ନୂଆଦିଲ୍ଲୀ,୧୬ ।୯: ଦେଶରେ ହେବାକୁ ଯାଉଥିବା ଏକ ବଡ ଆତଙ୍କବାଦୀ ଆକ୍ରମଣ ଯୋଜନା ପଣ୍ଡ ହୋଇଛି । ଭିନ୍ନ ଭିନ୍ନ ସ୍ଥାନରୁ ଗିରଫ ହୋଇଥିବା ଆତଙ୍କବାଦୀମାନେ କିଛି ସହରକୁ ବିସ୍ଫୋରକ ପଠାଇଥିବା ଦାବି କରିଛନ୍ତି । ଏହାକୁ ନେଇ ଭିନ୍ନ ଭିନ୍ନ ରାଜ୍ୟର ପୋଲିସ ଆତଙ୍କବାଦୀଙ୍କ ଚେର ଖୋଜିବାରେ ଲାଗିଛି । କୁହାଯାଉଛି କି ଶେଷ ମୁହୂର୍ତ୍ତରେ ଏଭଳି ଯୋଜନା ସମ୍ପର୍କରେ ଜଣାପଡିଯିବାରୁ ଦେଶ ଅଳ୍ପକେ ବର୍ତ୍ତି ଯାଇଛି । ଧରାପଡିଥିବା ଆତଙ୍କବାଦୀଙ୍କ ମଧ୍ୟରେ ରହିଛନ୍ତି ମୁମ୍ବାଇର ମୋହମ୍ମଦ ଶେଖ । ଏହାକୁ ପୋଲିସ ରାଜସ୍ଥାନରୁ ଗିରଫ କରିଛି । ଦୁଇ ନମ୍ବରରେ ଅଛନ୍ତି ଅବୁ ବକ୍ର ସେ ଉତ୍ତର ପ୍ରଦେଶ ବହରାଇଚର ବାସିନ୍ଦା ତାଙ୍କୁ ଦିଲ୍ଲୀରୁ ଗିରଫ କରାଯାଇଛି । ତୃତୀୟ ହେଲେ ଓସାମା ଯାହାଙ୍କୁ ଦିଲ୍ଲୀରୁ ଧରାଯାଇଛି । ଉତ୍ତର ପ୍ରଦେଶ ରାୟବରେଲିର ମୁଲଚନ୍ଦ ଓରଫ ଲାଲାକୁ ବି ପୋଲିସ କାବୁ କରିଛି । ଅନ୍ୟମାନେ ହେଲେ ପ୍ରୟାଗରାଜର ଜିଶାନ କମର ଓ ଲକ୍ଷ୍ନୌର ଆମିର ଜାବେଦ । ପୋଲିସର ସୂଚନା ଅନୁଯାୟୀ, ମୁମ୍ବାଇ ବିସ୍ଫୋରଣ ଭଳି ଏଥର ପୁଣିଥରେ ବିସ୍ଫୋରଣ କରାଯିବାର ଯୋଜନାରେ ଥିଲେ ଆତଙ୍କବାଦୀ । ଏମାନଙ୍କର ପ୍ରଥମ ଟାର୍ଗେଟ ଉତ୍ତର ପ୍ରଦେଶ ଥିବା ବେଳେ ଦ୍ୱିତୀୟରେ ଥିଲା ମହାରାଷ୍ଟ୍ର । ଧରାପଡିଥିବା ଆତଙ୍କବାଦୀଙ୍କ ମଧ୍ୟରୁ ଓସାମାଙ୍କ ପିତା ଉବୈଦୂର ରହମାନଙ୍କର ଆତଙ୍କବାଦୀ ସଙ୍ଗଠନ ଆଇଏସ୍ ସହ ସିଧା ସମ୍ପର୍କ ଥିବା ପୋଲିସ କହୁଛି । ଏବେ ସେ ଦୁବଇରେ ଥିବା ଅନୁମାନ କରାଯାଉଛି । ସମସ୍ତ ଯୋଜନା ୧୯୯୩ ମୁମ୍ବାଇ ବ୍ଲାଷ୍ଟ ପ୍ଲାନିଂରେ ଥିବା ପୋଲିସ ପ୍ରକାଶ କରିଛି ।