ଭୁବନେଶ୍ବର, ୨୯ା୧୧(ବ୍ୟୁରୋ): ରାଷ୍ଟ୍ରୀୟ ପଛୁଆ ବର୍ଗ ମୋର୍ଚ୍ଚା ପକ୍ଷରୁ ମଙ୍ଗଳବାର ଭାରତ ବନ୍ଦ ଡାକରା ଦିଆଯାଇଛି। କେନ୍ଦ୍ର ସରକାରଙ୍କ ପକ୍ଷରୁ ଓବିସିଙ୍କ ଜାତି ଆଧାରିତ ଜନଗଣନା କରା ନ ଯିବା ପ୍ରତିବାଦରେ ଏହି ଡାକରା ଦିଆଯାଇଛି। ସେହିପରି ଇଭିଏମ୍ ଟାମ୍ପରିଂ, ଏନ୍ଆର୍ସି/ଏନ୍ପିଆର/ସିଏଏ, ଜଳ-ଜଙ୍ଗଲ-ଜମିରୁ ଆଦିବାସୀଙ୍କୁ ବିସ୍ଥାପନର ପ୍ରତିବାଦ ସାଙ୍ଗକୁ କୃଷକଙ୍କ ପାଇଁ ଏମ୍ଏସ୍ପି ଗ୍ୟାରେଣ୍ଟି ଆଇନ, ବେସରକାରୀ କ୍ଷେତ୍ରରେ ଏସ୍ସି, ଏସ୍ଟି, ଓବିସିଙ୍କ ପାଇଁ ସଂରକ୍ଷଣ କାର୍ଯ୍ୟକାରୀ କରିବା, ପୁରୁଣା ପେନସନ୍ ସ୍କିମ୍ ପୁନଃ କାର୍ଯ୍ୟକାରୀ କରିବା ଦାବି କରାଯାଇଛି। ପଶୁ ଓ ପକ୍ଷୀଙ୍କ ଗଣନା କରାଯାଉଥିବାବେଳେ ଓବିସିଙ୍କର ଜନଗଣନା କରାଯାଉ ନ ଥିବା ନେଇ ମୋର୍ଚ୍ଚା କ୍ଷୋଭ ପ୍ରକାଶ କରିଛି। ଏହିକ୍ରମରେ ରାଜ୍ୟରେ ମଧ୍ୟ ମୋର୍ଚ୍ଚାର ଓଡ଼ିଶା ଶାଖା ପକ୍ଷରୁ ବନ୍ଦ ଡାକରା ଦିଆଯାଇଛି। ମୋର୍ଚ୍ଚା କର୍ମକର୍ତ୍ତା, ସଦସ୍ୟମାନେ ରାସ୍ତାରୋକୋ ସାଙ୍ଗକୁ ଧାରଣା ଦେବେ ବୋଲି କୁହାଯାଇଛି। ଏହାକୁ ଦୃଷ୍ଟିରେ ରଖି କୌଣସି ସ୍ଥାନରେ ଯେପରି ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ନ ହେବ ସେଥିପ୍ରତି ଧ୍ୟାନଦେବାକୁ ସବୁ ଜିଲାପାଳଙ୍କୁ ସୋମବାର ଗୃହ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି। ସମସ୍ତ ଜରୁରୀକାଳୀନ ସାମଗ୍ରୀର ପରିବହନରେ ଯେପରି ବାଧାପ୍ରାପ୍ତ ନ ହୁଏ, ସେଦିଗରେ ମଧ୍ୟ ଧ୍ୟାନ ଦେବାକୁ କୁହାଯାଇଛି।