ନୂଆଦିଲ୍ଲୀ,୫।୪: ଲୋକ ସଭା ନିର୍ବାଚନ ପାଇଁ କଂଗ୍ରେସର ଘୋଷଣାପତ୍ରକୁ ନେଇ କଟାକ୍ଷ କରିଛି ଭାଜପା। ରାହୁଲ ଗାନ୍ଧୀଙ୍କୁ ଥାଇଲାଣ୍ଡ ପସନ୍ଦ। ଏଥିଲାଗି ସେଠାକାର ଫଟୋ ଘୋଷଣାପତ୍ରରେ ମୁଦ୍ରିତ ହୋଇଛି। ଦଳ ଜଳ ପରିଚାଳନାର ଫଟୋ ସ୍ଥାନରେ ନ୍ୟୁୟର୍କର ବଫାଲୋ ନଦୀର ଫଟୋ ଲଗାଯାଇଛି। ପରିବେଶ ପରିଷ୍କାର ପରିଚ୍ଛନ୍ନତା ସ୍ଥାନରେ ଯେଉଁ ଫଟୋ ଲାଗିଛି, ତାହା ଥାଇଲାଣ୍ଡର, ଏହାକୁ ରାହୁଲ ବେଶ ପସନ୍ଦ କରନ୍ତି ବୋଲି ଭାଜପା ଜାତୀୟ ମୁଖପାତ୍ର ଡା. ସୁଧାଂଶୁ ତ୍ରିବେଦୀ କଟାକ୍ଷ କରି କହିଛନ୍ତି।
ମୁଖପାତ୍ର ତ୍ରିବେଦୀ କହିଛନ୍ତି, ମୁଖ୍ୟ ବିରୋଧୀ ଦଳ ଏବଂ ୬୦ ବର୍ଷ ଧରି ଭାରତକୁ ଶାସନ କରିଥିବା ପୁରୁଣା ଦଳ ଏବେ ସୁଯୋଗ ମିଳିଲେ ଆଶ୍ଚର୍ଯ୍ୟଜନକ କାର୍ଯ୍ୟ କରିବେ ବୋଲି କହୁଛନ୍ତି। ଆଜି ମୁଦ୍ରାସ୍ଫୀତି ହାର ୫%, ବେକାରୀ ହାର ୩.୧% ରହିଛି। ସବୁଠାରୁ ସର୍ବନିମ୍ନ ଭାଜପା ଶାସନ କାଳରେ ହୋଇଛି। ୧୯୭୫ର କଂଗ୍ରେସ ଶାସନ କାଳରେ ସର୍ବାଧିକ ମୁଦ୍ରାସ୍ଫୀତି ଥିଲା।
କଂଗ୍ରେସ ଭାରତରେ ଛୁଞ୍ଚି ତିଆରି ହେଉ ନ ଥିଲା ବୋଲି କହିଛନ୍ତି। ହେଲେ ସିଭି ରମଣ ନିଜେ ୧୯୩୦ରେ ନୋବେଲ ପୁରସ୍କାର ପାଇଥିଲେ। ଟାଟାର ବିମାନସେବା ଆରମ୍ଭ ହୋଇଥିଲା, ହେଲେ ଦଳ ଛୁଞ୍ଚି ତିଆରି ହେଉ ନ ଥିଲା ବୋଲି କହି ଲୋକଙ୍କୁ ଦ୍ୱନ୍ଦ୍ୱରେ ପକାଇବାକୁ ଚେଷ୍ଟା କରୁଛନ୍ତି ବୋଲି ସେ କହିଛନ୍ତି।
ଏହାଛଡ଼ା ଖାର୍ଗେ ସମସ୍ତ ମହିଳାଙ୍କୁ ୧ ଲକ୍ଷ ଟଙ୍କା ଦେବେ ବୋଲି କହିଛନ୍ତି। ୨୦୧୯ରେ ଏମାନେ ୭୨ ହଜାର ଦେବେ ବୋଲି କହିଥିଲେ। ହେଲେ ନିଜ ସରକାର ଥିବା ରାଜ୍ୟରେ କେତେ ହଜାର ବାଣ୍ଟିଛନ୍ତି କି? ଘୋଷଣାପତ୍ରର ନାମ ନ୍ୟାୟପତ୍ର ରଖାଯାଇଛି। ଯେଉଁ ଦଳ ଭାରତବାସୀ, ଛାତ୍ରଙ୍କ ସହ, ଯବାନଙ୍କ ସହ ନ୍ୟାୟ କରିନାହାନ୍ତି, ସେ ନ୍ୟାୟ ପତ୍ର ବିଷୟରେ କହୁଛନ୍ତି। ଏମାନେ ଛଦ୍ମ ବେଶରେ ଆସିଥାନ୍ତି। ବିଦେଶରୁ ଋଣ ନେଇ ଫଟୋ ଲଗାଉଥିଲେ। ପୂର୍ବରୁ ଭାରତର ଭାବମୂର୍ତ୍ତିକୁ ଖରାପ ଚିତ୍ରଣ କରିବାକୁ ଚେଷ୍ଟା କରିଛନ୍ତି ବୋଲି ମଧ୍ୟ ସେ କହିଛନ୍ତି।
କହିରଖୁଛୁ, ଶୁକ୍ରବାର କଂଗ୍ରେସ ପକ୍ଷରୁ ନିର୍ବାଚନୀ ଘୋଷଣାପତ୍ର ଜାରି କରାଯାଇଥିଲା। ଏହାକୁ ନ୍ୟାୟ ପତ୍ର ନାମ ଦିଆଯାଇଛି। ଏହାର କାର୍ଯ୍ୟ, ଅର୍ଥ ଏବଂ କଲ୍ୟାଣ ଉପରେ କେନ୍ଦ୍ରିତ ରହିଛି। ବିଶେଷକରି କଶ୍ମୀରକୁ ରାଜ୍ୟ ମାନ୍ୟତା ଏବଂ ଏମ୍ଏସ୍ପିକୁ ଆଇନଗତ ଗ୍ୟାରେଣ୍ଟି ଦେବା ସହ କଂଗ୍ରେସ ଅନେକ ପ୍ରତିଶ୍ରୁତି ଦେଇଛି।