ଲିଡ୍ସ,୨୭।୮: ଇଂଲଣ୍ଡ ବିପକ୍ଷରେ ଚାଲିଥିବା ତୃତୀୟ ଟେଷ୍ଟର ପ୍ରଥମ ଇନିଂସରେ ୩୫୪ ରନ୍ରେ ପଛୁଆ ଥିବା ଟିମ୍ ଇଣ୍ଡିଆ ତା’ର ଦ୍ୱିତୀୟ ଇନିଂସ ଆରମ୍ଭ କରିଛି। ତୃତୀୟ ଦିନ ଲଞ୍ଚ ସୁଦ୍ଧା ଲୋକେଶ ରାହୁଲ (୮)ଙ୍କ ଉଇକେଟ ହରାଇ ୩୪ ରନ୍ କରିଛି ଭାରତ। ଭ୍ରମଣକାରୀ ଭାରତୀୟ ଦଳକୁ ଏବେ ଇନିଂସ ପରାଜୟରୁ ବର୍ତ୍ତିବା ପାଇଁ ଆହୁରି ୩୨୦ ରନ୍ ଦରକାର ଥିବା ବେଳେ ହାତରେ ଆଉ ୯ ଉଇକେଟ ବାକି ଅଛି।
ତୃତୀୟ ଦିନ ଘରୋଇ ଦଳ ତା’ର ଅସମାପ୍ତ ପ୍ରଥମ ଇନିଂସ ସ୍କୋର (୪୨୩/୮)ରୁ ବ୍ୟାଟିଂ ଆରମ୍ଭ କରିଥିଲା। ମାତ୍ର ୯ ରନ୍ ମଧ୍ୟରେ ଇଂଲଣ୍ଡ ତା’ର ଅନ୍ତିମ ଦୁଇ ଉଇକେଟ ହରାଇବାରୁ ଦଳ ୪୩୨ ରନ୍ରେ ଅଲଆଉଟ୍ ହୋଇଯାଇଛି। ଏଥି ସହିତ ଘରୋଇ ଦଳ ୩୫୪ ରନ୍ର ଅଗ୍ରଣୀ ହାସଲ କରିଥିଲା। ଭାରତ ପକ୍ଷରୁ ମହମ୍ମଦ ଶାମି ୪ ଉଇକେଟ ନେଇଥିବା ବେଳେ ମହମ୍ମଦ ସିରାଜ, ଯଶପ୍ରୀତ ବୁମରା ଓ ରବୀନ୍ଦ୍ର ଜାଡେଜା ୨ ଲେଖାଏ ଉଇକେଟ ନେଇଥିଲେ। ଏହାପରେ ଧୈର୍ଯ୍ୟର ସହିତ ଟିମ୍ ଇଣ୍ଡିଆ ପାଇଁ ବ୍ୟାଟିଂ ଆରମ୍ଭ କରିଥିଲେ ରାହୁଲ ଓ ରୋହିତ ଶର୍ମାଙ୍କ ଯୋଡ଼ି। ଦୁହେଁ ୧୯ ଓଭରରେ ୩୪ ରନ୍ କରିଥିଲେ। ରୋହିତ ଏବେ ୨୫ ରନ୍ କରି ଅପରାଜିତ ଅଛନ୍ତି।
