ବ୍ରହ୍ମପୁର ଅଫିସ,୨୩।୧୦: ଭାରତ ଓ ପାକିସ୍ତାନ ମଧ୍ୟରେ ରବିବାର ଅନୁଷ୍ଠିତ ଟି-୨୦ ବିଶ୍ୱକପ୍ ମ୍ୟାଚ୍କୁ ନେଇ ବ୍ରହ୍ମପୁର ସହରର କ୍ରିକେଟପ୍ରେମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ସହରସ୍ଥିତ ପାୟଲ ସିନେମା ହଲ୍ରେ ପ୍ରଥମକରି ବଡ଼ ପରଦାରେ ଲାଇଭ୍ ମ୍ୟାଚ୍ ପ୍ରଦର୍ଶିତ ହୋଇଥିଲା। ଅପରାହ୍ନ ୧.୩୦ରେ ମ୍ୟାଚ୍ ଆରମ୍ଭ ହୋଇଥିବା ବେଳେ ହଲ୍ରେ ଏହା ଦେଖିବାକୁ କ୍ରିକେଟପ୍ରେମୀଙ୍କ ବେଶ୍ ଭିଡ଼ ଜମିଥିଲା।
ହଲ୍ ପକ୍ଷରୁ ମ୍ୟାଚ୍ ନିମନ୍ତେ ଟିକେଟ ପାଇଁ ସ୍ବତନ୍ତ୍ର କାଉଣ୍ଟର କରାଯାଇଥିଲା। ବାଲ୍କୋନି ଟିକେଟ ମୂଲ୍ୟ ୨୦୦ ଓ ଫାଷ୍ଟ କ୍ଲାସ୍ ୧୦୦ ଟଙ୍କା ରଖାଯାଇଥିଲା। ଟିକେଟ ମୂଲ୍ୟ ବୃଦ୍ଧି ସତ୍ତ୍ୱେ କ୍ରିକେଟ୍ପ୍ରେମୀଙ୍କ ଗହଳି ଜମିଥିଲା। ପ୍ରାୟ ୧୦୦ ଦର୍ଶକ ହଲ୍ ପରିସରରେ ମ୍ୟାଚ୍ ଉପଭୋଗ କରିଥିଲେ। ଟିମ୍ ଇଣ୍ଡିଆର ବିଜୟ ପରେ ଦର୍ଶକ ବିଜୟ ଉତ୍ସବ ପାଳନ କରିଥିଲେ। ପ୍ରଥମଥର ପାଇଁ ହଲ୍ ମାଲିକଙ୍କ ପକ୍ଷରୁ ଏଭଳି ପଦକ୍ଷେପକୁ ବହୁ କ୍ରିକେଟ୍ପ୍ରେମୀ ଖୁବ୍ ପ୍ରଶଂସା କରିଛନ୍ତି। ବ୍ରହ୍ମପୁରରେ କ୍ରିକେଟ୍ପ୍ରେମୀଙ୍କୁ ଦୃଷ୍ଟିରେ ରଖି ଏଭଳି ବଡ଼ ପରଦାରେ ମ୍ୟାଚ୍ ପ୍ରଦର୍ଶନ କରାଯାଇଥିବା ପାୟଲ ହଲ୍ ମ୍ୟାନେଜର କହିଛନ୍ତି।
