ଢାକା, ୭ା୨(ପି.ଟି.): ନେହାଙ୍କ ଡବଲ୍ ଗୋଲ୍ ବଳରେ ଭାରତ ଏହାର ଶେଷ ଲିଗ୍ ମ୍ୟାଚରେ ନେପାଳକୁ ୪-୦ ଗୋଲ୍ରେ ପରାସ୍ତ କରି ଏଠାରେ ଚାଲିଥିବା ୧୯ ବର୍ଷରୁ କମ୍ ସାଫ୍ ମହିଳା ଫୁଟ୍ବଲ ଚାମ୍ପିୟନଶିପ୍ର ଫାଇନାଲରେ ପ୍ରବେଶ କରିଛି। ଗୁରୁବାର ଖେଳାଯିବାକୁ ଥିବା ଟାଇଟଲ ମୁକାବିଲାରେ ଭାରତ ଆୟୋଜକ ତଥା ଗତଥରର ଚାମ୍ପିୟନ ବାଂଲାଦେଶକୁ ଭେଟିବ। ପ୍ରତିଯୋଗିତାରେ ଭାରତ ଏହାର ପ୍ରଥମ ଲିଗ୍ ମ୍ୟାଚରେ ଭୁଟାନକୁ ୧୦-୦ ଗୋଲ୍ରେ ପରାସ୍ତ କରିବା ପରେ ବାଂଲାଦେଶଠାରୁ ୦-୧ ଗୋଲ୍ରେ ପରାଜିତ ହୋଇଥିଲା। ମଙ୍ଗଳବାର ପ୍ରଥମାର୍ଦ୍ଧ ଖେଳ ଗୋଲ୍ ଶୂନ୍ୟ ଭାବେ ଶେଷ ହୋଇଥିଲା। ଦ୍ୱିତୀୟାର୍ଦ୍ଧରେ ଭାରତୀୟ ଖେଳାଳିମାନେ ପ୍ରଭାବୀ ପ୍ରଦର୍ଶନ କରି ୪ ଗୋଲ୍ ସ୍କୋର କରିବାରେ ସମର୍ଥ ହୋଇଥିଲେ। ଦଳ ତରଫରୁ ନେହା ୫୪ତମ ଏବଂ ୮୦ତମ ମିନିଟ୍ରେ ଗୋଲ୍ ସ୍କୋର କରିଥିବା ବେଳେ ସୁଲଞ୍ଜନା ରାଉଳ (୮୫ତମ ମିନିଟ) ଓ ରେମରୁଆଟପୁଇ କୋଲ୍ନୀ (୯୦+୩) ଅନ୍ୟ ଦୁଇଟି ଗୋଲ୍ ଦେଇଥିଲେ। ଓଡ଼ିଶାର ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ମହିଳା ଫୁଟବଲ ତାରକା ଶ୍ରଦ୍ଧାଞ୍ଜଳି ସାମନ୍ତରାୟ ଭାରତୀୟ ଦଳର ସହକାରୀ କୋଚ୍ ଦାୟିତ୍ୱ ନିର୍ବାହ କରୁଛନ୍ତି।