ଇସଲାମାବାଦ,୩।୪: ସୁଧୁରୁନି ପାକିସ୍ତାନ। ପୁଣିଥରେ ପାକିସ୍ତାନ ଅସ୍ତ୍ରବିରତି ଉଲ୍ଲଂଘନ କରିବାକୁ ଚେଷ୍ଟା କରିଛି। ବୁଧବାର ବିଳମ୍ବିତ ରାତିରେ ପୁଞ୍ଚର କୃଷ୍ଣା ଘାଟି ସେକ୍ଟରରେ ଭାରତୀୟ ସେନାର ଆଗୁଆ ପୋଷ୍ଟଗୁଡ଼ିକୁ ଟାର୍ଗେଟ କରି ପାକିସ୍ତାନୀ ସେନା ପୁଣି ଥରେ ଗୁଳି ଚାଳନା କରିଛି।
ପାକିସ୍ତାନ ସେନାର ଅସ୍ତ୍ରବିରତି ଉଲ୍ଲଂଘନର ଜବାବ ପୁଣି ଥରେ ଭାରତୀୟ ସେନା ଦେଇଛି। ପ୍ରାୟ ୨୦ ମିନିଟ ଧରି ଚାଲିଥିବା ଗୁଳିଚାଳନାରେ କୌଣସି ପ୍ରକାରର କ୍ଷତି ହୋଇନାହିଁ। ପାକିସ୍ତାନ ଲଗାତାର କୃଷ୍ଣା ଘାଟି ସେକ୍ଟରକୁ ଟାର୍ଗେଟ କରୁଥିବାରୁ, ଭାରତୀୟ ସେନା ଏହି ଅଞ୍ଚଳରେ ସତର୍କ ରହିଛି।
ଏହା ପୂର୍ବରୁ ଏପ୍ରିଲ ୧ ତାରିଖରେ, ପାକିସ୍ତାନ ଜମ୍ମୁ ଓ କଶ୍ମୀରର ପୁଞ୍ଚ ଜିଲାର କୃଷ୍ଣା ଘାଟି (KG) ସେକ୍ଟରରେ ଅସ୍ତ୍ରବିରତି ଉଲ୍ଲଂଘନ କରି ଭାରତୀୟ ପୋଷ୍ଟ ଉପରେ ଗୁଳି ଚଳାଇଥିଲା। ମଙ୍ଗଳବାର ଭାରତୀୟ ସେନା ପଡ଼ୋଶୀ ଦେଶର ଏହି ଘୃଣ୍ୟ କାର୍ଯ୍ୟର ଉଚିତ ଜବାବ ଦେଇଛି। କୃଷ୍ଣା ଘାଟି ବ୍ରିଗେଡ ଅଧୀନରେ ଥିବା ଭାରତୀୟ ସେନାର ଏକ ବାଟାଲିୟନ (ନାଙ୍ଗୀ ଟେକ୍ରି ବାଟାଲିୟନ) ପାକିସ୍ତାନୀ ଆକ୍ରମଣର ଉପଯୁକ୍ତ ଜବାବ ଦେଇଥିଲା। ଏହା ସହିତ କୃଷ୍ଣା ଘାଟିରେ ଭାରତୀୟ ସେନା ସତର୍କ ସ୍ଥିତିରେ ଅଛି।
ତଥାପି ଏହା ପ୍ରଥମ ଥର ନୁହେଁ ଯେ ପାକିସ୍ତାନ କୃଷ୍ଣା ଘାଟି ସେକ୍ଟରକୁ ଟାର୍ଗେଟ କରିଛି। ପୁଞ୍ଚର କୃଷ୍ଣାଘାଟି ସେକ୍ଟରରେ ପୂର୍ବରୁ ଅନେକ ଥର ଅସ୍ତ୍ରବିରତି ଉଲ୍ଲଂଘନ ହୋଇଛି। ପାକିସ୍ତାନ ଦ୍ୱାରା ଏପରି କାର୍ଯ୍ୟକଳାପ ନିରନ୍ତର କରାଯାଉଛି, ଯାହାର ଭାରତୀୟ ସେନା ପ୍ରତ୍ୟେକ ଥର କଡ଼ା ଜବାବ ଦେଉଛି ଏବଂ ପାକିସ୍ତାନକୁ କ୍ଷତିର ସମ୍ମୁଖୀନ ହେବାକୁ ପଡୁଛି।
