ରୁଷିଆରୁ ଏସ୍-୪୦୦ କିଣିବା ଉପରେ ଭାରତକୁ କାହିଁକି ବ୍ୟାନ କଲାନି ଆମେରିକା? ପେଣ୍ଟାଗନ ଦେଲା ଉତ୍ତର
04 ଓ୍ବାଶିଂଟନ,୨୩।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆମେରିକା ଗସ୍ତ ସମୟରେ ଭାରତ ରୁଷିଆରୁ ଅସ୍ତ୍ରଶସ୍ତ୍ର କିଣିବା ନେଇ ମଧ୍ୟ ପ୍ରଶ୍ନ ଉଠିଛି। ରୁଷିଆରୁ ଭାରୀ ଅସ୍ତ୍ର କିଣୁଥିବା ଦେଶମାନଙ୍କ ଉପରେ ଆମେରିକା ଏହାର କଠୋର ନିୟମ ଲାଗୁ କରେ, ହେଲେ ଯେତେବେଳେ ଭାରତ ରଷିଆରୁ ଏସ୍-୪୦୦ ବାୟୁ ପ୍ରତିରକ୍ଷା ପ୍ରଣାଳୀ କିଣିଲା, ସେତେବେଳେ ଆମେରିକା ଏହାକୁ ଏହାର ସିଏଏଟିଏସ୍ଏ (କାଉଣ୍ଟରିଂ ଆମେରିକାସ ଆଡଭର୍ସରିଜ ଥ୍ରୋ ସାନ୍ସନ ଆକ୍ଟ) ଆଇନରୁ ତାକୁ ମୁକ୍ତ କରି ଦେଇଛି।
ଆମେରିକାର ପ୍ରତିରକ୍ଷା ବିଭାଗ ପେଣ୍ଟାଗନ ବର୍ତ୍ତମାନ ଏସ୍-୪୦୦ କିଣିବାରେ ଭାରତକୁ ବାଦ୍ ଦେବା ପ୍ରଶ୍ନର ଉତ୍ତର ଦେଇଛି। ପେଣ୍ଟାଗନ ତରଫରୁ କୁହାଯାଇଛି, ସିଏଏଟିଏସ୍ଏ ପ୍ରତିବନ୍ଧକରୁ ଭାରତକୁ ବାଦ୍ ଦେବା ଦ୍ୱାରା ଆମେରିକା ଉପକୃତ ହେବ, ଆମେରିକା ଭାରତର ସୁରକ୍ଷା ହ୍ରାସ କରିବାକୁ ଚାହୁଁନାହିଁ। ପେଣ୍ଟାଗନ ଡେପୁଟି ପ୍ରେସ ସେକ୍ରେଟାରୀ ସବରିନା ସିଂ ଭାରତ ବିଷୟରେ କହିଛନ୍ତି, ଆମେ ଆମର ସମସ୍ତ ଅଂଶୀଦାର ଏବଂ ସହଯୋଗୀମାନଙ୍କୁ ରୁଷିଆ ସହିତ କାରବାର ନ କରିବାକୁ ଉତ୍ସାହିତ କରୁଛୁ। ଏହା ହେଉଛି କିଛି ଏଭଳି ଯାହା ଆମେ ତୁର୍କୀ ବ୍ୟତୀତ ଭାରତ ଏବଂ ଅନ୍ୟମାନଙ୍କ ସହ ପୁନରାବୃତ୍ତି ଜାରି ରଖିଛୁ। ଭାରତର ଏସ୍-୪୦୦ କ୍ରୟକୁ ତୁର୍କୀ ସହିତ ତୁଳନା କରି ସେ କହିଛନ୍ତି , ଏହି ଦୁଇଟି ମାମଲା ଭିନ୍ନ ଅଟେ। ତୁର୍କୀ ନାଟୋର ଏକ ଅଂଶ, ତଥାପି ଏହା ରୁଷିଆ ସହିତ ଏହି ଚୁକ୍ତି କରିଥିଲା।
ଆମେରିକାର ପ୍ରତିରକ୍ଷା ବିଭାଗର ସୂଚନା ଅନୁଯାୟୀ ପେଣ୍ଟାଗନ ଡେପୁଟି ପ୍ରେସ ସଚିବ ସବରିନା କହିଛନ୍ତି, ମୁଁ ଭାବୁଛି ଭାରତ ଏବଂ ତୁର୍କୀ ଦୁଇଟି ଭିନ୍ନ ଦେଶ ଏବଂ ଦୁଇଟି ଭିନ୍ନ ମାମଲା। ଯେବେ ଭାରତ କଥା ଆସେ, ସେତେବେଳେ ଆମେ ସେମାନଙ୍କ ଉପକରଣର ବିବିଧତା ଏବଂ ସେମାନଙ୍କ ସହ ଏକୀଭୂତ ହେବାର ସାମର୍ଥ୍ୟ ଉପରେ ମଧ୍ୟ ଆତ୍ମବିଶ୍ୱାସୀ, କିନ୍ତୁ ତୁର୍କୀ ସହିତ ତାହା ନୁହେଁ। ସବରିନା କହିଛନ୍ତି , ଆମେ ପୁଣିଥରେ ମୋଦିଙ୍କ ଆମେରିକା ଗସ୍ତକୁ ସ୍ବାଗତ କରୁଛୁ। ଦୁଇ ସପ୍ତାହ ପୂର୍ବରୁ ଆମର ସଚିବ ଅଷ୍ଟିନ ଭାରତ ଗସ୍ତରେ ଯାଇ ତାଙ୍କ ପ୍ରତିପକ୍ଷଙ୍କୁ ଭେଟିଥିଲେ, ତା’ପରେ ଭାରତ ସହିତ ପ୍ରତିରକ୍ଷା ସହଯୋଗ ବୃଦ୍ଧି କରିବୁ ବୋଲି ପ୍ରତିଶ୍ରୁତି ଦିଆଯାଇଥିଲା। ଏଥିସହ, ଆମେ ଆମର ସହଯୋଗୀ ତଥା ବିଶ୍ୱର ଅଂଶୀଦାରମାନଙ୍କୁ ରୁଷିଆ ସହିତ କାରବାରରୁ ଦୂରେଇ ରହିବାକୁ ଅନୁରୋଧ ଜାରି ରଖିବୁ।