ରାଞ୍ଚି,୨୮।୧: ଭାରତ ବିପକ୍ଷ ପ୍ରଥମ ଟି୨୦ ମ୍ୟାଚକୁ ୨୧ ରନ୍ରେ ଜିତି ନେଇଛି ନ୍ୟୁଜିଲାଣ୍ଡ। ଡାରିଲ ମିଚେଲ ଓ ଡେଭନ କନଓ୍ବେଙ୍କ ଅର୍ଦ୍ଧଶତକ ବଳରେ ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୨୦ ଓଭରରେ ୭ ଉଇକେଟରେ ୧୭୬ ରନ କରିଥିଲା। ଜବାବରେ ଭାରତ ୨୦ ଓଭରରେ ୯ ଉଇକେଟ ହରାଇ ୧୫୫ ରନ୍ କରିଥିଲା। ରାଞ୍ଚିର ଜେଏସ୍ସିଏ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଭାରତ ଟସ୍ ଜିତି ପ୍ରଥମେ ବୋଲିଂ କରିଥିଲା। ନ୍ୟୁଜିଲାଣ୍ଡ ପକ୍ଷରୁ ଡେଭନ୍ କନଓ୍ବେ(୫୨) ଓ ଫିନ୍ ଆଲେନ୍(୩୫) ପ୍ରଥମ ଉଇକେଟରେ ୪୩ ରନ ଯୋଡିଥିଲେ। ଓ୍ବାଶିଂଟନ୍ ସୁନ୍ଦର ମାତ୍ର ୪ ବଲ୍ ବ୍ୟବଧାନରେ ଫିନ୍ ଆଲେନ୍ ଓ ମାର୍କ ଚାପମ୍ୟାନ(୦)ଙ୍କୁ ଆଉଟ କରିଥିଲେ। ଗ୍ଲେନ୍ ଫିଲିପ୍ସ(୧୭) ଧୀମା ବ୍ୟାଟିଂ କରିବାରୁ ଭାରତ ମ୍ୟାଚକୁ ପ୍ରତ୍ୟାବର୍ତ୍ତନ କରିଥିଲା। ନ୍ୟୁଜିଲାଣ୍ଡ ପକ୍ଷରୁ ଡାରିଲ ମିଚେଲ୍ ୩୦ ବଲରୁ ୫୯ ରନ୍ କରିବାରୁ ଦଳ ୧୭୬ ରନ ସ୍କୋର କରିଥିଲା। ମିଚେଲଙ୍କ ଇନିଂସରେ ୩ ଚୌକା ଓ ୫ ଛକା ସାମିଲ ଥିଲା। ୧୯ ଓଭର ସୁଦ୍ଧା ନ୍ୟୁଜିଲାଣ୍ଡ ୧୪୯ ରନ୍ କରିଥବା ବେଳେ ୨୦ ତମ ଓଭରରେ ୨୭ ରନ୍ ଦେଇଥିଲେ ଅର୍ଶଦୀପ ସିଂ। ଭାରତ ପକ୍ଷରୁ ଓ୍ବାଶିଂଟନ୍ ସୁନ୍ଦର ୨ ଓ କୁଲଦୀପ ଯାଦବ, ଶିବମ ମାଭି ଓ ଅର୍ଶଦୀପ ସିଂ ଗୋଟିଏ ଲେଖାଏ ଉଇକେଟ ନେଇଥିଲେ।
୧୭୭ ରନ୍ର ପିଛା କରୁଥିବା ଭାରତର ଆରମ୍ଭ ଅତ୍ୟନ୍ତ ଖରାପ ରହିଥିଲା। ୩ ଟପ୍ ଅର୍ଡର ବ୍ୟାଟର ଶୁବମାନ ଗିଲ(୭), ଲୋକାଲ ବୟ ଇଶାନ କିଶନ(୪) ଓ ରାହୁଲ ତ୍ରିପାଠୀ(୦) ଦଳୀୟ ସ୍କୋର ୧୫ ମଧ୍ୟରେ ପ୍ୟାଭିଲିୟନ ଫେରିଥିଲେ। ସୂର୍ଯ୍ୟକୁମାର ଯାଦବ(୪୭) ଓ ହାର୍ଦ୍ଦିକ ପାଣ୍ଡ୍ୟା(୨୧)ଙ୍କ ମଧ୍ୟରେ ୬୮ ରନ୍ର ଭାଗୀଦାରି ହୋଇଥିଲା। ମାତ୍ର ୬ ରନ୍ ମଧ୍ୟରେ ଉଭୟ ପ୍ୟାଭିଲିୟନ ଫେରିବା ପରେ ନ୍ୟୁଜିଲାଣ୍ଡ ଡ୍ରାଇଭର ସିଟରେ ରହିଥିଲା।ଶେଷ ଆଡକୁ ଓ୍ବାଶିଂଟନ୍ ସୁନ୍ଦର(୫୦) କିଛି ଆକର୍ଷଣୀୟ ଶଟ୍ ଖେଳିଥିଲେ। ନ୍ୟୁଜିଲାଣ୍ଡ ପକ୍ଷରୁ ମାଇକେଲ ବ୍ରେସଓ୍ବେଲ ଓ ମିଚେଲ ସାଣ୍ଟନର ଦୁଇଟି ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ନ୍ୟୁଜିଲାଣ୍ଡ: ୨୦ ଓଭରରେ ୧୭୬/୬ (ଡାରିଲ ମିଚେଲ-୫୯*, ଡେଭନ୍ କନଓ୍ବେ-୫୨, ଫିନ୍ ଆଲେନ୍-୩୫, ଓ୍ବାଶିଂଟନ୍ ସୁନ୍ଦର-୨/୨୨, ଶିବମ ମାଭି-୧/୧୯, କୁଲଦୀପ ଯାଦବ-୧/୨୦)।
ଭାରତ: ୨୦ ଓଭରରେ ୧୫୫/୯ (ଓ୍ବାଶିଂଟନ୍ ସୁନ୍ଦର-୫୦, ସୂର୍ଯ୍ୟକୁମାର ଯାଦବ-୪୭, ହାର୍ଦ୍ଦିକ ପାଣ୍ଡ୍ୟା-୨୧, ମିଚେଲ ସାଣ୍ଟନର-୨/୧୧, ମାଇକେଲ ବ୍ରେସଓ୍ବେଲ-୨/୩୧, ଲୋକି ଫର୍ଗୁସନ୍-୨/୩୩)।
