ନୂଆଦିଲ୍ଲୀ/କିଭ୍, ୧୮ା୮: ୟୁକ୍ରେନ୍ ଉପରେ ରୁଷିଆର ଆକ୍ରମଣ ଜାରି ଥିବାବେଳେ ମସ୍କୋରୁ ଭାରତ ଅଶୋଧିତ ତୈଳ କିଣିବା ନିଷ୍ପତ୍ତି ଯଥାର୍ଥ ବୋଲି ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର କହିଛନ୍ତି। ଉଚ୍ଚ ଦରରେ ଏନର୍ଜୀ କ୍ରୟ କରିବା ପାଇଁ ଅଧିକାଂଶ ଭାରତୀୟ ସକ୍ଷମ ନୁହନ୍ତି। ତେଣୁ ଦେଶବାସୀଙ୍କୁ ସର୍ବୋତ୍ତମ ଡିଲ୍ ଦେବା ନୈତିକ କର୍ତ୍ତବ୍ୟ ବୋଲି ବୁଧବାର ଥାଇଲାଣ୍ଡର ବ୍ୟାଙ୍କ୍କଠାରେ ଆୟୋଜିତ ଏକ କାର୍ଯ୍ୟକ୍ରମରେ ଜୟଶଙ୍କର ପ୍ରକାଶ କରିଛନ୍ତି। ଏହାକୁ ନେଇ ୟୁକ୍ରେନ୍ ପକ୍ଷରୁ ତୀବ୍ର ପ୍ରତିକ୍ରିୟା ଆସିଛି। ରୁଷିଆରୁ ତେଲ ଆକାରରେ ଭାରତ ୟୁକ୍ରେନୀୟଙ୍କ ରକ୍ତ କିଣୁଛି ବୋଲି ୟୁକ୍ରେନ୍ ବହିର୍ବ୍ୟାପାର ମନ୍ତ୍ରୀ ଡିମିଟ୍ରୋ କୁଲେବା କହିଛନ୍ତି।
ଭାରତୀୟ ସମୁଦାୟଙ୍କୁ ଉଦ୍ବୋଧନ ଦେଇ ଜୟଶଙ୍କର କହିଥିଲେ, ଆମେ ଆମର ହିତକୁ ନେଇ ବେଶ୍ ସଚ୍ଚୋଟ ରହିଛୁ। ଭାରତର ମୁଣ୍ଡପିଛା ଆୟ ବର୍ଷକୁ ପ୍ରାୟ ଦେଢ଼ ଲକ୍ଷ ଟଙ୍କା। ପ୍ରତି ଭାରତୀୟ ଉଚ୍ଚ ମୂଲ୍ୟରେ ତୈଳ, ଗ୍ୟାସ୍ ଆଦି କିଣିବା ପାଇଁ ସକ୍ଷମ ନୁହନ୍ତି। ତେଣୁ ସେମାନଙ୍କ ସୁବିଧା ପାଇଁ କମ୍ ମୂଲ୍ୟରେ ତୈଳ ଆଦି ଯୋଗାଇଦେବା ନୈତିକ କର୍ତ୍ତବ୍ୟ। ସମ୍ପ୍ରତି ତୈଳ ଏବଂ ଗ୍ୟାସ୍ ଦର ଆକାଶଛୁଆଁ ହୋଇଛି। ଭାରତର ଅନେକ ତୈଳ ଯୋଗାଣକାରୀ ପାର୍ଟନର ତଥା ଦେଶଗୁଡ଼ିକ ଏବେ ୟୁରୋପମୁହଁ। ରୁଷିଆରୁ ତୈଳ କ୍ରୟ କମ୍ କରିବା ପାଇଁ ୟୁରୋପୀୟ ଦେଶଗୁଡ଼ିକ ମଧ୍ୟପ୍ରାଚ୍ୟ ରାଷ୍ଟ୍ରଗୁଡ଼ିକ ଉପରେ ନଜର ପକାଇଛନ୍ତି, ଯେଉଁମାନେ ଭାରତକୁ ତେଲ ଯୋଗାଇପାରିବେ।
ତେଣୁ ଏବେ ଏପରି ପରିସ୍ଥିତି ସୃଷ୍ଟି ହୋଇଛି ଯେଉଁଠି ପ୍ରତ୍ୟେକ ଦେଶ ସେମାନଙ୍କ ପାଇଁ ଉପଯୁକ୍ତ ଡିଲ୍ ସୁନିଶ୍ଚିତ କରିବା ପାଇଁ ଲାଗିଛନ୍ତି। ଭାରତ ମଧ୍ୟ ଅନୁରୂପ କାମ କରୁଛି ବୋଲି ଜୟଶଙ୍କର କହିଛନ୍ତି। ଏହା ଉପରେ ୟୁକ୍ରେନ୍ ପ୍ରତିପକ୍ଷ କୁଲେବା କହିଛନ୍ତି, ଭାରତଠାରୁ ଆମେ ଅଧିକ ସମର୍ଥନ ଓ ସହଯୋଗ ଆଶା କରୁ। ୟୁକ୍ରେନ୍ ଭାରତର ଏକ ଭରସାଯୋଗ୍ୟ ସହଯୋଗୀ। କିନ୍ତୁ ନୂଆଦିଲ୍ଲୀ ରୁଷିଆରୁ ତୈଳ କ୍ରୟ କରି ରୁଷିଆର ଯୁଦ୍ଧ ଇଞ୍ଜିନ୍କୁ ଇନ୍ଧନ ଯୋଗାଉଛି ବୋଲି କୁଲେବା କହିଛନ୍ତି।