ନୂଆଦିଲ୍ଲୀ: ଚଳିତ ବର୍ଷ ବିଶ୍ୱର ପ୍ରମୁଖ ଅର୍ଥ ବ୍ୟବସ୍ଥା ମଧ୍ୟରେ ଭାରତ ୬ତମ ସ୍ଥାନକୁ ଖସିଯାଇଛି। ୨୦୨୫ ବେଳକୁ ପୁଣି ଥରେ ବ୍ରିଟେନକୁ ଟପି ଭାରତ ପଞ୍ଚମ ବୃହତ୍ ଅର୍ଥ ବ୍ୟବସ୍ଥା ହେବ। ସେହିଭଳି ୨୦୩୦ ବେଳକୁ ତୃତୀୟ ସ୍ଥାନରେ ରହିବ ବୋଲି ସେଣ୍ଟର ଫର୍ ଇକୋନୋମିକ ଆଣ୍ଡ ବିଜ୍ନେସ ରିସର୍ଚ୍ଚ(ସିଇବିଆର୍) ନାମକ ଥିଙ୍କ ଟ୍ୟାଙ୍କ ଏହାର ରିପୋର୍ଟରେ ପ୍ରକାଶ କରିଛି। ସୂଚନାଯୋଗ୍ୟ, ୨୦୧୯ରେ ଭାରତ ବ୍ରିଟେନକୁ ଟପି ବିଶ୍ୱର ପଞ୍ଚମ ବଡ଼ ଅର୍ଥ ବ୍ୟବସ୍ଥା ହୋଇଥିଲା। ମାତ୍ର ୨୦୧୬ରେ ଏହା ଷଷ୍ଠ ସ୍ଥାନକୁ ଖସିଯାଇଛି। ଭାରତ ଉପରେ କରୋନା ମହାମାରୀ ପ୍ରଭାବ ପରିଲକ୍ଷିତ ହୋଇଛି। ଏହାର ଅର୍ଥ ବ୍ୟବସ୍ଥା ଉପରେ ଗଭୀର ପ୍ରଭାବ ପକାଇଛି।
ଶନିବାର ପ୍ରକାଶିତ ସିଇବିଆର୍ ରିପୋର୍ଟରେ କୁହାଯାଇଛି, ୨୦୨୦ରେ ଭାରତୀୟ ମୁଦ୍ରାର ଦୁର୍ବଳ ସ୍ଥିତି ଲାଗି ରହିଛି। ଏଭଳି ସ୍ଥିତିରେ ଭାରତୀୟ ଅର୍ଥ ବ୍ୟବସ୍ଥା ୨୦୨୧ରେ ୯% ଏବଂ ୨୦୨୨ରେ ୭% ବୃଦ୍ଧି ଘଟିବ। ଭାରତ ଆର୍ଥତ୍କ ଭାବେ ଯେତେ ସମୃଦ୍ଧ ହେବ ଅଭିବୃଦ୍ଧି ହାର ଆଗାମୀ ଦିନରେ ହ୍ରାସ ପାଇବ। ୨୦୩୫ ବେଳକୁ ଭାରତର ଜିଡିପି ବିକାଶ ହାର ୫.୮% ରହିବା ନେଇ ଆକଳନ କରାଯାଇଛି। ଏଭଳି ଅଭିବୃଦ୍ଧିକୁ ଦେଖିଲେ ଭାରତ ୨୦୩୦ ବେଳକୁ ବିଶ୍ୱର ତୃତୀୟ ବଡ ଅର୍ଥ ବ୍ୟବସ୍ଥା ଭାବେ ପରିଗଣିତ ହେବ। ୨୦୨୫ରେ ଭାରତ ବ୍ରିଟେନକୁ ଟପିବାକୁ ଥିବା ବେଳେ ୨୦୨୭ରେ ଜର୍ମାନୀ ଏବଂ ୨୦୩୦ ବେଳକୁ ଜାପାନକୁ ଟପିଯିବ ବୋଲି ଏହି ରିପୋର୍ଟରେ ଆକଳନ କରାଯାଇଛି।
୨୦୨୮ ବେଳକୁ ଚାଇନା ଆମେରିକାକୁ ଟପି ବିଶ୍ୱର ସବୁଠାରୁ ବଡ ଅର୍ଥ ବ୍ୟବସ୍ଥା ହେବା ନେଇ ଅନୁମାନ କରାଯାଉଛି। ପୂର୍ବରୁ କରାଯାଇଥିବା ଆକଳନଠାରୁ ଚାଇନା ଏହି ଲକ୍ଷ୍ୟକୁ ୫ ବର୍ଷ ଆଗରୁ ହାସଲ କରିପାରେ। ଡଲାର ଦୃଷ୍ଟିକୋଣରୁ ଜାପାନ ପ୍ରାୟ ୨୦୩୦ ଯାଏ ବିଶ୍ୱର ତୃତୀୟ ବଡ଼ ଅର୍ଥ ବ୍ୟବସ୍ଥା ହୋଇ ରହିବ। କୋଭିଡ୍-୧୯ ଭାରତୀୟ ଅର୍ଥ ବ୍ୟବସ୍ଥା ଲାଗି ଶକ୍ତ ଧକ୍କା ବୋଲି ରିପୋର୍ଟରେ କୁହାଯାଇଛି। ୨୦୧୯ରେ ଭାରତର ଜିଡିପି ୧୦ ବର୍ଷର ସର୍ବନିମ୍ନ ସ୍ତର ୪.୨% ଖସିଥିଲା। ବ୍ୟାଙ୍କିଙ୍ଗ୍ ସିଷ୍ଟମରେ ଅସୁବିଧା, ବିଶ୍ୱ ବାଣିଜ୍ୟ ସ୍ଥିତି ଏବଂ ସଂସ୍କାର ଧାରା ଗ୍ରହଣରେ ବିଭିନ୍ନ ସମସ୍ୟା ଯୋଗୁ ଏହାର ପ୍ରଭାବ ବଜାର ଉପରେ ପଡିଛି।
ଚଳିତ ଆର୍ଥତ୍କ ବର୍ଷ ଦ୍ୱିତୀୟ ତ୍ରୈମାସରେ ଦେଶର ଜିଡିପି ୨୩.୯% ହ୍ରାସ ହୋଇଛି। ଦ୍ୱିତୀୟ ତ୍ରୈମାସ ଜିଡିପି ୭.୫% ଖସିଛି। ଲକ୍ଡାଉନ ସହ ବିଶ୍ୱ ଏବଂ ଘରୋଇ ବଜାରରେ ଚାହିଦା କମିବା ଯୋଗୁ ଏହା ଜିଡିପି ଉପରେ ଶକ୍ତା ଧକ୍କା ଲାଗିଛି। ବର୍ତ୍ତମାନ ବଜାରରେ କଟକଣା କୋହଳ କରାଯାଉଛି। ଅର୍ଥ ବ୍ୟବସ୍ଥାର ବିଭିନ୍ନ କ୍ଷେତ୍ର ବର୍ତ୍ତମାନ ଟ୍ରାକ୍କୁ ଫେରୁଥିବା ନଜରକୁ ଆସିଛି। ମାତ୍ର କୋଭିଡ୍ ପୂର୍ବରୁ ବଜାର ଯେଭଳି ରହିଥିଲା ସେହି ସ୍ତର ବର୍ତ୍ତମାନ ସୁଦ୍ଧା ଫେରିପାରିନାହିଁ। ଘରୋଇ ବଜାର ଲାଗି କୃଷି କ୍ଷେତ୍ର ବେଶ୍ ଯୋଗଦାନ ରଖିଛି।