ଜୋହାନ୍ସବର୍ଗ,୫।୧: ଦକ୍ଷିଣ ଆଫ୍ରିକା ବିପକ୍ଷ ଚଳିତ ନ୍ୟୁ ଇୟର ଟେଷ୍ଟରେ ଅଜିଙ୍କ୍ୟ ରାହାନେ ଓ ଚେତେଶ୍ୱର ପୂଜାରାଙ୍କ ମଧ୍ୟରେ ଶତକୀୟ ଭାଗୀଦାରି ପରେ ଲଗାତାର ୩ ଉଇକେଟ ହରାଇଛି ଟିମ୍ ଇଣ୍ଡିଆ। ଫଳରେ ପ୍ରଥମ ଇନିଂସରେ ୨୭ ରନ୍ରେ ପଛୁଆ ଥିବା ଟିମ୍ ଇଣ୍ଡିଆ ୬ ଉଇକେଟ ହରାଇ ଏପର୍ଯ୍ୟନ୍ତ ୧୮୮ ରନ୍ କରିଛି। ଏବେ ହନୁମା ବିହାରୀ ୬ ଓ ଶାର୍ଦ୍ଦୁଳ ଠାକୁର ୪ ରନ୍ କରି କ୍ରିଜରେ ଅଛନ୍ତି। ପୂର୍ବରୁ ପ୍ରଥମ ଇନିଂସରେ ଭାରତ ୨୦୨ ରନ୍ କରିଥିବା ବେଳେ ଠାକୁରଙ୍କ ଚମତ୍କାର ବୋଲିଂ ପ୍ରଦର୍ଶନ କାରଣରୁ ଘରୋଇ ଦକ୍ଷିଣ ଆଫ୍ରିକା ୨୨୯ ରନ୍ରେ ଅଲଆଉଟ୍ ହୋଇଯାଇଥିଲା।
ପରବର୍ତ୍ତୀ ମ୍ୟାଚ୍ ଲାଗି ଦଳରେ ସ୍ଥାନ ସୁରକ୍ଷିତ ରଖିବା ପାଇଁ ସଂଘର୍ଷ କରୁଥିବା ଦୁଇ ବରିଷ୍ଠ ବ୍ୟାଟର ବୁଧବାର ଆରମ୍ଭରୁ ଆଟାକିଂ ବ୍ୟାଟିଂ କରିଥିଲେ। ଦୁହେଁ ପ୍ୟାଭେଲିଅନ ଫେରିବା ପୂର୍ବରୁ ଅର୍ଦ୍ଧଶତକ ପୂରଣ କରିଥିଲେ। ରାହାନେ ୫୮ (୮ ଚୌକା ଓ ୧ ଛକା) ଓ ଚେତେଶ୍ୱର ପୂଜାରା ୫୩ (୧୦ ଚୌକା) ରନ୍ କରି କ୍ରମାଗତ ଓଭରରେ କାଗିସୋ ରବାଡାଙ୍କ ଦ୍ୱାରା ଆଉଟ୍ ହୋଇଥିଲେ। ଦୁହେଁ ୩ୟ ଉଇକେଟ ପାଇଁ ଦଳୀୟ ସ୍କୋରରେ ଯୋଡ଼ିଥିଲେ ୧୧୧ ରନ୍। ଉଇକେଟକିପର ବ୍ୟାଟର ରିଷଭ ପନ୍ତ ଖାତା ଖୋଲିବା ପୂର୍ବରୁ ବେପରୁଆ ଶଟ୍ ଖେଳି ଉଇକେଟ ହରାଇଥିଲେ। ତାଙ୍କ ଉଇକେଟ ମଧ୍ୟ ପଡ଼ିଥିଲା ରବାଡାଙ୍କ ଭାଗରେ। ଆଟାକିଂ ବ୍ୟାଟିଂ କରୁଥିବା ରବିଚନ୍ଦ୍ରନ ଅଶ୍ୱିନ ୧୬ ରନ୍ କରି ଆଉଟ୍ ହୋଇଛନ୍ତି।
