ଆଡିଲେଡ୍, ୧୮।୧୨- ଏଠାରେ ଅଷ୍ଟ୍ରେଲିଆ ବିପକ୍ଷରେ ଚାଲିଥିବା ପ୍ରଥମ ତଥା ଦିବାରାତ୍ର ଟେଷ୍ଟ ମ୍ୟାଚ୍ର ପ୍ରଥମ ଇନିଂସରେ ଭାରତୀୟ ଦଳ ୫୩ ରନ୍ର ଅଗ୍ରଣୀ ହାସଲ କରିଛି। ଦ୍ୱିତୀୟ ଦିନରେ ଦେଖିବାକୁ ମିଳିଥିଲା କେବଳ ବୋଲରଙ୍କ ରାଜୁତି । ପ୍ରଥମ ଦିନ ମାତ୍ର ୬ ଉଇକେଟ ପଡ଼ି ଥିବାବେଳେ ଦ୍ୱିତୀୟ ଦିନ ଏପର୍ଯ୍ୟନ୍ତ ୧୪ ଉଇକେଟର ପତନ ଘଟିଛି। ଶୁକ୍ରବାର ଭାରତୀୟ ଦଳ ତା’ର ଅସମାପ୍ତ ପ୍ରଥମ ଇନିଂସ ସ୍କୋର ୬/୨୩୩ରୁ ବ୍ୟାଟିଂ ଆରମ୍ଭ କରି ବଳକା ୪ ଉଇକେଟରେ ମାତ୍ର ୧୧ ରନ୍ ଯୋଡ଼ି ପାରିଥିଲା। ଏହାପରେ ଭାରତୀୟ ବୋଲରଙ୍କ ସମ୍ମୁଖୀନ ହୋଇ ନ ପାରି ୧୯୧ ରନ୍ରେ ଅଲଆଉଟ୍ ହୋଇଯାଇଥିଲା ଘରୋଇ ଅଷ୍ଟ୍ରେଲିଆ ଦଳ। ଫଳରେ ଭାରତୀୟ ପ୍ରଥମ ଇନିଂସରେ ୫୩ ରନ୍ର ଅଗ୍ରଣୀ ହାସଲ କରିଛି। ଭ୍ରମଣକାରୀ ଭାରତ ପାଇଁ ରବିଚନ୍ଦ୍ରନ ଅଶ୍ୱିନ ୪, ଉମେଶ ଯାଦବ ୩ ଓ ଯଶ୍ରପୀତ ବୁମରା ୨ ଉଇକେଟ ହାତେଇଥିଲେ। ଏହାପରେ ଭାରତୀୟ ଦଳ ତା’ର ଦ୍ୱିତୀୟ ଇନିଂସରେ ମାତ୍ର ୬ ଓଭର ବ୍ୟାଟିଂ କରି ପୃଥ୍ବୀ ଶ’ (୪)ଙ୍କ ଉଇକେଟ ହରାଇ ୯ ରନ କରିଛି। ଷ୍ଟମ୍ପ ଅପସାରଣ ବେଳକୁ ମୟଙ୍କ ଅଗ୍ରଓ୍ବାଲ ୫ ଓ ଖାତା ଖୋଲି ନ ଥିବା ନାଇଟ୍ ଓ୍ବାଚମ୍ୟାନ୍ ବୁମରା ଅପରାଜିତ ଅଛନ୍ତି।