କଲମ୍ବୋ,୨୫।୭: ସୂର୍ଯ୍ୟକୁମାର ଯାଦବଙ୍କ ବିସ୍ଫୋରକ ଅର୍ଦ୍ଧଶତକୀୟ ଇନିଂସ ସତ୍ତ୍ୱେ ଟିମ୍ ଇଣ୍ଡିଆ ପ୍ରତିପକ୍ଷ ଶ୍ରୀଲଙ୍କା ଆଗରେ ୧୬୫ ରନ୍ର ଟାର୍ଗେଟ ଛିଡ଼ା କରିଛି। ଏହି ମ୍ୟାଚ୍ ଜରିଆରେ ଟି୨୦ ପଦାର୍ପଣ କରିଛନ୍ତି ପୃଥ୍ବୀ ଶ’ ଓ ବରୁଣ ଚକ୍ରବର୍ତ୍ତୀ।
ପଦାର୍ପଣକାରୀ ବ୍ୟାଟ୍ସମ୍ୟାନ ପୃଥ୍ବୀ ପ୍ରଥମ ବଲରେ ହିଁ ଖାତା ଖୋଲିବା ପୂର୍ବରୁ ଆଉଟ୍ ହୋଇଥିଲେ। ସଞ୍ଜୁ ସାମସନ ପୁଣି ଥରେ ଭଲ ଆରମ୍ଭକୁ ବଡ଼ ସ୍କୋରରେ ପରିବର୍ତ୍ତନ କରିବାରେ ବିଫଳ ହୋଇଛନ୍ତି। ସେ ୨ ଚୌକା ଓ ଗୋଟିଏ ଛକା ସହାୟତାରେ ୨୭ ରନ୍ କରିଥିଲେ। ଏହାପରେ ଅଧିନାୟକ ଶିଖର ଧାଓ୍ବନ (୪୬ ରନ୍, ୪ ଚୌକା ଓ ଗୋଟିଏ ଛକା) ଓ ସୂର୍ଯ୍ୟକୁମାର (୫୦ ରନ୍, ୫ ଚୌକା ଓ ୨ ଛକା) ୩ୟ ଉଇକେଟ ପାଇଁ ଯୋଡ଼ି ଥିଲେ ୬୨ ରନ୍। ଦୁହେଁ ପ୍ୟାଭିଲିୟନ ଫେରିବା ପରେ ଇଶାନ କିଷନ ୨୦ ଓ ହାର୍ଦ୍ଦିକ ପାଣ୍ଡ୍ୟା ୧୦ ରନ୍ କରିଥିଲେ। ଫଳରେ ଭାରତ ୨୦ ଓଭରରେ ୫ ଉଇକେଟ ହରାଇ ୧୬୪ ରନ୍ କରିବାକୁ ସକ୍ଷମ ହୋଇଛି। ଘରୋଇ ଦଳ ପକ୍ଷରୁ ଦୁଶମନ୍ଥା ଚମିରା ଓ ଓ୍ବାନିନ୍ଦୁ ହାସାରଙ୍ଗା ୨ ଲେଖାଏ ଉଇକେଟ ହାତେଇଥିଲେ।