ଦୁବାଇ/ନୂଆଦିଲ୍ଲୀ,୨ା୧୨: ୨୦୨୮ରେ ଜାତିସଂଘର ଜଳବାୟୁ ସମ୍ମିଳନୀ କପ୍୩୩ ଭାରତରେ ଆୟୋଜନ କରିବା ପାଇଁ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରସ୍ତାବ ଦେଇଛନ୍ତି। ଦୁବାଇର ଏକ୍ସପୋ ସିଟିରେ ଚାଲିଥିବା ଜାତିସଂଘର ୨୮ତମ ଜଳବାୟୁ ପରବର୍ତ୍ତନ ସମ୍ମିଳନୀ କପ୍୨୮ରେ ଯୋଗଦେଇ ସେ ଉପରୋକ୍ତ ବିବୃତି ଦେଇଛନ୍ତି। ସମ୍ମିଳନୀରେ ପ୍ରଧାନମନ୍ତ୍ରୀ ବିକାଶ ଓ ପରିବେଶ ସୁରକ୍ଷା ମଧ୍ୟରେ ସନ୍ତୁଳନ ରକ୍ଷାର ଆବଶ୍ୟକତା ଉପରେ ମଧ୍ୟ ଗୁରୁତ୍ୱାରୋପ କରିଛନ୍ତି।
କପ୍୨୮ର ଉଦ୍ଘାଟନୀ ସମାରୋହରେ ଏହାର ଆୟୋଜକ ସୁଲ୍ତାନ ଅଲ୍ ଜାବେର ଏବଂ ୟୁଏନ୍ କ୍ଲାଇମେଟ୍ ଚେଞ୍ଜ ପ୍ରେସିଡେଣ୍ଟ ସାଇମୋନ୍ ଷ୍ଟେଇଲଙ୍କ ସହ ସାମିଲ ହୋଇଥିବା ଏକମାତ୍ର ନେତା ମୋଦି ସମ୍ମିଳନୀକୁ ସମ୍ବୋଧିତ କରି କହିଛନ୍ତି, ଜଳବାୟୁ ପରିବର୍ତ୍ତନ ପ୍ରକ୍ରିୟା ସମ୍ପର୍କିତ ଜାତିସଂଘର ଫ୍ରେମ୍ଓ୍ବାର୍କ ପାଇଁ ଭାରତ ପ୍ରତିଶ୍ରୁତିବଦ୍ଧ। ତେଣୁ ୨୦୨୮ରେ ଭାରତରେ କପ୍୩୩ ଆୟୋଜନ ପାଇଁ ଏହି ମଞ୍ଚରୁ ସେ ପ୍ରସ୍ତାବ ଦେଉଛନ୍ତି। ୨୦୩୦ ସୁଦ୍ଧା ଉତ୍ସର୍ଜନକୁ ୪୫% ହ୍ରାସ କରିବା ପାଇଁ ଭାରତ ଲକ୍ଷ୍ୟ ରଖିଛି। ଏଥିପାଇଁ ଅଣଜୀବାଶ୍ମ ଇନ୍ଧନ ମାତ୍ରାକୁ ୫୦% ପର୍ଯ୍ୟନ୍ତ ବୃଦ୍ଧି କରିବାକୁ ଆମେ ନିଷ୍ପତ୍ତି ନେଇଛୁ। ଏହାବାଦ୍ ୨୦୭୦ ସୁଦ୍ଧା ନେଟ୍ ଜିରୋ ଲକ୍ଷ୍ୟ ହାସଲ ପାଇଁ ଆମେ ଅଗ୍ରସର ହେଉଛୁ। ପୃଥିବୀ ମାତା ନିଜ ଭବିଷ୍ୟତର ସୁରକ୍ଷା ପାଇଁ ଆମକୁ ଦେଖୁଛି। ଆମକୁ ନିର୍ଣ୍ଣାୟକ ହୋଇ ସଫଳତା ହାସଲ କରିବାକୁ ପଡ଼ିବ।
ପ୍ରଧାନମନ୍ତ୍ରୀ ଆହୁରି କହିଛନ୍ତି, ଜଳବାୟୁ ପରିବର୍ତ୍ତନ ଏକ ବୈଶ୍ୱିକ ଆହ୍ବାନ। ଏହାର ମୁକାବିଲା ପାଇଁ ଏକାଠି ହେବାକୁ ପଡ଼ିବ। ଏଥିସକାଶେ ଆବଶ୍ୟକ ପ୍ରଭାବଶାଳୀ ପଦକ୍ଷେପରେ ତତ୍ପରତା ଭରିବା ଦିଗରେ ଭାରତର ସକାରାମତ୍କ ଆଭିମୁଖ୍ୟ ରହିଛି। ବିକାଶଶୀଳ ରାଷ୍ଟ୍ରଗୁଡ଼ିକୁ କ୍ଲାଇମେଟ୍ ଫାଇନାନ୍ସିଂ (ଜଳବାୟୁ ପରିବର୍ତ୍ତନଜନିତ କ୍ଷତିପୂରଣ) ଓ ଟେକ୍ନୋଲୋଲିକାଲ ଟ୍ରାନ୍ସଫର (କାରିଗରି ହସ୍ତାନ୍ତରଣ) ଜରୁରୀ ହୋଇପଡ଼ିଛି।
ଦୁବାଇରେ ୨୧ ଘଣ୍ଟା ରହଣି ଭିତରେ ମୋଦି ୭ଟି ଦ୍ୱିପାକ୍ଷିକ ବୈଠକରେ ଯୋଗଦେବେ। ସେ ୪ଟି ଅବସରରେ ଅଭିଭାଷଣ ଦେବା କାର୍ଯ୍ୟକ୍ରମ ରହିଛି। ଏହି ଅବସରରେ ମୋଦି ବିଶ୍ୱନେତାମାନଙ୍କ ସହ ଅଣାନୁଷ୍ଠାନିକ ବୈଠକ କରିବେ। ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଅଧ୍ୟକ୍ଷତାରେ ନଭେମ୍ବର ୩୦ରୁ ଆରମ୍ଭ ହୋଇଥିବା କପ୍୨୮ ଡିସେମ୍ବର ୩୦ ପର୍ଯ୍ୟନ୍ତ ଚାଲିବ।