ଲିସେଷ୍ଟର,୨୭।୬: ଭାରତ ଏବଂ ଲିସେଷ୍ଟରଶାୟାର୍ ମଧ୍ୟରେ ଅଭ୍ୟାସ ମ୍ୟାଚ ଡ୍ର’ରେ ଶେଷ ହୋଇଛି। ମ୍ୟାଚର ଚତୁର୍ଥ ଦିନରେ ଲିସେଷ୍ଟରଶାୟାର୍କୁ ଜିତିବା ପାଇଁ ୩୬୭ ରନ ସ୍କୋର କରିବାକୁ ଥିଲା। ଦଳ ୭ ଉଇକେଟ ହରାଇ ୨୧୯ ରନ ସଂଗ୍ରହ କରିଥିଲେ। ୬୬ ଓଭର ପରେ ଉଭୟ ଅଧିନାୟକ ଡ୍ର’ ପାଇଁ ରାଜି ହୋଇଥିଲେ। ଦ୍ୱିତୀୟ ଇନିଂସରେ ଲିସେଷ୍ଟରଶାୟାର୍ ପାଇଁ ଶୁଭମାନ ଗିଲ ସର୍ବାଧିକ ରନ ସଂଗ୍ରହ କରିଥିଲେ। ସେ ୬୨ ରନର ଏକ ଇନିଂସ ଖେଳିଥିଲେ। ରବିଚନ୍ଦ୍ରନ ଅଶ୍ୱିନ ଭାରତ ପାଇଁ ଦୁଇଟି ଉଇକେଟ ନେଇଥିଲେ। କରୋନାରୁ ସୁସ୍ଥ ହେବା ପରେ ଅଶ୍ୱିନ ତାଙ୍କର ଫିଟନେସ ପ୍ରମାଣ ଦେଇଛନ୍ତି। ସେ ୧୧ ଓଭରର ବୋଲିଂରେ ଚମତ୍କାର ପ୍ରଦର୍ଶନ କରିଥିଲେ।
ପ୍ରଥମ ଇନିଂସରେ ଆଠ ଉଇକେଟ୍ ହରାଇ ଭାରତ ୨୪୬ ସ୍କୋର କରିଥିଲା। ଲିସେଷ୍ଟରଶାୟାର୍ ପ୍ରଥମ ଇନିଂସରେ ୨୪୪ ରନରେ ଅଲଆଉଟ୍ ହୋଇଯାଇଥିଲା। ୩୬୪ ରନ୍ରେ ଭାରତ ଦ୍ୱିତୀୟ ଇନିଂସ ଘୋଷଣା କରିଥିଲା। ଫଳରେ ଲିସେଷ୍ଟରଶାୟାର୍କୁ ଜିତିବାକୁ ୩୬୭ ରନ ଲକ୍ଷ୍ୟ ମିଳିଥିଲା।
ଟିମ ଇଣ୍ଡିଆ ଏବେ ଏଜବାଷ୍ଟନ ଯିବ। ସେଠାରେ ଇଂଲଣ୍ଡ ବିପକ୍ଷରେ ଜୁଲାଇ ୧ ରୁ ୫ ପର୍ଯ୍ୟନ୍ତ ପଞ୍ଚମ ଟେଷ୍ଟ ମ୍ୟାଚ ଖେଳିବ। ଗତ ବର୍ଷ ଅଗଷ୍ଟ-ସେପ୍ଟେମ୍ବରରେ ଟିମ ଇଣ୍ଡିଆ ଇଂଲଣ୍ଡ ଗସ୍ତରେ ଯାଇଥିଲା। ଚାରିଟି ଟେଷ୍ଟ ପରେ ଭାରତୀୟ ଦଳ ୨-୧ରେ ଆଗୁଆ ରହିଥିଲା। କରୋନା କାରଣରୁ ପଞ୍ଚମ ମ୍ୟାଚ ଖେଳାଯାଇ ପାରି ନ ଥିଲା।