ନୂଆଦିଲ୍ଲୀ,୧୦।୭: ଭାରତ ଓ ଶ୍ରୀଲଙ୍କା ମଧ୍ୟରେ ଖେଳାଯିବାକୁ ଥିବା ଦିନିକିଆ ଓ ଟି୨୦ ସିରିଜ୍ ୫ ଦିନ ବିଳମ୍ବରେ ଅର୍ଥାତ୍ ୧୮ ତାରିଖରୁ ଆରମ୍ଭ ହେବ। ପୂର୍ବ କାର୍ଯ୍ୟସୂଚୀ ଅନୁଯାୟୀ, ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଆସନ୍ତା ୧୩ରୁ ଆରମ୍ଭ ହେବାର ଥିଲା। କିନ୍ତୁ ଘରୋଇ ଦଳର କ୍ୟାମ୍ପରେ କୋଚିଂ ଷ୍ଟାଫ କୋଭିଡ୍-୧୯ ସଂକ୍ରମିତ ଚିହ୍ନଟ ହେବା ପରେ ସିରିଜ୍କୁ ୫ ଦିନ ଘୁଞ୍ଚାଇ ଦିଆଯାଇଛି। ଏ ନେଇ ବିସିସିଆଇ ସମ୍ପାଦକ ଜୟ ଶାହ କହିଛନ୍ତି।
ଉଲ୍ଲେଖଯୋଗ୍ୟ, ନିକଟରେ ୟୁକେରୁ ଫେରିଥିବା ଶ୍ରୀଲଙ୍କା ଦଳର ବ୍ୟାଟିଂ କୋଚ୍ ଗ୍ରାଣ୍ଟ ଫ୍ଲାଓ୍ବାର ଓ ଡାଟା ଆନାଲିଷ୍ଟ ଜି ଟି ନିରୋଶାନ ପଜିଟିଭ ଚିହ୍ନଟ ହୋଇଛନ୍ତି। ଦୁହେଁ ଡେଲ୍ଟା ଭାରିଆଣ୍ଟରେ ସଂକ୍ରମିତ, ଯାହା ଅଧିକ ସଂକ୍ରାମକ। ଏଥିଯୋଗୁ ଘରୋଇ ଖେଳାଳିଙ୍କ କ୍ୱାରେଣ୍ଟିନ ସମୟ ସୀମା ବଢ଼ାଇ ଦିଆଯାଇଛି।
ପରିବର୍ତ୍ତିତ କାର୍ଯ୍ୟସୂଚୀ ଅନୁଯାୟୀ, ଆସନ୍ତା ୧୮, ୨୦ ଓ ୨୩ ତାରିଖରେ ପ୍ରେମାଦାସ ଷ୍ଟାଡିୟମରେ ଦିନିକିଆ ସିରିଜ୍ର ସମସ୍ତ ମ୍ୟାଚ୍ ଖେଳାଯିବ। ଏହାପରେ ୨୫ ତାରିଖରୁ ଆରମ୍ଭ ହେବ ଟି୨୦ ସିରିଜ୍। ଅନ୍ତିମ ଦୁଇଟି ଟି୨୦ ମ୍ୟାଚ୍ ୨୭ ଓ ୨୯ ତାରିଖରେ ସମାନ ଭେନ୍ୟୁରେ ଅନୁଷ୍ଠିତ ହେବ।