ନୂଆଦିଲ୍ଲୀ, ୩।୯ : ଭାରତ ୨୦୨୯ ସୁଦ୍ଧା ପୃଥିବୀର ତୃତୀୟ ବୃହତ୍ ଅର୍ଥ ବ୍ୟବସ୍ଥାଭାବରେ ଉଭା ହୋଇପାରେ। ଷ୍ଟେଟ ବ୍ୟାଙ୍କ ଅଫ ଇଣ୍ଡିଆର ଅର୍ଥନୈତିକ ଅନୁସନ୍ଧାନ ବିଭାଗର ଏକ ଅନୁସନ୍ଧାନ ରିପୋର୍ଟରେ ଏହା ଦାବି କରାଯାଇଛି। ରିପୋର୍ଟରେ କୁହାଯାଇଛି ଯେ ୨୦୧୪ରେ ଭାରତ ଆର୍ଥିକ ଦୃଷ୍ଟିରୁ ଦଶମ ସ୍ଥାନରେ ଥିବାବେଳେ ୨୦୨୯ ସୁଦ୍ଧା ଭାରତ ସାତୋଟି ସ୍ଥାନ ଉପରକୁ ଉଠି ତୃତୀୟ ସ୍ଥାନକୁ ଯାଇପାରେ।
ରିପୋର୍ଟରେ କୁହାଯାଇଛି ଯେ ଚଳିତ ଆର୍ଥିକ ବର୍ଷର ପ୍ରଥମ ତ୍ରୟମାସରେ ଭାରତର ଜିଡିପି ଅଭିବୃଦ୍ଧି ହାର ୧୩.୫ ପ୍ରତିଶତ ରହିଛି। ଯଦି ଏହି ଗତି ଜାରି ରହେ, ତେବେ ଚଳିତ ଆର୍ଥିକ ବର୍ଷରେ ଭାରତୀୟ ଅର୍ଥନୀତି ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ସାବ୍ୟସ୍ତ ହେବ।
ଚଳିତ ଆର୍ଥିକ ବର୍ଷରେ ଭାରତୀୟ ଅର୍ଥନୀତିର ୬.୭ ରୁ ୭.୭ ପ୍ରତିଶତକୁ ବୃଦ୍ଧି ହେବାର ପୂର୍ବାନୁମାନ ଉପରେ ରିପୋର୍ଟରେ କୁହାଯାଇଛି ଯେ ଏହା ଭଲ ସ୍ଥିତି। ସମଗ୍ର ବିଶ୍ୱରେ ମାନ୍ଦାବସ୍ଥା ଜାରି ରହିଥିବାବେଳେ ଅଭିବୃଦ୍ଧି ହାର ୬ ରୁ ୬.୫ ପ୍ରତିଶତ ରହିବାକୁ ନ୍ୟୁ ନର୍ମାଲ କୁହାଯାଇପାରେ।
ଆଇବିଆଇ (ଇଣ୍ଡେକ୍ସ ଅଫ ଇଣ୍ଡଷ୍ଟ୍ରିଆଲ ପ୍ରଡକ୍ସନ) ବାସ୍କେଟକୁ ଅପଡେଟ କରିବା ପାଇଁ ଏସବିଆଇର ଏହି ରିପୋର୍ଟ ଜୋରଦାର ପ୍ରୋତ୍ସାହିତ କରିଛି। ରିପୋର୍ଟ ଅନୁଯାୟୀ ଏହା ୨୦୧୨ ଉତ୍ପାଦ ଉପରେ ଆଧାରିତ ତେଣୁ ନିରାଶାଜନକ ଭାବରେ ପୁରୁଣା ଅଟେ ।
ଏସବିଆଇର ଏହି ରିପୋର୍ଟରେ ୨୦୧୪ ମସିହାରୁ ଭାରତୀୟ ଅର୍ଥନୀତିରେ ବଡ଼ ପରିବର୍ତ୍ତନ ଆସିଛି ବୋଲି ଦାବି କରାଯାଇଛି। ରିପୋର୍ଟରେ କୁହାଯାଇଛି ଯେ ଡିସେମ୍ବର ୨୦୨୧ ରେ ମଧ୍ୟ ଭାରତୀୟ ଅର୍ଥନୀତି ବ୍ରିଟେନକୁ ଅତିକ୍ରମ କରିଛି। ୨୦୧୯ ରେ ମଧ୍ୟ ଭାରତ ବ୍ରିଟେନକୁ ପଛରେ ପକାଇ ଦେଇଥିଲା। ତେବେ ରିପୋର୍ଟରେ ଦର୍ଶାଯାଇଥିବା ପରି ଭାରତ ଏପର୍ଯ୍ୟନ୍ତ ବ୍ରିଟେନକୁ ପଛରେ ପକାଇ ନାହିଁ। ବିଶ୍ୱ ଜିଡିପିରେ ଭାରତର ଅଂଶ ବର୍ତ୍ତମାନ ୩.୫ ପ୍ରତିଶତ ରହିଛି। ୨୦୧୪ ରେ ଏହା ୨.୬ ପ୍ରତିଶତ ଥିଲା । ଯେତେବେଳେ କି, ୨୦୨୭ ସୁଦ୍ଧା ଏହା ୪ ପ୍ରତିଶତରେ ପହଞ୍ଚିବା ପାଇଁ ଜର୍ମାନୀକୁ ଅତିକ୍ରମ କରିବ ।
ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ) ଜିଡିପି ତଥ୍ୟ ଅନୁଯାୟୀ ଭାରତ ପ୍ରଥମ ତ୍ରୟମାସରେ ଲାଭ କରିଛି। ଆମେରିକା ବର୍ତ୍ତମାନ ବିଶ୍ୱର ବୃହତ୍ତମ ଅର୍ଥନୀତି। ଦ୍ୱିତୀୟ ସ୍ଥାନରେ ଚାଇନା ଥିବାବେଳେ ଏହାପଛକୁ ଜାପାନ ଏବଂ ଜର୍ମାନୀ ରହିଛନ୍ତି। ଏକ ଦଶନ୍ଧି ପୂର୍ବରୁ ଭାରତ ଏହି ତାଲିକାରେ ୧୧ ନମ୍ବରରେ ଏବଂ ବ୍ରିଟେନ ପଞ୍ଚମ ସ୍ଥାନରେ ରହିଥିଲା।
