ଇସଲାମାବାଦ/ନୂଆଦିଲ୍ଲୀ,୩।୧: ସବୁଥର ପରି ଏଥର ମଧ୍ୟ ପାକିସ୍ତାନ ଭାରତକୁ ଭୟ କରୁଛି। ଏଥର ସେ ନିଜେ ଏହାକୁ ଗ୍ରହଣ କରିଛି। ସୂଚନାଯୋଗ୍ୟ, ପାକିସ୍ତାନ ବୈଦେଶିକ ମନ୍ତ୍ରଣାଳୟ ନିଜ ଦେଶରେ ଆତଙ୍କବାଦୀଙ୍କ ବିରୋଧରେ ଭାରତର ଅଭିଯାନକୁ ନେଇ ଉଦବେଗ ପ୍ରକାଶ କରିଛି। ପାକିସ୍ତାନ କହିଛି ଯେ ସୀମା ବାହାରେ ଆତଙ୍କବାଦୀଙ୍କୁ ହଟାଇବା ପାଇଁ ଭାରତ ଏକ ଅଭିଯାନ ଚଳାଉଛି।
ଆମେରିକାର ଖବରକାଗଜ ୱାଶିଂଟନ ପୋଷ୍ଟର ରିପୋର୍ଟ ପରେ ପାକିସ୍ତାନ ଏହି ଅଭିଯୋଗ ଆଣିଛି। ଏହି ରିପୋର୍ଟରେ ପ୍ରକାଶ ପାଇଛି ଯେ ପାକିସ୍ତାନ ଭିତରେ ଥିବା ବ୍ୟକ୍ତିବିଶେଷଙ୍କୁ ହତ୍ୟା କରିବା ପାଇଁ ଭାରତ ନିର୍ଦ୍ଦେଶ ଦେଇଛନ୍ତି ଯାହାକୁ ଏହା ଜାତୀୟ ସ୍ବାର୍ଥ ପାଇଁ ବିପଦ ବୋଲି ବିବେଚନା କରୁଛି। ୱାଶିଂଟନ ପୋଷ୍ଟ ନିକଟରେ ରିପୋର୍ଟ କରିଛି ଯେ ୨୦୨୧ ମସିହାରୁ ଭାରତର ଗୁପ୍ତଚର ଏଜେନ୍ସି ରିସର୍ଚ୍ଚ ଆଣ୍ଡ ଆନାଲିସିସ ୱିଙ୍ଗ (RAW) ପାକିସ୍ତାନରେ ଆତଙ୍କବାଦୀଙ୍କ ସହ କାରବାର କରୁଛି।
ସୂଚନାଯୋଗ୍ୟ, ବିଦେଶରେ ରହୁଥିବା ଆତଙ୍କବାଦୀଙ୍କୁ ହଟାଇବା ପାଇଁ ଏକ ବ୍ୟାପକ ରଣନୀତିର ଅଂଶ ଭାବରେ ଭାରତ ସରକାର ପାକିସ୍ତାନରେ ଅତି କମରେ ୨୦ ଜଣଙ୍କୁ ହତ୍ୟା କରିବାକୁ ନିର୍ଦ୍ଦେଶ ଦେଇଛନ୍ତି।
ଆମେରିକାର ଖବରକାଗଜ ଦାବି କରିଛି ଯେ ଭାରତୀୟ ଗୁପ୍ତଚର ସଂସ୍ଥା ର’ ଗୁପ୍ତ ହତ୍ୟାକାଣ୍ଡ ଘଟାଉଛି। ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଏଭଳି କାର୍ଯ୍ୟାନୁଷ୍ଠାନ ପାଇଁ ସରକାରଙ୍କ ସମର୍ଥନ ମଧ୍ୟ ରହିଛି। ତେବେ ଭାରତ ଏହି ଅଭିଯୋଗକୁ ପ୍ରତ୍ୟାଖ୍ୟାନ କରିସାରିଛି ଏବଂ ଆଜି ପର୍ଯ୍ୟନ୍ତ ଏ ସମ୍ପର୍କରେ କୌଣସି ପ୍ରମାଣ ଉପସ୍ଥାପନ କରାଯାଇ ନାହିଁ ବୋଲି କହିଛି।