ନୂଆଦିଲ୍ଲୀ,୪।୭: ଦିଲ୍ଲୀ ପୋଲିସ ପକ୍ଷରୁ କଂଗ୍ରେସ ନେତା ରାହୁଲ ଗାନ୍ଧୀଙ୍କ ବାସଭବନ ବାହାରେ ସୁରକ୍ଷାକୁ ବଢ଼ାଇ ଦିଆଯାଇଛି। ବିରୋଧୀ ଦଳର ଏହି ନେତାଙ୍କ ଆବାସ ବାହାରେ ସାମରିକ ବାହିନୀର ଏକ ଟିମ୍ ଏବଂ ଦିଲ୍ଲୀ ପୋଲିସର ଅନେକ ଟିମ୍ ନିୟୋଜିତ ହୋଇଛନ୍ତି। ମଙ୍ଗଳବାର ଦକ୍ଷିଣପନ୍ଥୀ ଗୋଷ୍ଠୀ ଦ୍ୱାରା ବିଶୃଙ୍ଖଳିତ କାର୍ଯ୍ୟକଳାପ ନେଇ ଗୁପ୍ତ ସୂଚନା ମିଳିବା ପରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
କ’ଣ ରହିଛି ବିପଦ?
ଦକ୍ଷିଣପନ୍ଥୀ କାର୍ଯ୍ୟକର୍ତ୍ତାମାନେ ରାହୁଲଙ୍କ ବାସଭବନ ବାହାରେ ପ୍ଲାକାର୍ଡ କିମ୍ବା ହୋର୍ଡିଂ ଧରି ବିକ୍ଷୋଭ କରିପାରନ୍ତି ବୋଲି ପୋଲିସ ଆଶଙ୍କା କରୁଛି। ଏଣୁ ଦିଲ୍ଲୀ ପୋଲିସକୁ ତାଙ୍କ ବାସଭବନ ଆଖପାଖରେ ୨୪ ଘଣ୍ଟିଆ ଦୃଷ୍ଟି ରଖିବାକୁ କୁହାଯାଇଛି। ରାହୁଲଙ୍କୁ ସିଆର୍ପିଏଫ୍ କର୍ମଚାରୀଙ୍କ ଅଧୀନରେ ଏଲ୍ ବର୍ଗ ସହ ଜେଡ୍ ପ୍ଲସ୍ ସୁରକ୍ଷା ଦିଆଯାଉଛି।
ରାହୁଲଙ୍କ ‘ହିନ୍ଦୁ’ ବୟାନକୁ ନେଇ ବିବାଦ:
ଲୋକ ସଭାରେ ବିରୋଧୀ ଦଳ ନେତା ଭାବେ ରାହୁଲ ନିଜର ପ୍ରଥମ ଭାଷଣରେ ଭାଜପାକୁ କଟାକ୍ଷ କରି ବିବାଦକୁ ଆସିଛନ୍ତି। ସେ କହିଥିଲେ, ଯେଉଁମାନେ ନିଜକୁ ହିନ୍ଦୁ ବୋଲିକହୁଛନ୍ତି ସେମାନେ ଦିନରାତି ହିଂସା ଏବଂ ଘୃଣା କରନ୍ତି। ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗମ୍ଭୀର ବିଷୟ ବୋଲି କହିଥିଲେ। ଗୃହମନ୍ତ୍ରୀ ଅମିତ ଶାହା ମଧ୍ୟ ଏହି ବୟାନକୁ ନେଇ ରାହୁଲଙ୍କୁ କ୍ଷମା ମାଗିବାକୁ ଦାବି କରିଥିଲେ।
ରାହୁଲଙ୍କ ବୟାନକୁ ବିରୋଧ:
ରାହୁଲଙ୍କ ଭାଷଣ ବିରୋଧରେ ଉକ୍ତ ଦିନ ଅହମ୍ମଦାବାଦର ଗୁଜରାଟ କଂଗ୍ରେସ ମୁଖ୍ୟାଳୟ ରାଜୀବ ଗାନ୍ଧୀ ଭବନରେ କଂଗ୍ରେସ ଏବଂ ଭାଜପା କର୍ମୀ ମୁହାଁମୁହିଁ ହୋଇଥିଲେ। ବୁଧବାର ରାହୁଲଙ୍କ ବୟାନକୂ ନେଇ ଭାଜପା ନେତା ଏବଂ କର୍ମୀମାନେ ଦିଲ୍ଲୀରେ ବିକ୍ଷୋଭ ପ୍ରଦର୍ଶନ କରିଥିଲେ।ଏପରିକି ତାଙ୍କଠାରୁ କ୍ଷମା ମାଗିଥିଲେ। ଉକ୍ତ ବିକ୍ଷୋଭକାରୀ ଜୟସଲମର୍ ହାଉସ୍ ନିକଟରେ ଏକାଠି ହୋଇ ରାହୁଲ ଏବଂ କଂଗ୍ରେସ ବିରୋଧରେ ସ୍ଲୋଗାନ ଦେଇ ଆକବର ରୋଡ୍ରେ ଥିବା କଂଗ୍ରେସ ମୁଖ୍ୟାଳୟ ଆଡକୁ ଯିବାକୁ ଚେଷ୍ଟା କରିଥିଲେ।