ପ୍ରୋଭିଡେନ୍ସ୍ସ (ଗୁଏନା), ୮।୮: ଭାରତ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଚଳିତ ସିରିଜର ତୃତୀୟ ଟି୨୦ ଅନ୍ତର୍ଜାତୀୟ କ୍ରିକେଟ ମ୍ୟାଚ ମଙ୍ଗଳବାର ଏଠାରେ ଅନୁଷ୍ଠିତ ହେବ। ୫ ମ୍ୟାଚ ବିଶିଷ୍ଟ ସିରିଜର ପ୍ରଥମ ୨ଟି ମ୍ୟାଚକୁ ଭାରତ ହାରି ସାରିଛି। ତେଣୁ ଟିମ୍ ଇଣ୍ଡିଆ ପାଇଁ ଲଜ୍ଜାଜନକ ସିରିଜ ପରାଜୟ ସ୍ଥିତି ଉପୁଜିଛି। ଦଳରେ ପରୀକ୍ଷା ନିରୀକ୍ଷା ଘାତକ ସାବ୍ୟସ୍ତ ହୋଇଛି। ଓ୍ବେଷ୍ଟଇଣ୍ଡିଜ ବିପକ୍ଷରେ ଦିନିକିଆ ସିରିଜକୁ କୌଣସିମତେ ବଞ୍ଚାଇବାରେ ସକ୍ଷମ ହୋଇଥିବା ଭାରତୀୟ ଦଳ ୨୦୧୬ ପରେ ପ୍ରଥମଥର ପାଇଁ ଦ୍ୱିପାକ୍ଷିକ ଟି୨୦ ସିରିଜ ପରାଜୟ ଦ୍ୱାରରେ ପହଞ୍ଚତ୍ ଯାଇଛି। ବ୍ୟାଟିଂ ଓ ବୋଲିଂ ଉଭୟ ବିଭାଗରେ ଭ୍ରମଣକାରୀ ଦଳ ପଛରେ ପଡ଼ିଯାଇଛି।
ଟି୨୦ ପରି କ୍ରିକେଟର ଛୋଟ ଫର୍ମାଟରେ ବଡ଼ ସ୍କୋର କରିବାକୁ ହେଲେ ପ୍ରଥମ ବଲ୍ରୁ ହିଁ ବଲ୍କୁ ହିଟ୍ କରିବାକୁ ପଡ଼ିଥାଏ। ମାତ୍ର ଟପ୍ ଅର୍ଡରରେ ଇଶାନ କିଶନ, ଶୁବମନ ଗିଲ୍ ଓ ସୂର୍ଯ୍ୟକୁମାର ଯାଦବ ତାହା କରିବାରେ ସକ୍ଷମ ହୋଇ ନାହାନ୍ତି। ଟପ୍ ଅର୍ଡର ଫେଲ୍ ମାରିବାରୁ ସଞ୍ଜୁ ସାମସନ ଓ ନୂଆକରି ଅନ୍ତର୍ଜାତୀୟ କ୍ରିକେଟରେ ଯୋଗଦେଇଥିବା ତିଳକ ବର୍ମାଙ୍କ ଉପରେ ଅତିରିକ୍ତ ଚାପ ପଡ଼ୁଛି। ଆଗକୁ ଏସିଆ କପ୍ ଏବଂ ଦିନିକିଆ ବିଶ୍ୱକପ ଆସୁଥିବାରୁ ଏମାନଙ୍କ ବିଫଳତା ଟିମ୍ ମ୍ୟାନେଜମେଣ୍ଟ ପାଇଁ ଚିନ୍ତାର କାରଣ ପାଲଟିଛି। ଅଗଷ୍ଟ ୩୧ରୁ ଏସିଆ କପ୍ ଆରମ୍ଭ ହେବ। ”ବ୍ୟାଟରଙ୍କୁ ଅଧିକ ଦାୟିତ୍ୱବାନ ହେବାକୁ ପଡ଼ିବ“ ବୋଲି ଦ୍ୱିତୀୟ ଟି୨୦ ପରାଜୟ ପରେ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପ୍ରକାଶ କରିଥିଲେ। ଟିମ୍ କମ୍ବିନେଶନ ଦେଖିବାକୁ ଗଲେ ଭାରତର ବ୍ୟାଟିଂ ଲାଇନ୍ଅପ୍ ବେଶ୍ ଲମ୍ବା। ଅକ୍ଷର ପଟେଲ ୭ ନମ୍ବରରେ କ୍ରିଜ୍କୁ ଆସୁଛନ୍ତି। ତେଣୁ ଆଗାମୀ ମ୍ୟାଚ ପାଇଁ ଦଳରେ କୌଣସି ପରିବର୍ତ୍ତନର ବିଶେଷ ସମ୍ଭାବନା ନାହିଁ। ଆହତ ସମସ୍ୟା ଯୋଗୁ ଦ୍ୱିତୀୟ ମ୍ୟାଚରେ ଖେଳିପାରି ନ ଥିବା ଇନ୍-ଫର୍ମ ସ୍ପିନର କୁଲଦୀପ ଯାଦବ ଉପଲବ୍ଧ ହେଉଛନ୍ତି କି ନାହିଁ ତା’ ଉପରେ ନଜର ରହିବ। ଗତ ମ୍ୟାଚରେ ଅକ୍ଷରଙ୍କ ବାମହାତୀ ସ୍ପିନ୍କୁ ଆଦୌ ବ୍ୟବହାର କରାଯାଇ ନ ଥିଲା। ୟୁଜବେନ୍ଦ୍ର ଚହଲ ଓ ରବି ବିଷ୍ଣୋଇଙ୍କୁ ନିକୋଲସ ପୁରନ ସହଜରେ ଖେଳିଥିଲେ। ତେଣୁ ଭାରତୀୟ ସ୍ପିନରଙ୍କୁ ପୁରନଙ୍କୁ ରୋକିବା ପାଇଁ ଉପାୟ ବାହାର କରିବାକୁ ହେବ।
ଦ୍ୱିତୀୟ ଟି୨୦ରେ ହାର୍ଦ୍ଦିକ ଓ ଅର୍ଶଦୀପ ସିଂ ନୂଆ ବଲ୍କୁ ସୁଇଂ କରିବାରେ ସକ୍ଷମ ହୋଇଥିଲେ। ଆଗାମୀ ମ୍ୟାଚରେ ଏହାର ପୁନରାବୃତ୍ତି ହେବା ଆଶା ରହିବ। ଚହଲ ଦୀର୍ଘ ୨ ମାସ ପରେ ଖେଳୁଥିଲେ ହେଁ ସିରିଜରେ ପ୍ରଭାବୀ ହୋଇପାରିଛନ୍ତି। ମାତ୍ର ରବି ବିଷ୍ଣୋଇଙ୍କ କ୍ରମାଗତ ଗୁଗ୍ଲି ଘରୋଇ ବ୍ୟାଟରଙ୍କ ଉପରେ ଚାପ ପକାଇ ପାରି ନ ଥିଲା। ସେ ନିଜ ଯୋଜନା ସମ୍ପର୍କରେ ଚିନ୍ତା କରିବେ ନିଶ୍ଚିତ। ଦ୍ରୁତ ବୋଲର ମୁକେଶ କୁମାର ଅଧିକ ରନ ଦେଇଥିବାରୁ ତାଙ୍କ ସ୍ଥାନରେ ଆଭେଶ ଖାଁ କିମ୍ବା ଉମ୍ରାନ ମଲିକଙ୍କୁ ସୁଯୋଗ ମିଳିପାରେ।
ଅନ୍ୟପକ୍ଷରେ ଓ୍ବେଷ୍ଟଇଣ୍ଡିଜ ବୃହତ୍ ବ୍ୟବଧାନରେ ସିରିଜ ବିଜୟ ଦ୍ୱାରରେ ପହଞ୍ଚତ୍ ଯାଇଛି। ଭାରତ ପରି ଓ୍ବେଷ୍ଟଇଣ୍ଡିଜ ଟପ୍ ଅର୍ଡର ମଧ୍ୟ କ୍ଲିକ୍ କରିନାହାନ୍ତି। ଗତ ମ୍ୟାଚରେ ପୁରନ ଦଳକୁ ବିଜୟୀ କରାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ। ଆଗାମୀ ମ୍ୟାଚରେ ମଧ୍ୟ ପୁରନ ଓ ଶିମରନ ହେଟମେର ଭାରତୀୟ ସ୍ପିନରଙ୍କୁ ଉପଯୁକ୍ତ ମୁକାବିଲା କରନ୍ତୁ ବୋଲି ଘରୋଇ ଦଳ ଚାହିଁବ। ତେବେ ଓ୍ବେଷ୍ଟଇଣ୍ଡିଜ ବୋଲରମାନେ ପ୍ରଭାବୀ ପ୍ରଦର୍ଶନ କରିଛନ୍ତି। ଫଳରେ ଭାରତୀୟ ବ୍ୟାଟର ବଡ଼ ସ୍କୋର କରିପାରି ନାହାନ୍ତି। ଘରୋଇ ଦଳ ସିରିଜ ବିଜୟ ଲକ୍ଷ୍ୟରେ ରହିଥିବା ଏହାର ଅଧିନାୟକ ରୋଭମାନ ପଓ୍ବେଲ ପ୍ରକାଶ କରିଛନ୍ତି।