ନୂଆଦିଲ୍ଲୀ,୧୮।୫: ଆସନ୍ତା ମାସରେ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ବିଶ୍ୱ ଟେଷ୍ଟ ଚାମ୍ପିଅନସିପ (ଡବ୍ୟୁଟିସି) ଫାଇନାଲ ଅନୁଷ୍ଠିତ ହେବ। ଭାରତୀୟ ଦଳ ପଡ଼ିଆକୁ ଓହ୍ଲାଇବା ମାତ୍ରେ ୮୯ ବର୍ଷର ଟେଷ୍ଟ ଇତିହାସରେ ଏହା ପ୍ରଥମ ଥର ହେବ, ଯେତେବେଳେ ଦଳ ଏକ ନିରପେକ୍ଷ ସ୍ଥାନରେ ଟେଷ୍ଟ ମ୍ୟାଚ ଖେଳିବ। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ରୁ ଟେଷ୍ଟ ମାନ୍ୟତା ପାଇଥିବା ୧୨ଟି ଦେଶ ମଧ୍ୟରୁ କେବଳ ଦୁଇଟି ଦେଶ ଏପର୍ଯ୍ୟନ୍ତ ଏକ ନିରପେକ୍ଷ ସ୍ଥାନରେ ଟେଷ୍ଟ ମ୍ୟାଚ ଖେଳି ନାହାଁନ୍ତି। ଏଥିମଧ୍ୟରେ ଭାରତ ବ୍ୟତୀତ ବାଂଲାଦେଶ ଅନ୍ତର୍ଭୁକ୍ତ। ଭାରତ ଖୁବ ଶୀଘ୍ର ଏହି ତାଲିକାରେ ଯୋଗ ଦେବ। ଡବ୍ୟୁଟିସି ଫାଇନାଲ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଜୁନ ୧୮ରୁ ଇଂଲଣ୍ଡର ସାଉଥମ୍ପଟନ୍ରେ ଖେଳାଯିବ, ଯାହା ଉଭୟ ଦେଶ ପାଇଁ ଏକ ନିରପେକ୍ଷ ସ୍ଥାନ।
ପାକିସ୍ତାନରେ ସୁରକ୍ଷା ବିପଦକୁ ଦୃଷ୍ଟିରେ ରଖି ଏକ ଦଶନ୍ଧିରୁ ଅଧିକ ସମୟ ଧରି ବିଦେଶୀ ଦଳ ସେଠାକୁ ଯାଇ ନ ଥିଲେ। ଏହି ସମୟରେ ପାକିସ୍ତାନ ୟୁଏଇ ଏବଂ ଶ୍ରୀଲଙ୍କାରେ ଘରୋଇ ମ୍ୟାଚ ଆୟୋଜନ କରିଥିଲା। ଇତି ମଧ୍ୟରେ, ଅଧିକାଂଶ ଦେଶ ନିରପେକ୍ଷ ସ୍ଥାନରେ ଟେଷ୍ଟ ମ୍ୟାଚ ଖେଳିବାର ସୁଯୋଗ ପାଇଲେ। ଏଥିମଧ୍ୟରେ ନ୍ୟୁଜିଲାଣ୍ଡ ଅନ୍ତର୍ଭୁକ୍ତ। ଏହି ଦଳ ୧୦୧୪ରୁ ୨୦୧୮ପର୍ଯ୍ୟନ୍ତ ନିରପେକ୍ଷ ସ୍ଥାନରେ ୬ଟି ମ୍ୟାଚ ଖେଳିଛି, ସେଥିମଧ୍ୟରୁ ତିନୋଟି ଜିତି ଦୁଇଟିରେ ହାରିଛି। ୨୦୦୭ ପରଠାରୁ ଭାରତ ଏବଂ ପାକିସ୍ଥାନ ମଧ୍ୟରେ କୌଣସି ଟେଷ୍ଟ ମ୍ୟାଚ ଖେଳାଯାଇ ନାହିଁ।
୧୯୯୯ରେ ନିରପେକ୍ଷ ସ୍ଥାନରେ ଭାରତ ଏକ ଟେଷ୍ଟ ମ୍ୟାଚ ଖେଳିବାର ସୁଯୋଗ ପାଇଥିଲା, କିନ୍ତୁ ଢାକାରେ ଖେଳାଯାଇଥିବା ଏସୀୟ ଟେଷ୍ଟ ଚାମ୍ପିଅନସିପର ଫାଇନାଲରେ ପ୍ରବେଶ କରିବାରେ ଭାରତୀୟ ଦଳ ବିଫଳ ହୋଇଥିଲା। ପାକିସ୍ତାନ ଏବଂ ଶ୍ରୀଲଙ୍କା ସେହି ଚାମ୍ପିଅନସିପ୍ର ଫାଇନାଲରେ ପ୍ରବେଶ କରିଥିଲେ ଏବଂ ପ୍ରଥମ ଥର ପାଇଁ ସେମାନେ ନିରପେକ୍ଷ ସ୍ଥାନରେ ଟେଷ୍ଟ ମ୍ୟାଚ ଖେଳିଥିଲେ।
ଉଲ୍ଲେଖଥାଉ କି, ନିରପେକ୍ଷ ସ୍ଥାନରେ ପ୍ରଥମ ଟେଷ୍ଟ ୧୦୯ ବର୍ଷ ପୂର୍ବେ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ମଧ୍ୟରେ ମଞ୍ଚେଷ୍ଟରରେ ୨୭-୨୮ମେ ୧୯୧୨ରେ ଖେଳାଯାଇଥିଲା। ଏହି ମ୍ୟାଚ ଏକ ଟ୍ରାଇ-ଟେଷ୍ଟ ସିରିଜର ଏକ ଅଂଶ ଥିଲା। ଯେଉଁଥିରେ ଆୟୋଜକ ଇଂଲଣ୍ଡ, ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ଦଳ ଅଂଶଗ୍ରହଣ କରିଥିଲେ। ଦୁଇ ଦିନ ମଧ୍ୟରେ ଅଷ୍ଟ୍ରେଲିଆ ଏକ ଇନିଂସ ଏବଂ ୮୮ ରନରେ ଜିତିଥିଲା।