ନୂଆଦିଲ୍ଲୀ/ଇସଲାମାବାଦ,୧।୧ : ଭାରତ ଏବଂ ପାକିସ୍ତାନ ରବିବାର ଦିନ ନିଜ ନିଜ ଜେଲରେ ରହୁଥିବା ସାଧାରଣ ନାଗରିକ କଏଦୀ ଏବଂ ମତ୍ସ୍ୟଜୀବୀଙ୍କ ତାଲିକା ପରସ୍ପରକୁ ହସ୍ତାନ୍ତର କରିଛନ୍ତି। ଭାରତରେ ୩୩୯ ପାକିସ୍ତାନୀ ନାଗରିକ ଏବଂ ୯୫ ମତ୍ସ୍ୟଜୀବୀ ଜେଲରେ ଅଛନ୍ତି ବୋଲି ବହିର୍ବ୍ୟାପାର ମନ୍ତ୍ରଣାଳୟ ସୂଚନା ଦେଇଛି। ଏହି ବନ୍ଦୀମାନଙ୍କ ତାଲିକା ରବିବାର ଦିନ ପାକିସ୍ତାନକୁ ହସ୍ତାନ୍ତର କରାଯାଇଛି। ଏହା ସହିତ ଉଭୟ ଦେଶ ମଧ୍ୟ ଏହି ବନ୍ଦୀମାନଙ୍କୁ ଶୀଘ୍ର ମୁକ୍ତ କରିବା ପାଇଁ ପଦକ୍ଷେପ ନେବାକୁ ରାଜି ହୋଇଛନ୍ତି।
ମନ୍ତ୍ରଣାଳୟ କହିଛି ଯେ ଏକ ଚୁକ୍ତିନାମା ଅନୁଯାୟୀ ଉଭୟ ଦେଶ ପ୍ରତିବର୍ଷ ଜାନୁଆରୀ ୧ ଏବଂ ଜୁଲାଇ ୧ ରେ କୂଟନୈତିକ ଚ୍ୟାନେଲ ମାଧ୍ୟମରେ ବନ୍ଦୀ ଥିବା ସାଧାରଣ ନାଗରିକ ଏବଂ ମତ୍ସ୍ୟଜୀବୀଙ୍କ ତାଲିକା ପରସ୍ପରକୁ ହସ୍ତାନ୍ତର କରିଥାନ୍ତି।
ପାକିସ୍ତାନ ଦାଖଲ କରିଥିବା ତାଲିକା ଅନୁଯାୟୀ ୫୧ ଭାରତୀୟ ନାଗରିକ ଏବଂ ୬୫୪ ମତ୍ସ୍ୟଜୀବୀ ପାକିସ୍ତାନୀ ଜେଲରେ ରହିଛନ୍ତି ବୋଲି ପାକିସ୍ତାନ ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି। ଏହି ବନ୍ଦୀମାନଙ୍କୁ ଶୀଘ୍ର ମୁକ୍ତ କରିବାକୁ ଭାରତ ଦାବି କରିଛି। ଏଥିମଧ୍ୟରୁ 631 ଜଣ ଭାରତୀୟ ମତ୍ସ୍ୟଜୀବୀ ଏବଂ ଦୁଇ ଜଣ ଭାରତୀୟ ନାଗରିକ ନିଜର ଦଣ୍ଡ ଅବଧି ପୂରଣ କରି ସାରିଛନ୍ତି। ଏଭଳି ପରିସ୍ଥିତିରେ ପାକିସ୍ତାନରୁ ସେମାନଙ୍କ ମୁକ୍ତିକୁ ତ୍ୱରାନୱିତ କରିବାକୁ ଭାରତ ପକ୍ଷରୁ ଦାବି କରାଯାଇଛି।