ନୂଆଦିଲ୍ଲୀ/ଓ୍ବାଶିଂଟନ,୨୨।୧୨ : ସୀମାରେ ଭାରତ ଏବଂ ଚାଇନେ ମଧ୍ୟରେ ତିକ୍ତତା ବଢ଼ିବାରେ ଲାଗିଛି। ଏହି ସମୟରେ ଆମେରିକାର ଜଏଣ୍ଟ ଚିଫ୍ ଅଫ୍ ଷ୍ଟାଫ୍ ଜେନେରାଲ ମାର୍କ ଏ ମାଇଲି ଏବଂ ତାଙ୍କ ଭାରତୀୟ ପ୍ରତିପକ୍ଷ ଭାରତୀୟ ପ୍ରତିରକ୍ଷା ବାହିନୀର ମୁଖ୍ୟ ଜେନେରାଲ ଅନିଲ ଚୌହ୍ବାନ ପରସ୍ପର ସହ ଫୋନରେ କଥା ହୋଇଛନ୍ତି। ଦୁଇ ସାମରିକ ମୁଖ୍ୟ ଆଞ୍ଚଳିକ ତଥା ବିଶ୍ୱ ସୁରକ୍ଷା ଉପରେ ଆଲୋଚନା କରିଥିଲେ। ଦ୍ୱିପାକ୍ଷିକ ସାମରିକ ସମ୍ପର୍କକୁ ଆହୁରି ଗଭୀର କରିବାର ଉପାୟ ଉପରେ ମଧ୍ୟ ଆଲୋଚନା କରିଥିଲେ। ଜଏଣ୍ଟ ଚିଫ୍ ଅଫ୍ ଷ୍ଟାଫ୍ଙ୍କ ଉପ ମୁଖପାତ୍ର ଜୋସେଫ ଆର ହୋଲଷ୍ଟେଡ ଏନେଇ ସୂଚନା ଦେଇଛନ୍ତି।
ହୋଲଷ୍ଟେଡ କହିଛନ୍ତି ଯେ ଏକ ପ୍ରମୁଖ ପ୍ରତିରକ୍ଷା ସହଭାଗୀତାର ଅଂଶ ଭାବରେ ଆମେରିକା ଏବଂ ଭାରତ ଏକ ଶକ୍ତିଶାଳୀ ସାମରିକ ସମ୍ପର୍କ ନେଇ ସ୍ଥିତି ଆଦାନ ପ୍ରଦାନ କରିଛନ୍ତି। ଏକ ମୁକ୍ତ ଇଣ୍ଡୋ-ପାସିଫିକ ବଜାୟ ରଖିବାରେ ଭାରତ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଥିବା ସେ କହିଛନ୍ତି।
ବିବାଦୀୟ ଦକ୍ଷିଣ ଚାଇନା ସାଗରରେ ଚାଇନାର ବୃଦ୍ଧି ପାଉଥିବା ଏକଚାଟିଆ ଅଧିକାର ସମ୍ପର୍କରେ ଦୁଇ ସେନା ମୁଖ୍ୟଙ୍କ ମଧ୍ୟରେ ଚ୍ଚର୍ଚ୍ଚା ହୋଇଥିଲା।
