କୋଲକାତା, ୧୭।୯(ପି.ଟି.): ଲିଜେଣ୍ଡ୍ସ ଲିଗ୍ କ୍ରିକେଟ ଟୁର୍ନାମେଣ୍ଟ ପୂର୍ବରୁ ଶୁକ୍ରବାର ଏଠାରେ ଅନୁଷ୍ଠିତ ଏକ ସ୍ବତନ୍ତ୍ର ଚ୍ୟାରିଟି ମ୍ୟାଚରେ ଇଣ୍ଡିଆ ମହାରାଜାସ ୬ ଉଇକେଟରେ ଓ୍ବାଲର୍ଡ ଜାଏଣ୍ଟ୍ସକୁ ପରାସ୍ତ କରିଛି। ଓ୍ବାଲର୍ଡ ଜାଏଣ୍ଟ୍ସ ୨୦ ଓଭରରେ ୮ ଉଇକେଟ ହରାଇ ୧୭୦ ରନ କରିଥିବାବେଳେ ଇଣ୍ଡିଆ ମହାରାଜାସ ୧୮.୪ ଓଭରରେ ୪ ଉଇକେଟ ହରାଇ ୧୭୫ ରନ ସଂଗ୍ରହ କରି ନେଇଥିଲା। ଶନିବାରଠାରୁ ଲିଜେଣ୍ଡ୍ସ ଲିଗ୍ କ୍ରିକେଟ ଆରମ୍ଭ ହେବ।
ଅର୍ଦ୍ଧଶତକ ହାସଲ ସହ ଅପରାଜିତ ରହି ଇଣ୍ଡିଆ ମହାରାଜାସ ବିଜୟକୁ ସହଜ କରିଥିଲେ ୟୁସୁଫ ପଠାନ। ଇଣ୍ଡିଆନ ପ୍ରିମିୟର ଲିଗ୍ରେ ସନ୍ରାଇଜର୍ସ ହାଇଦ୍ରାବାଦ ବିପକ୍ଷରେ ୧୫ ବଲ୍ରୁ ଦ୍ୱିତୀୟ ଦ୍ରୁତତମ ଅର୍ଦ୍ଧଶତକ ହାସଲ କରିଥିବା ୟୁସୁଫ ଏଠାରେ ସେହି ଫର୍ମରେ ନଜରକୁ ଆସିଥିଲେ। ସେ ୩୫ ବଲ୍ରୁ୫ ଚୌକା ଓ ୨ ଛକା ସହାୟତାରେ ୫୦ ରନକରି ଅପରାଜିତ ରହିଥିଲେ। ତାଙ୍କ ସହ ଇରଫାନ ପଠାନ ୯ ବଲ୍ରୁ ୨୦ (୩ ଛକା) ରନ କରି ଅପରାଜିତ ଥିଲେ। ଟପ୍ ଅର୍ଡରରେ ତନ୍ମୟ ଶ୍ରୀବାତ୍ସବ ସର୍ବାଧିକ ୫୪ (୩୯ ବଲ, ୮ ଚୌକା, ୧ ଛକା) ରନ କରିଥିଲେ। ଓ୍ବାଲର୍ଡ ଜାଏଣ୍ଟ୍ସ ପକ୍ଷରୁ ଟିମ୍ ବ୍ରେସନାନ ସର୍ବାଧିକ ୩ଟି ଉଇକେଟ ନେଇଥିଲେ। ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଓ୍ବାଲର୍ଡ ଜାଏଣ୍ଟ୍ସ। ଓପନର କେଭିନ ଓ’ବ୍ରାଏନ (୫୨ ରନ, ୩୧ ବଲ, ୯ ଚୌକା, ୧ ଛକା)ଙ୍କ ଅର୍ଦ୍ଧଶତକ ଏବଂ ମିଡିଲ ଅର୍ଡରରେ ଦୀନେଶ ରାମଦିନଙ୍କ ଦ୍ରୁତ ୪୨ (୨୯ ବଲ, ୫ ଚୌକା, ୧ ଛକା) ରନ ବଳରେ ଓ୍ବାଲର୍ଡ ଜାଏଣ୍ଟ୍ସ ସମ୍ମାନଜନକ ସ୍କୋର କରିବାକୁ ସମର୍ଥ ହୋଇଥିଲା। ଭାରତ ପକ୍ଷରୁ ପଙ୍କଜ ସିଂ ୪ ଓଭରରେ ଗୋଟିଏ ମେଡେନ ନେଇ ୨୬ ରନ ବିନିମୟରେ ୫ ଉଇକେଟ ନେଇଥିବାରୁ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ହରଭଜନ ଇଣ୍ଡିଆ ମହାରାଜାସ ଓ ଜ୍ୟାକ୍ସ କାଲିସ ଓ୍ବାଲର୍ଡ ଜାଏଣ୍ଟ୍ସ ଦଳର ନେତୃତ୍ୱ ନେଇଥିଲେ।
