ନୂଆଦିଲ୍ଲୀ,୧୦।୧୧: ପାକିସ୍ତାନରେ ହେବାକୁ ଥିବା ଆଇସିସି ଚାମ୍ପିୟନ୍ସ ଟ୍ରଫିରେ ଭାରତ ଯୋଗ ଦେବାକୁ ମନା କରି ଦେବା ପରେ ପାକିସ୍ତାନ କ୍ରିକେଟ ବୋର୍ଡ(ପିସିବି) ବର୍ତ୍ତମାନ ସରକାରଙ୍କ ପରାମର୍ଶ ଲୋଡିଛି। ଭାରତ ସରକାରଙ୍କ ପକ୍ଷରୁ ଅନୁମତି ମିଳି ନ ଥିବା ଦର୍ଶାଇ ଭାରତୀୟ କ୍ରିକେଟ ଦଳ ପାକିସ୍ତାନ ନ ଯିବାର ନିଷ୍ପତ୍ତି ନେଇ ଆଇସିସିକୁ ଶନିବାର ଇ ମେଲ୍ କରିଥିଲେ।
ରବିବାର ଆଇସିସି ଏହି ଘଟଣା ସମ୍ପର୍କରେ ପିସିବିକୁ ଇ ମେଲ୍ କରିଥିଲା। ରବିବାର ପିସିବି ପକ୍ଷରୁ ଇମେଲ ମିଳିଥିବା ନେଇ ସ୍ବୀକାର କରାଯାଇଥିଲା। ଇ ମେଲ ମିଳିବା ପରେ ପିସିବି ଏହି ଘଟଣା ସମ୍ପର୍କରେ ପାକିସ୍ତାନ ସରକାରଙ୍କ ପରାମର୍ଶ ଲୋଡିଛି। ପିସିବିର ପରବର୍ତ୍ତୀ ପଦକ୍ଷେପ କଣ ରହିବ ଏହା ପାକିସ୍ତାନ ସରକାରଙ୍କ ଉପରେ ନିର୍ଭର କରୁଛି। ଉଲ୍ଲେଖଯୋଗ୍ୟ ଯେ, ଫେବୃଆରୀ-ମାର୍ଚ୍ଚରେ ପାକିସ୍ତାନରେ ଚାମ୍ପିୟନ୍ସ ଟ୍ରଫି ଖେଳାଯିବାର କାର୍ଯ୍ୟକ୍ରମ ରହିଛି।
ଭାରତୀୟ ଦଳ ଗସ୍ତ ନ କରିବା ନେଇ ପ୍ରାରମ୍ଭିକ ରିପୋର୍ଟ ଆସୁଥିବା ବେଳେ ଟୁର୍ନାମେଣ୍ଟ ହାଇବ୍ରିଡ୍ ମଡେଲରେ ଖେଳାଯିବା ନେଇ ଆଲୋଚନା ମଧ୍ୟ ହେଉଥିଲା। ତେବେ ଶୁକ୍ରବାର ପିସିବି ମୁଖ୍ୟ ଏଭଳି କୌଣସି ଯୋଜନା ନ ଥିବା ନେଇ କହିଥିଲେ। ବିସିସିଆଇ ପକ୍ଷରୁ ଖେଳାଳିଙ୍କ ସୁରକ୍ଷା ଓ ସରକାରଙ୍କ ଠାରୁ ଅନୁମତି ମିଳୁ ନ ଥିବା ଦର୍ଶାଇ ଟୁର୍ନାମେଣ୍ଟକୁ ହାଇବ୍ରିଡ ମଡେଲରେ କରିବା ପାଇଁ ଚିଠି ଲେଖା ଯାଇଥିଲା।
ପୂର୍ବରୁ ୨୦୨୨ ଏସିଆ କପ୍ ପାକିସ୍ତାନରେ ହେବାର କାର୍ଯ୍ୟକ୍ରମ ରହିଥିଲା। ଭାରତ ଯିବା ପାଇଁ ରାଜି ନ ହେବା କାରଣରୁ ପରବର୍ତ୍ତୀ ସମୟରେ ଏହା ହାଇବ୍ରିଡ୍ ମଡେଲରେ ଶ୍ରୀଲଙ୍କା ଓ ପାକିସ୍ତାନରେ ଖେଳା ଯାଇଥିଲା। ଉଭୟ ଦେଶ ମଧ୍ୟରେ୧୨ ବର୍ଷ ହେବ କୌଣସି ଦିନିକିଆ ଦ୍ୱିପାକ୍ଷିକ ସିରିଜ୍ ଖେଳା ଯାଇ ନ ଥିବା ବେଳେ ୧୭ ବର୍ଷ ହେବ ଟେଷ୍ଟ ସିରିଜ୍ ଖେଳା ଯାଇନାହିଁ।