ନୂଆଦିଲ୍ଲୀ,୧୫।୧୨: ପୁଣି ଭାରତ ଏବଂ ପାକିସ୍ତାନ ମଧ୍ୟରେ ମହାମୁକାବିଲା ଦେଖିବାକୁ ମିଳିବ। ଏଥର ପୁରୁଷ ନୁହେଁ,ମହିଳା କ୍ରିକେଟ ଦଳ ସାମ୍ନାସାମ୍ନି ହେବେ। ଆସନ୍ତା ବର୍ଷ ମାର୍ଚ୍ଚ ୬ରେ ଭାରତ ଏବଂ ପାକିସ୍ତାନ ମଧ୍ୟରେ ଆଇସିସି ମହିଳା କ୍ରିକେଟ ବିଶ୍ୱକପ ୨୦୨୨ ମ୍ୟାଚ ଖେଳାଯିବ। ଏହି ଟୁର୍ନାମେଣ୍ଟରେ ଭାରତୀୟ ଦଳ ପାକିସ୍ତାନ ବିପକ୍ଷରେ ଅଭିଯାନ ଆରମ୍ଭ କରିବ। ମାର୍ଚ୍ଚ ୪ରୁ ଏହି ଟୁର୍ନାମେଣ୍ଟ ଆରମ୍ଭ ହେବ। ପ୍ରଥମ ମ୍ୟାଚ ଆୟୋଜକ ନ୍ୟୁଜିଲାଣ୍ଡ ଏବଂ ୱେଷ୍ଟଇଣ୍ଡିଜ ମଧ୍ୟରେ ଖେଳାଯିବ। ଏହା ପରେ ଇଂଲଣ୍ଡ ଏବଂ ଅଷ୍ଟ୍ରେଲିଆର ଦଳ ହାମିଲଟନରେ ମୁହାଁମୁହିଁ ହେବେ। ୩୧ ଦିନରେ ମୋଟ ୩୧ଟି ମ୍ୟାଚ ଖେଳାଯିବ।
୮ଟି ଦଳ ଟାଇଟେଲ ପାଇଁ ପଡ଼ିଆକୁ ଓହ୍ଲାଇବେ। ଆଇସିସି ଅନୁଯାୟୀ ଅଷ୍ଟ୍ରେଲିଆ, ଇଂଲଣ୍ଡ, ଦକ୍ଷିଣ ଆଫ୍ରିକା ଏବଂ ଭାରତ ଆଇସିସି ମହିଳା ଚାମ୍ପିଅନସିପ ୨୦୧୭-୨୦୨୦ରେ ସେମାନଙ୍କ ର଼୍ୟାଙ୍କକୁ ଆଧାର କରି ଇଭେଣ୍ଟ ପାଇଁ ଯୋଗ୍ୟତା ଅର୍ଜନ କରିଥିବାବେଳେ ନ୍ୟୁଜିଲାଣ୍ଡ ହୋଷ୍ଟ ଭାବରେ ଯୋଗ୍ୟତା ଅର୍ଜନ କରିଛି। ନିକଟରେ ଅନୁଷ୍ଠିତ ପୁରୁଷ ଟି -୨୦ ବିଶ୍ୱକପରେ ଭାରତୀୟ ଦଳ ପାକିସ୍ତାନ ବିରୋଧରେ ଅଭିଯାନ ଆରମ୍ଭ କରିଥିଲା।
ଆଇସିସି ମହିଳା ବିଶ୍ୱକପ ୨୦୨୨ଏକ ଲିଗ ଫର୍ମାଟରେ ଖେଳାଯିବ। ଏଠାରେ ସମସ୍ତ ୮ ଦଳ ଥରେ ମୁହାଁମୁହିଁ ହେବେ। ଲିଗ୍ର ଶ୍ରେଷ୍ଠ ୪ ଦଳ ମଧ୍ୟରେ ସେମିଫାଇନାଲ ମ୍ୟାଚ ଖେଳାଯିବ। ବିଶ୍ୱକପ୍ର ପ୍ରଥମ ସେମିଫାଇନାଲ ମ୍ୟାଚ ୱେଲିଙ୍ଗଟନ୍ରେ ୨୦ ମାର୍ଚ୍ଚରେ ଖେଳାଯିବ। ଦ୍ୱିତୀୟ ସେମିଫାଇନାଲ ମ୍ୟାଚ ୩୧ ମାର୍ଚ୍ଚରେ ହେଗ୍ଲେ ଓଭାଲରେ ଖେଳାଯିବ। ଆଇସିସି ମହିଳା ବିଶ୍ୱକପ ୨୦୨୨ ଟାଇଟେଲ ମ୍ୟାଚ ୩ ଏପ୍ରିଲରେ ଖେଳାଯିବ। ଆଇସିସି ଅନୁଯାୟୀ ଉଭୟ ସେମିଫାଇନାଲ ଏବଂ ଫାଇନାଲ ପାଇଁ ରିଜର୍ଭ ଦିନ ମଧ୍ୟ ରଖାଯାଇଛି।