ଇସଲାମାବାଦ୍,୨୫।୩: ଭାରତ ପାକିସ୍ତାନ ମଧ୍ୟରେ ପୁଣି କ୍ରିକେଟ ଖେଳ ହେବ। ଏନେଇ ପାକିସ୍ତାନ କ୍ରିକେଟ ବୋର୍ଡ(ପିସିବି) ପକ୍ଷରୁ ସୂଚନା ଦିଆଯାଇଛି। ଦୁଇ ଦେଶ ମଧ୍ୟରେ ଖୁବ୍ ଶୀଘ୍ର ସିରିଜ୍ ଆରମ୍ଭ ହେବ। ଏସମ୍ପର୍କରେ ଇଣ୍ଟର ନ୍ୟାଶନାଲ କ୍ରିକେଟ କାଉନସିଲ୍(ଆଇସିସି)ର ବୈଠକରେ ଚୂଡ଼ାନ୍ତ ତିଷ୍ପତ୍ତି ଗ୍ରହଣ କରାଯିବ ବୋଲି ପିସିବି କହିଛି। ୨୦୦୮ରେ ମୁମ୍ବାଇରେ ଆତଙ୍କବାଦୀ ଆକ୍ରମଣ ପରେ ଭାରତୀୟ କ୍ରିକେଟ ଦଳ ପାକିସ୍ତାନ ଗସ୍ତରେ ଯାଇ ନାହିଁ। ଦୁଇ ଦେଶ ମଧ୍ୟରେ ରାଜନୈତିକ ସଙ୍କଟ ଯୋଗୁ କ୍ରିକେଟ ଖେଳ ସମ୍ଭବ ହୋଇପାରି ନାହିଁ। ଶେଷଥର ପାଇଁ କ୍ରିକେଟ ଖେଳ ୨୦୧୨-୧୩ରେ ହୋଇଥିଲା। ଏହାପରେ କ୍ରିକେଟପ୍ରେମୀ ଦୁଇ ଦେଶ ମଧ୍ୟରେ ହେଉଥିବା ରୋମାଞ୍ଚକର ଖେୂ ଦେଖିବାରୁ ବଞ୍ଚିତ ରହିଛନ୍ତି। ତେବେ ଦୁଇ ଦେଶ ମଧ୍ୟରେ ପୁଣି କ୍ରିକେଟ ଖେଳ ଆରମ୍ଭ ପାଇଁ ପାକିସ୍ତାନ କ୍ରିକେଟ ବୋର୍ଡର ପୂର୍ବତନ ଅଧ୍ୟକ୍ଷ ଜାକା ଅଶରଫ ତିନି ଦିନ ତଳେ ପ୍ରସ୍ତାବ ଦେଇଥିଲେ। ଯଦି ଭାରତ ପାକସ୍ତାନ ନିଜ ନିଜ ଦେଶରେ ମ୍ୟାଚ୍ ଖେଳି ନ ପାରୁଛନ୍ତି ତେବେ ଏହାକୁ ୟୁଏଇ, ଶ୍ରୀଲଙ୍କା, ଦକ୍ଷିଣ ଆଫ୍ରିକା କିମ୍ବା ଅନ୍ୟ ଦେଶରେ ଆୟୋଜନ କରାଯାଇ ପାରିବ ବୋଲି ସେ ପ୍ରସ୍ତାବ ଦେଇଥିଲେ। ଏହା ଦ୍ୱାରା ଦୁଇ ଦେଶ ମଧ୍ୟରେ କ୍ରିକେଟ ସମ୍ପର୍କ ବୃଦ୍ଧି ପାଇବାର ଆଶା ଥିବା ସେ ମତପୋଷଣ କରିଥିଲେ। ଇଣ୍ଟର ନ୍ୟାଶନାଲ କ୍ରିକେଟ କାଉନସିଲ୍ର ପରିବର୍ତ୍ତିତ ନିୟମ ଦ୍ୱାରା ସଦସ୍ୟ ଦେଶ ନିଜ ଇଛା ଅନୁସାରେ ଅନ୍ୟ ଦେଶ ସହିତ କ୍ରିକେଟ ମ୍ୟାଚ୍ ଖେଳି ପାରିବେ। ତେବେ ହେବାକୁ ଥିବା ବୈଠକରେ ଦୁଇଦେଶ ମଧ୍ୟରେ ପୁଣି କ୍ରିକେଟ ଖେଳ ଆୟୋଜନର ବାଟ ଫିଟିବାର ସମ୍ଭାବନା ରହିଥିବା ପିସିବି ପକ୍ଷରୁ କୁହାଯାଇଛି।