ନୂଆଦିଲ୍ଲୀ/ଓ୍ବାଶିଂଟନ,୨୮।୨ : ଆତଙ୍କବାଦ ବିରୋଧରେ ଭାରତ ସରକାର ବହୁତ ଭଲ କାମ କରିଛନ୍ତି। ଆମେରିକା ସରକାରଙ୍କ ଏକ ରିପୋର୍ଟରେ ଏହି ଦାବି କରାଯାଇଛି। ଏହି ରିପୋର୍ଟରେ କୁହାଯାଇଛି ଯେ ଆତଙ୍କବାଦୀ ସଂଗଠନଗୁଡ଼ିକୁ ଚିହ୍ନଟ କରିବା, ସେମାନଙ୍କୁ ଧ୍ୱଂସ କରିବା ଏବଂ ଆତଙ୍କବାଦର ବିପଦକୁ ହ୍ରାସ କରିବାରେ ଭାରତ ଏକ ବଡ଼ କାର୍ଯ୍ୟ କରିଛି । ଆତଙ୍କବାଦ ଉପରେ ରିପୋର୍ଟ ୨୦୨୧ରେ ଜମ୍ମୁ-କଶ୍ମୀରର ୟୁନିଅନ ଟେରିଟୋରୀ, ଉତ୍ତର ପୂର୍ବ ରାଜ୍ୟ ଆତଙ୍କବାଦ ଦ୍ୱାରା ପ୍ରଭାବିତ ହୋଇଥିବା ଉଲ୍ଲେଖ କରାଯାଇଛି।
ରିପୋର୍ଟ ଅନୁଯାୟୀ, ଭାରତରେ ଲଶ୍କର-ଇ-ତୋଏବା, ଜୈଶ-ଏ-ମହମ୍ମଦ, ହିଜବୁଲ ମୁଜାହିଦ୍ଦିନ, ଆଇଏସଆଇଏସ, ଅଲ କାଏଦା, ଜମାତ ଉଲ ମୁଜାହିଦ୍ଦିନ, ଜମାତ ଉଲ ମୁଜାହିଦ୍ଦିନ ବାଂଲାଦେଶ ଭଳି ଆତଙ୍କବାଦୀ ସଂଗଠନ ସକ୍ରିୟ ଅଛନ୍ତି। ରିପୋର୍ଟରେ କୁହାଯାଇଛି ଯେ ୨୦୨୧ ମସିହାରେ ଏହା ଦେଖାଯାଇଥିଲା ଯେ ଆତଙ୍କବାଦୀ ସଂଗଠନ ସେମାନଙ୍କ ରଣନୀତିରେ ସାମାନ୍ୟ ପରିବର୍ତ୍ତନ କରିଛନ୍ତି ଏବଂ ବର୍ତ୍ତମାନ ସେମାନେ ସାଧାରଣ ନାଗରିକଙ୍କୁ ଟାର୍ଗେଟ କରୁଛନ୍ତି ତଥା ଡ୍ରୋନ ଓ ଆଇଇଡି ଇତ୍ୟାଦି ବିସ୍ଫୋରଣ କରୁଛନ୍ତି।
ରିପୋର୍ଟରେ ଦର୍ଶାଯାଇଛି ଯେ ୨୦୨୧ ମସିହାରେ ଜମ୍ମୁ-କଶ୍ମୀରରେ ୧୫୩ ଟି ଆତଙ୍କବାଦୀ ଆକ୍ରମଣ ହୋଇଥିଲା ଯେଉଁଥିରେ ୪୫ ସୁରକ୍ଷା ବାହିନୀର କର୍ମଚାରୀ, ୩୬ ସାଧାରଣ ନାଗରିକ ଏବଂ ୧୯୩ ଆତଙ୍କବାଦୀଙ୍କ ସମେତ ମୋଟ ୨୭୪ ଜଣଙ୍କର ମୃତ୍ୟୁ ଘଟିଥିଲା। ଭାରତ ରାଜ୍ୟ ତଥା କେନ୍ଦ୍ରୀୟସ୍ତରରେ ଗୁପ୍ତଚର ଏଜେନ୍ସିଗୁଡ଼ିକୁ ମଜବୁତ କରିଛି।
ରିପୋର୍ଟରେ କୁହାଯାଇଛି ଯେ ବନ୍ଦରଗୁଡ଼ିକର ସୁରକ୍ଷା ପାଇଁ ପ୍ରବେଶ ପଥରେ ବାୟୋଗ୍ରାଫିକ ଏବଂ ବାୟୋମେଟ୍ରିକ ସ୍କ୍ରିନିଂ ପାଇଁ ଭାରତ ବ୍ୟବସ୍ଥା କରିଛି। ବିମାନବନ୍ଦରରେ ଦୁଇଥର ଯାଞ୍ଚ କରିବା ଉଦ୍ଦେଶ୍ୟରେ ଏକ୍ସ-ରେ ସ୍କ୍ରିନିଂ ମଧ୍ୟ କରାଯାଉଛି। ଅସ୍ତ୍ରଶସ୍ତ୍ର ଚୋରା ଚାଲାଣ ଅଭିଯୋଗରେ ଭାରତର ଅନୁସନ୍ଧାନକାରୀ ସଂସ୍ଥା ଏନଆଇଏ ଲଶ୍କର-ଇ-ତୋଏଇବା, ହରକତ ଉଲ ଜିହାଦି ଇସଲାମିକ ଆତଙ୍କବାଦୀଙ୍କୁ ଦଣ୍ଡିତ କରିଛି। ସେପ୍ଟେମ୍ବର ୨୦୨୧ରେ ଆଇଏସଆଇଏସ ସହ ଜଡିତ ୩୭ ଟି ମାମଲାର ଅନୁସନ୍ଧାନ କରି ୧୮୬ ଜଣଙ୍କୁ ଗିରଫ କରାଯାଇଛି।
ଆତଙ୍କବାଦ ପ୍ରଭାବିତ ଜମ୍ମୁ-କଶ୍ମୀରରେ ଭାରତୀୟ ସେନା କିପରି ଜନ କଲ୍ୟାଣ କାର୍ଯ୍ୟରେ ନିୟୋଜିତ ଅଛି ତାହା ମଧ୍ୟ ରିପୋର୍ଟରେ ଉଲ୍ଲେଖ କରାଯାଇଛି। ଏସବୁ ମଧ୍ୟରେ ବିଦ୍ୟାଳୟ ଚଳାଇବା, ଡାକ୍ତରୀ ଶିବିର ସ୍ଥାପନ ଏବଂ ଯୁବକମାନଙ୍କୁ ତାଲିମ ଦେବା ସହିତ ରୋଜଗାର ଯୋଗାଇବା ଅନ୍ତର୍ଭୁକ୍ତ, ଯାହା ଦ୍ୱାରା ଯୁବକମାନଙ୍କୁ ଆତଙ୍କବାଦ ସଂଗଠନ ମୁହାଁ ହେବାରୁ ରୋକାଯାଇପାରିବ।