ନୂଆଦିଲ୍ଲୀ, ୨୬।୧: ସାଙ୍ଘାଇ କୋଅପରେଶନ୍ ଅର୍ଗାନାଇଜେଶନ୍ (ଏସ୍ସିଓ)ରେ ସାମିଲ ହେବା ଲାଗି ପାକିସ୍ତାନ ବହିର୍ବ୍ୟାପାର ମନ୍ତ୍ରୀ ବିଲାଓ୍ବଲ ଭୁଟ୍ଟୋ ଜର୍ଦାରି ଏବଂ ଚିଫ୍ ଜଷ୍ଟିସ୍ ଅଫ୍ ପାକିସ୍ତାନ ଉମର ଅତା ବନ୍ଦିଆଲଙ୍କୁ ବୁଧବାର ଭାରତ ପକ୍ଷରୁ ନିମନ୍ତ୍ରଣ କରାଯାଇଛି। ଇସଲାମାବାଦରେ ଥିବା ଭାରତୀୟ ଉଚ୍ଚାୟୁକ୍ତଙ୍କ ଜରିଆରେ ପାକିସ୍ତାନକୁ ଏସ୍ସିଓରେ ଯୋଗ ଦେବା ଲାଗି ଡକାଯାଇଛି।
କିନ୍ତୁ ଏ ନେଇ ପ୍ରତିପକ୍ଷ ପାକିସ୍ତାନ ପଟରୁ କୌଣସି ପ୍ରତିକ୍ରିୟା ମିଳିନାହିଁ। ଚଳିତବର୍ଷ ମେ’ ପ୍ରଥମ ସପ୍ତାହରେ ଗୋଆଠାରେ ଏସ୍ସିଓ ସମିଟ୍ ଅନୁଷ୍ଠିତ ହେବାକୁ ଥିବାବେଳେ ଭାରତ ଏହାର ଅଧ୍ୟକ୍ଷା କରିବ। ଯଦି ବିଲାଓ୍ବଲ ନିମନ୍ତ୍ରଣ ଗ୍ରହଣ କରି ଭାରତ ଆସନ୍ତି ତେବେ ୧୦ ବର୍ଷ ମଧ୍ୟରେ ଏହା ପାକ୍ ବହିର୍ବ୍ୟାପାର ମନ୍ତ୍ରୀଙ୍କ ପ୍ରଥମ ଭାରତଗସ୍ତ ହେବ। ପାକିସ୍ତାନ ପୂର୍ବତନ ବିଦେଶ ମନ୍ତ୍ରୀ ହିନା ରବ୍ବାନୀ ୨୦୧୧ରେ ଭାରତ ଆସିଥିଲେ। ଏସ୍ସିଓ ସମିଟ୍ ପାଇଁ ଭାରତ ଚାଇନା, ରୁଷିଆ ବହିର୍ବ୍ୟାପାର ମନ୍ତ୍ରୀଙ୍କ ସମେତ କେନ୍ଦ୍ରୀୟ ଏସିଆ ରାଷ୍ଟ୍ରକୁ ମଧ୍ୟ ନିମନ୍ତ୍ରଣ କରିଛି।
