ନୂଆଦିଲ୍ଲୀ,୨୨।୨ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଭାରତ ଆଉ କଠୋର ପଦକ୍ଷେପ ନେବାକୁ ଭୟ କରୁନାହିଁ ବୋଲି ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା କହିଛନ୍ତି। ସେ କହିଛନ୍ତି ଯେ ପ୍ରଧାନମନ୍ତ୍ରୀ ୟ ବିଶ୍ୱରେ ଦେଶର ଭାବମୂର୍ତ୍ତିକୁ ପରିବର୍ତ୍ତନ କରିଛନ୍ତି। ଦେଶର ଭାବମୂର୍ତ୍ତିକୁ ବଦଳାଇବା ପାଇଁ ପ୍ରଧାନମନ୍ତ୍ରୀଙ୍କ ଉଦ୍ୟମ ବିଷୟରେ ଖୁବ କମ ଲେଖାଯାଇଛି। ‘ମୋଦି: ଶେପିଂ ଏ ଗ୍ଲୋବାଲ ଅର୍ଡର ଇନ ଫ୍ଲକ୍ସ’ ଶୀର୍ଷକ ଏକ ପୁସ୍ତକ ପ୍ରକାଶ କରି ନଡ୍ଡା କହିଛନ୍ତି ଯେ ପୂର୍ବର ସରକାର ଭୋଟବ୍ୟାଙ୍କ ରାଜନୀତି ଯୋଗୁ ଇସ୍ରାଏଲ ଗସ୍ତ ପାଇଁ ସାହସ କରି ପାରୁ ନ ଥିଲେ।
ଭୋଟ ବ୍ୟାଙ୍କ ରାଜନୀତିର ବାଧ୍ୟତାମୂଳକ କାରଣରୁ ଭାରତ ଇସ୍ରାଏଲ ସହ ସମ୍ପର୍କକୁ ମଜବୁତ ହୋଇ ପାରି ନ ଥିଲା। ବର୍ତ୍ତମାନ ପ୍ରଧାନମନ୍ତ୍ରୀ ମୋଦି ଇସ୍ରାଏଲ ଏବଂ ପାଲେଷ୍ଟାଇନ ଗସ୍ତରେ ଯାଇ ସାରିଛନ୍ତି। ଦୁଇ ଭିନ୍ନ ଦେଶ ସହ ସମ୍ପର୍କକୁ କିପରି ମଜବୁତ କରାଯିବ ତାହା ଭାରତ ଦର୍ଶାଇଛି। ପ୍ରଧାନମନ୍ତ୍ରୀ ମଧ୍ୟ ପାକିସ୍ତାନକୁ ସଫଳତାର ସହ ପରିଚାଳନା କରିଛନ୍ତି।
ମୋଦି କ୍ଷମତାକୁ ଆସିବା ପୂର୍ବରୁ ଦେଶର ଭାବମୂର୍ତ୍ତି କ’ଣ ଥିଲା ତାହା ବୁଝିବାର ଆବଶ୍ୟକତା ରହିଛି । ଅର୍ଥନୀତି ହ୍ରାସ ପାଉଥିଲା ଏବଂ ଦେଶ ଏକ ଦୁର୍ନୀତିଗ୍ରସ୍ତ ଦେଶ ଭାବରେ ଜଣାଶୁଣା ଥିଲା। ଦେଶରେ ବାରମ୍ବାର ଆତଙ୍କବାଦୀ ଆକ୍ରମଣ ହେଉଥିଲା ଏବଂ ସ୍ଥିର ସରକାରର ଅଭାବ ରହିଥିଲା। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଦେଶର ପ୍ରଧାନମନ୍ତ୍ରୀ ପଦର ଗୁରୁତ୍ୱ ହ୍ରାସ ପାଉଥିଲା। ମୋଦି ପ୍ରାୟ ୬୦ଟି ଦେଶ ଗସ୍ତ କରିଛନ୍ତି। ଦେଶର ପୁରୁଣା ସହଯୋଗୀମାନଙ୍କ ସହ ସମ୍ପର୍କକୁ ମଜବୁତ କରୁଥିବାବେଳେ ସେ ନୂତନ ସହଭାଗିତା ଗଠନ କରିଥିଲେ। ପ୍ରଧାନମନ୍ତ୍ରୀ ସମସ୍ତ ପଡୋଶୀ ଦେଶ ଗସ୍ତ କରିଛନ୍ତି ଏବଂ ସେମାନଙ୍କ ସହ ସମ୍ପର୍କକୁ ମଜବୁତ କରିଛନ୍ତି।