫାଇନାଲରେ ପ୍ରବେଶ କରିସାରିଛି। ଡବ୍ଲ୍ୟୁଟିସି ଟେବୁଲରେ ଏହାର ପର୍ସେଣ୍ଟେଜ୍ ପଏଣ୍ଟ୍ସ (ପିସିଟି) ୬୮.୫୨ ରହିଛି। ଡବ୍ଲ୍ୟୁଟିସି ଫାଇନାଲ ଜୁନ୍ ୭ରୁ ୧୧ ପର୍ଯ୍ୟନ୍ତ ଓଭାଲରେ ଅନୁଷ୍ଠିତ ହେବ।
ବର୍ତ୍ତମାନ ସୁଦ୍ଧା ଅଷ୍ଟ୍ରେଲିଆ ୧୪୮ ପଏଣ୍ଟ ପାଇଛି। ଅଷ୍ଟ୍ରେଲିଆ ଯଦି ୪ର୍ଥ ତଥା ଅନ୍ତିମ ଟେଷ୍ଟ ହାରିଯାଏ ତେବେସୁଦ୍ଧା ୬୪.୯୧ ପିସିଟି ସହ ଟେବୁଲର ଶୀର୍ଷରେ ରହିବ। ଭାରତ ୧୭ ଟେଷ୍ଟରୁ ୧୨୩ ପଏଣ୍ଟ ପାଇଥିବାବେଳେ ଏହାର ପିସିଟି ୬୦.୨୯ ରହିଛି। ଭାରତ ଯଦି ୪ର୍ଥ ଟେଷ୍ଟରେ ବିଜୟୀ ହେବ ତେବେ ୧୩୫ ପଏଣ୍ଟ ସହିତ ଏହାର ପିସିଟି ୬୨.୫ରେ ପହଞ୍ଚତ୍ବ। ଏପରିସ୍ଥିତିରେ ଟେବୁଲର ଦ୍ୱିତୀୟ ସ୍ଥାନରେ ରହି ଫାଇନାଲରେ ପ୍ରବେଶ କରିବ। ଯଦି ପରାଜିତ ହୁଏ ତେବେ ପିସିଟି ୫୬.୯୪କୁ ଖସି ଆସିବ। ଡ୍ର ରହିଲେ ପିସିଟି ୫୮.୭୯ ଓ ଟାଇ ରହିଲେ ୫୯.୭୨ ରହିବ। ଏ କ୍ଷେତ୍ରରେ ନ୍ୟୁଜିଲାଣ୍ଡ-ଶ୍ରୀଲଙ୍କା ସିରିଜ ଉପରେ ଅନେକ କିଛି ନିର୍ଭର କରିବ ା ସମ୍ପ୍ରତି ନ୍ୟୁଜିଲାଣ୍ଡ ଗସ୍ତରେ ଥିବା ଶ୍ରୀଲଙ୍କା ଯଦି ୨-୦ରେ ସିରିଜ ଜିତେ ତେବେ ସୁଯୋଗ ସୃଷ୍ଟି କରିପାରିବ। ବର୍ତ୍ତମାନ ଶ୍ରୀଲଙ୍କାର ପିସିଟି ୫୩.୩୩ ରହିଛି। ଯଦି ଅଷ୍ଟ୍ରେଲିଆ ନିକଟରୁ ଭାରତ ହାରେ କିମ୍ବା ଡ୍ର ରଖେ ଏବଂ ଶ୍ରୀଲଙ୍କା ୨-୦ରେ ସିରିଜ ଜିତିଯାଏ ତେବେ ଏହାର ପିସିଟି ୬୧.୧୧ ହୋଇଯିବ। ମାତ୍ର ଶ୍ରୀଲଙ୍କା ଯଦି ଗୋଟିଏ ବି ଟେଷ୍ଟ ଡ୍ର ରଖେ କିମ୍ବା ହାରିଯାଏ ତେବେ ଭାରତ ଫାଇନାଲରେ ପ୍ରବେଶ କରିଯିବ।