ଭୁବନେଶ୍ୱର,୮।୮(ସତ୍ୟଜିତ୍ ରାଉତ): ଅତି କମ୍ ସମୟ ମଧ୍ୟରେ ବହୁଗୁଣ ଅର୍ଥ ଲାଭର ପ୍ରଲୋଭନ ଦେଖାଇ ଦେଶବ୍ୟାପୀ ୧ ହଜାର କୋଟିରୁ ଊର୍ଦ୍ଧ୍ୱ ଟଙ୍କାର କ୍ରିପ୍ଟୋ ପୋଞ୍ଜି ସ୍କାମ୍ ହୋଇଛି। ‘ଏସ୍ଟିଏ କ୍ରିପ୍ଟୋ ଟୋକନ୍’ ନାଁରେ ଲୋକଙ୍କୁ ଭୁଆଁ ବୁଲାଯାଇ ଏହି ବଡ଼ ଠକେଇ କରାଯାଇଛି। ଓଡ଼ିଶା କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ‘ଏସ୍ଟିଏ’ ଭାରତ ମୁଖ୍ୟ ଗୁର୍ତେଜ୍ ସିଂ ସିଦ୍ଧୁ ଏବଂ ଓଡ଼ିଶା ମୁଖ୍ୟ ଭଦ୍ରକର ନୀରୋଦ ଦାସଙ୍କୁ ଗିରଫ କରିବା ସହ ସ୍କାମ୍ର ରହସ୍ୟ ଉନ୍ମୋଚନ କରିଛି। ପଞ୍ଜାବ ଫରିଦାକୋଟ୍ରେ ଗୁର୍ତେଜ୍ଙ୍କ ଘର। ଶୁକ୍ରବାର ରାଜସ୍ଥାନ ଶ୍ରୀଗଙ୍ଗାନଗରରୁ ତାଙ୍କୁ ଗିରଫ କରାଯିବା ପରେ ସ୍ଥାନୀୟ କୋର୍ଟରେ ହଜାର କରାଯାଇଥିଲା। ସେଠାରୁ ଗୁର୍ତେଜ୍ଙ୍କୁ ୭ଦିନିଆ ଟ୍ରାଞ୍ଜିଟ୍ ରିମାଣ୍ଡରେ ଓଡ଼ିଶା ଅଣାଯାଇ ସୋମବାର କଟକ ଓପିଆଇଡି କୋର୍ଟକୁ ଚାଲାଣ କରାଯାଇଛି। ସେହିଭଳି ଓଡ଼ିଶା ମୁଖ୍ୟ ନିରୋଦଙ୍କୁ ରବିବାର କୋର୍ଟଚାଲାଣ ପରେ ଜେଲକୁ ପଠାଇ ଦିଆଯାଇଛି। ଇଓଡବ୍ଲ୍ୟୁ ସୂଚନା ଅନୁଯାୟୀ, ଏହି ସ୍କାମ୍ରେ ଓଡ଼ିଶା ସମେତ ପଞ୍ଜାବ, ରାଜସ୍ଥାନ, ବିହାର, ଝାଡ଼ଖଣ୍ଡ, ହରିୟାଣା, ଦିଲ୍ଲୀ, ମଧ୍ୟପ୍ରଦେଶ, ମହାରାଷ୍ଟ୍ର ଓ ଆସାମର ୨ ଲକ୍ଷ ଲୋକ ଫସି ୧ ହଜାର କୋଟିରୁ ଊର୍ଦ୍ଧ୍ୱ ଟଙ୍କା ନିବେଶ କରିଛନ୍ତି। ଏପରିକି ଓଡ଼ିଶାର ଭଦ୍ରକ, ବାଲେଶ୍ୱର, ଭୁବନେଶ୍ୱର, ମୟୂରଭଞ୍ଜ, ଯାଜପୁର, କେନ୍ଦ୍ରାପଡ଼ା ଆଦି ଜିଲାର ୧୦ ହଜାର ଲୋକ ନିବେଶ କରି ଠକେଇର ଶିକାର ହୋଇଛନ୍ତି।
ଏସ୍ଟିଏ (ସୋଲାର୍ ଟେକ୍ନୋ ଆଲିଆନ୍ସ)କୁ ୨୦୨୧ରେ ଅଭିଯୁକ୍ତମାନେ ଲଞ୍ଚ୍ କରିଥିଲେ। ୟୁରୋପ୍ର ଡେଭିଡ୍ ଗେଜ୍ ଏହାର ଗ୍ଲୋବାଲ୍ ମୁଖ୍ୟ ଥିବାବେଳେ ଗୁର୍ତେଜ୍ ଭାରତ ମୁଖ୍ୟ ଅଛନ୍ତି। ସେମାନେ ଆର୍ବିଆଇ ଅନୁମତି ବିନା ଲୋକଙ୍କଠାରୁ ଅର୍ଥ ଯୋଗାଡ଼ କରୁଥିଲେ। ଗୁର୍ତେଜ୍ ଏସ୍ଟିଏ ୱେବ୍ସାଇଟ୍ ଓ ସୋସିଆଲ୍ ମିଡିଆ ଆକାଉଣ୍ଟକୁ ବ୍ୟବହାର କରି ଲୋକଙ୍କୁ ଫସାଉଥିଲେ। ଏପରିକି ବିଭିନ୍ନ ୟୁଟ୍ୟୁବ୍ ଚ୍ୟାନେଲ୍ ଜରିଆରେ ଏହି ଏସ୍ଟିଏ ଟୋକନ୍ର ପ୍ରଚାର ପ୍ରସାର କରୁଥିଲେ। ଗୁର୍ତେଜ୍ ନିଜକୁ ଏମ୍ଏଲ୍ଏମ୍ ଗୁରୁ, ଲାଇଫ୍ କୋଚ୍, ମୋଟିଭେଶନାଲ୍ ସ୍ପିକର୍ ବୋଲି କହୁଥିଲେ। ଡେଭିଡ୍ ଓ ଗୁର୍ତେଜ୍ ଓଡ଼ିଶା ସମେତ ଭାରତର ବିଭିନ୍ନ ସ୍ଥାନକୁ ଯାଇ କାର୍ଯ୍ୟକ୍ରମ କରି ସଦସ୍ୟ ଯୋଗାଡ଼ କରିଥିଲେ। ଏହି ସ୍କିମ୍ରେ ସଦସ୍ୟ ହୋଇ ଟଙ୍କା ନିବେଶ କରିବା ପରେ ଦିନକୁ ୨୦ରୁ ୩ ହଜାର ଡଲାର ରୋଜଗାର କରିପାରିବେ ବୋଲି ଲୋଭ ଦେଖାଯାଉଥିଲା। ଏପରିକି ବୋନସ୍ ଓ ରେଫରାଲ ପାଇଁ ଲିଡରଶିପ୍ ନାଁ ମଧ୍ୟ ଦିଆଯାଉଥିଲା। ପୂର୍ବରୁ ଗୁର୍ତେଜ୍ ଭଦ୍ରକର ନୀରୋଦଙ୍କୁ ଓଡ଼ିଶା ମୁଖ୍ୟ କରି ଏକାଧିକ ସଦସ୍ୟ ଯୋଗାଡ଼ କରିଥିଲେ। ଓଡ଼ିଶାର ରୀନା ବେହେରା ନାମ୍ନୀ ମହିଳାଙ୍କ ଅଭିଯୋଗକ୍ରମେ ଗତମାସରେ ଇଓଡବ୍ଲ୍ୟୁ ଏକ ମାମଲା (ନଂ.୨୨/୨୦୨୩) ରୁଜୁ କରି ତଦନ୍ତ କରୁଛି। ଏହାର ସଦସ୍ୟମାନେ ପରସ୍ପରକୁ ‘ଜୟ ଏସ୍ଟିଏ’ କହି ସମ୍ବୋଧାନ କରୁଥିଲେ ବୋଲି ଇଓଡବ୍ଲ୍ୟୁ ଜାଣିବାକୁ ପାଇଛି।