ସିଡ୍ନୀ,୧୧।୧୨- ଭାରତୀୟ ଦଳର ବୋଲିଂ ବିଭାଗର କର୍ଣ୍ଣଧାର ଯଶପ୍ରୀତ ବୁମରା ଏଥର ବ୍ୟାଟ୍ରେ କମାଲ ଦେଖାଇଛନ୍ତି। ଏଠାରେ ଶୁକ୍ରବାରଠାରୁ ଅଷ୍ଟ୍ରେଲିଆ ଏ’ ବିପକ୍ଷରେ ଆରମ୍ଭ ହୋଇଥିବା ପିଙ୍କ୍ ବଲ୍ ଓ୍ବାର୍ମ ଅପ୍ ମ୍ୟାଚ୍ରେ ପୂରା ଫେଲ ମାରିଛି ଟିମ ଇଣ୍ଡିଆ। ସିଡ୍ନୀ କ୍ରିକେଟ ଗ୍ରାଉଣ୍ଡରେ ଅନୁଷ୍ଠିତ ଅଭ୍ୟାସ ମ୍ୟାଚ୍ରେ ତାରକା ଖଚିତ ଭାରତୀୟ ଦଳ ମାତ୍ର ୧୯୪ ରନ୍ରେ ଅଲଆଉଟ୍ ହୋଇଯାଇଛି। ଭ୍ରମଣକାରୀ ଦଳ ପାଇଁ ଏକମାତ୍ର ବ୍ୟାଟ୍ସମ୍ୟାନ ଭାବେ ବୁମରା ଖେଳିଛନ୍ତି ଅର୍ଦ୍ଧଶତକୀୟ ପାଳି। ସେ ୫୭ ବଲର ସମ୍ମୁଖୀନ ହୋଇ ୫୫ ରନ୍ କରିଥିଲେ। ତାଙ୍କର ଏହି ପାଳିରେ ସାମିଲ ଥିଲା ୬ ଚୌକା ଓ ୨ ଛକା।
୨୭ ବର୍ଷୀୟ ଖେଳାଳି ସମ୍ପୂର୍ଣ୍ଣ ଷ୍ଟାଇଲରେ ହାସଲ କରିଛନ୍ତି କ୍ୟାରିୟରର ପ୍ରଥମ ଅର୍ଦ୍ଧଶତକ। ଏକ ବାଉନ୍ସରକୁ ପୁଲ ଶଟ ଜରିଆରେ ଲଗାଇଥିଲେ ବିଶାଳ ଛକା। ବୁମରା ଯୁବ ପେସର ମହମ୍ମଦ ସିରାଜଙ୍କ ସହ ମିଶି ୧୦ମ ଉଇକେଟ ପାଇଁ ଦଳୀୟ ସ୍କୋରରେ ଯୋଡ଼ିଥିଲେ ୭୧ ରନ୍।