ନୂଆଦିଲ୍ଲୀ,୧୯।୧୨: ଦେଶର ସାମୁହିକ ବିକାଶ ପାଇଁ ଭାରତ ଯୋଜନାବଦ୍ଧ ଭାବେ ଉଦ୍ୟମ ଅବ୍ୟାହତ ରଖିଛି। ବିକାଶ ଧାରା ଜାରି ରଖିବା ଲାଗି ଭାରତ ନୂତନ ରାସ୍ତା ପ୍ରସ୍ତୁତ କରିଛି। ଆସୋଚାମର ସ୍ଥାପନା ସପ୍ତାହ ଉପଲକ୍ଷେ ଆୟୋଜିତ ଏକ କାର୍ଯ୍ୟକ୍ରମରେ ଭିଡ଼ିଓ କନଫରେନ୍ସିଂ ମାଧ୍ୟମରେ ଯୋଗଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଭଳି କହିଛନ୍ତି। ଆତ୍ମନିର୍ଭର ଭାରତ ଗଠନ ସମସ୍ତଙ୍କର ମୁଖ୍ୟ ଲକ୍ଷ୍ୟ ହେବା ଆବଶ୍ୟକ ବୋଲି ସେ କହିଛନ୍ତି। ପୂର୍ବରୁ ନିବେଶକମାନେ ହ୍ବାଏ ଇଣ୍ଡିଆ (ଭାରତ କାହିଁକି) ବୋଲି କହୁଥିବାବେଳେ ଏବେ ଏଥିରେ ବହୁ ପରିବର୍ତ୍ତନ ଘଟିଛି। ଏବେ ନିବେଶକ ହ୍ବାଏ ନଟ୍ ଇଣ୍ଡିଆ( ଭାରତ କାହିଁକି ନୁହେଁ) ବୋଲି କହୁଛନ୍ତିି। ଏହା ଦେଶର ବିକାଶ ଧାରାକୁ ସୂଚିତ କରୁଥିବା ମୋଦି କହିଛନ୍ତି। ଭାରତ ସ୍ଥାନୀୟ ଉତ୍ପାଦକୁ ବିଶ୍ୱସ୍ତରରେ ପହଞ୍ଚାଇବା ଯୋଜନା ନେଇ ଆଗେଇ ଚାଲିଛି। ନୂଆ ଭାରତ ନିଜର ସାମର୍ଥ୍ୟ ଉପରେ ଭରସା ରଖିଛି। ଆମର ଧ୍ୟାନ ଉତ୍ପାଦନ ବୃଦ୍ଧି ଉପରେ କେନ୍ଦ୍ରୀତ ହୋଇ ରହିଥିବା ମୋଦି କହିଛନ୍ତି। ଭାରତର ବିକାଶ କାହାଣୀ ଏବେ ସାରା ଦୁନିଆ ପାଇଁ ଉଦାହରଣ ସୃଷ୍ଟି କରିବା ସହିତ ଏକ ଆତ୍ମବିଶ୍ୱାସ ମଧ୍ୟ ଆଣିଦେଇଛି ବୋଲି ମୋଦି କହିଛନ୍ତି।
