ଜୋହର ବାହରୁ (ମାଲେସିଆ), ୨୮ା୧୦: ସୁଲତାନ ଜୋହର କପ୍ ଜୁନିୟର ପୁରୁଷ ହକି ଟୁର୍ନାମେଣ୍ଟର ଉଦ୍ଘାଟନୀରେ ଗତଥରର ଚାମ୍ପିୟନ ଭାରତ ଏହାର ପାମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନ ବିପକ୍ଷ ମ୍ୟାଚ ୩-୩ ଗୋଲ୍ରେ ଡ୍ର ରଖିଛି। ଶୁକ୍ରବାର ଖେଳାଯାଇଥିବା ଏହି ମ୍ୟାଚରେ ଭାରତ ତରଫରୁ ଅମନଦୀପ ଲାକ୍ରା (୩୦ତମ ମିନିଟ), ଆଦିତ୍ୟ ଅର୍ଜୁନ ଲାଲାଗେ (୫୬ତମ) ଓ ଉତ୍ତମ ସିଂ (୫୯ତମ) ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ଅନ୍ୟପକ୍ଷରେ ପାକିସ୍ତାନ ପକ୍ଷରୁ ଅର୍ବାଜ ଅହମଦ (୩୧ତମ ଓ ୫୮ତମ) ଦୁଇଟି ଏବଂ ଅବଦୁଲ ଶାହିଦ (୪୯ତମ) ଗୋଟିଏ ଗୋଲ ଦେଇଥିଲେ। ଡିସେମ୍ବରରେ ମାଲେସିଆରେ ପୁରୁଷ ଜୁନିୟର ବିଶ୍ୱକପ୍ ଖେଳାଯିବାକୁ ଥିବାରୁ ଦୁଇ ଦଳ ଏହି ମ୍ୟାଚରେ ଉଭୟଙ୍କ ବଳ କଷିବାକୁ ଚେଷ୍ଟା କରିଥିଲେ। ଭାରତ ଏହାର ପରବର୍ତ୍ତୀ ମ୍ୟାଚ ଶନିବାର ଆୟୋଜକ ମାଲେସିଆ ବିପକ୍ଷରେ ଖେଳିବ।