ଦୁବାଇ, ୧୩।୭: ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ଟେଷ୍ଟ ମ୍ୟାଚ୍ ସହ ଦୀର୍ଘ ୪ ମାସର ବ୍ୟବଧାନ ପରେ ପଡ଼ିଆକୁ ଫେରିଛି ଅନ୍ତର୍ଜାତୀୟ କ୍ରିକେଟ୍। ମହାମାରୀ କରୋନା ଭାଇରସ୍ ଲାଗି ଗତ ମାର୍ଚ୍ଚ ୧୫ରୁ ଅନ୍ତର୍ଜାତୀୟ କ୍ରିକେଟ୍ ପ୍ରତିଯୋଗିତା ବନ୍ଦ ରହିଥିଲା। ତେବେ ସାଉଥାମ୍ପଟନର ରୋଜ୍ ବାଉଲରେ ଘରୋଇ ଇଂଲଣ୍ଡ ବିପକ୍ଷରେ ଅନୁଷ୍ଠିତ ପ୍ରଥମ ଟେଷ୍ଟ ମ୍ୟାଚ୍କୁ ଓ୍ବେଷ୍ଟଇଣ୍ଡିଜ ୪ ଉଇକେଟ୍ ଜିତିନେଇଛି। ଏହି ବିଜୟ ସହ ଜାସନ ହୋଲ୍ଡରଙ୍କ ଦଳ ୪୦ ପଏଣ୍ଟ ହାସଲ କରିଛି। ଏଥିସହ ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ ପଏଣ୍ଟ ଟେବୁଲ ତାଲିକାରେ ଓ୍ବେଷ୍ଟଇଣ୍ଡିଜ ୭ମ ସ୍ଥାନରେ ରହିଛି। ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ ଆରମ୍ଭ ହେବା ପରଠାରୁ ଓ୍ବେଷ୍ଟଇଣ୍ଡିଜର ଏହା ପ୍ରଥମ ଟେଷ୍ଟ ବିଜୟ। ଅପରପକ୍ଷରେ ପରାଜୟ ସତ୍ତ୍ୱେ ଇଂଲଣ୍ଡ ମୋଟ୍ ୧୪୬ ପଏଣ୍ଟ ସହ ତାଲିକାର ୪ର୍ଥ ସ୍ଥାନରେ ସ୍ଥିର ରହିଛି। ତେବେ ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ ଏହି ଟେବୁଲର ଶୀର୍ଷ ସ୍ଥାନ ବଜାୟ ରଖିଛି। କୋହଲିଙ୍କ ଦଳ ବର୍ତ୍ତମାନ ସୁଦ୍ଧା ଚାମ୍ପିୟନଶିପ୍ରେ ମୋଟ୍ ୯ ମ୍ୟାଚ୍ ଖେଳି ୭ ବିଜୟ ଓ ୨ ପରାଜୟ ସହ ୩୬୦ ପଏଣ୍ଟ ଲାଭ କରିଛି। ଯେଉଁଥିରେ ଭାରତ ୩ଟି ଟେଷ୍ଟ ସିରିଜ ଜିତିଛି। ଅଷ୍ଟ୍ରେଲିଆ (୨୯୬) ଓ ନ୍ୟୁଜିଲାଣ୍ଡ (୧୮୦) ଯଥାକ୍ରମେ ଟେବୁଲର ୨ୟ ଓ ୩ୟ ସ୍ଥାନରେ ରହିଛନ୍ତି। ଅଷ୍ଟ୍ରେଲିଆ ୧୦ ମ୍ୟାଚ୍ ଖେଳି ୭ ବିଜୟ, ୨ ପରାଜୟ ଓ ଗୋଟିଏ ଟେଷ୍ଟ ଡ୍ର ରଖିଛି। ଏହା ମଧ୍ୟରେ ଅଷ୍ଟ୍ରେଲିଆ ୨ଟି ସିରିଜ ହାତେଇବାରେ ସଫଳ ହୋଇଛି।
