ଜୋହାନ୍ସବର୍ଗ, ୧୫ା୧୧ (ପି.ଟି.): ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ଚତୁର୍ଥ ତଥା ଅନ୍ତିମ ଅନ୍ତର୍ଜାତୀୟ ଟି୨୦ ଏଠାରେ ଶୁକ୍ରବାର ହେବ। ସିରିଜରେ ଭାରତ ୨-୧ରେ ଆଗୁଆ ରହିଛି। ବର୍ତ୍ତମାନ ରିଙ୍କୁ ସିଂଙ୍କ ଫର୍ମ ଓ ବ୍ୟାଟିଂ ପୋଜିଶନ ଭ୍ରମଣକାରୀ ଦଳ ପାଇଁ ଏବେ ଏକ ଚିନ୍ତାର ବିଷୟ ହୋଇଛି। ସଞ୍ଜୁ ସାମସନ ଓ ତିଲକ ବର୍ମା ଇତିମଧ୍ୟରେ ଶତକ ହାସଲ କରିଛନ୍ତି। ଏହା ସତ୍ତ୍ୱେ ୩-୧ରେ ସିରିଜ ଜିତିବାକୁ ହେଲେ ଶୁକ୍ରବାର ମ୍ୟାଚରେ ଦଳଗତ ପ୍ରଦର୍ଶନର ଆବଶ୍ୟକତା ରହିଛି। ଦି ଓ୍ବାଣ୍ଡରର୍ସ ‘ବୁଲ୍ ରିଙ୍ଗ’ ପିଚ୍ ସବୁବେଳେ ଭାରତୀୟ ଦଳକୁ ସୁହାଇ ଆସିଛି। ଏଠାରେ ୨୦୦୭ରେ ପାକିସ୍ତାନକୁ ହରାଇ ଭାରତ ଟି୨୦ ବିଶ୍ୱକପ୍ ଫାଇନାଲ ଜିତିଥିଲା। ବର୍ଷକ ପୂର୍ବେ ଦୁଇ ଦଳ ମଧ୍ୟରେ ଅନୁଷ୍ଠିତ ଟି୨୦ ସିରିଜ ବେଳେ ଅଧିନାୟକ ସୂର୍ଯ୍ୟକୁମାର ଯାଦବ ଏହି ଷ୍ଟାଡିୟମରେ ଏକ ଶତକ ହାସଲ କରିଥିଲେ। ଦଳର ବିଜୟରେ ଏହା ସହାୟକ ହୋଇଥିଲା।
ଭାରତୀୟ ଅଧିନାୟକଙ୍କ ବିଜୟ ପ୍ରତିଶତ ୮୧.୨୫ ରହିଛି। ଦଳ ଗତ ୧୬ଟି ମ୍ୟାଚରୁ ୧୩ଟିରେ ବିଜୟ ହାସଲ କରିଛି। ଗତ ସରିଜ ୧-୧ରେ ଡ୍ର ରହିଥିଲା। ଗୋଟିଏ ମ୍ୟାଚ ବର୍ଷା ଯୋଗୁ ବାତିଲ କରାଯାଇଥିଲା। ଟି୨୦ କ୍ରିକେଟର ଅନ୍ୟତମ ଦକ୍ଷ ଖେଳାଳି ବିବେଚନା କରାଯାଉଥିବା ରିଙ୍କୁ ଭଲ ଖେଳିପାରୁ ନ ଥିବାରୁ କ’ଣ କରାଯାଇପାରିବ ସେ ନେଇ ଦଳ ଚିନ୍ତିତ। ଗତ କିଛି ମାସ ହେଲା ତାଙ୍କଠାରୁ ଆଶାନୁରୂପ ପ୍ରଦର୍ଶନ ଦେଖିବାକୁ ମିଳୁନି। ତାଙ୍କୁ ବର୍ତ୍ତମାନ ୬ଷ୍ଠ କିମ୍ବା ୭ମ ସ୍ଥାନରେ ବ୍ୟାଟିଂ ପାଇଁ ପଠାଯାଉଛି।
ଆଲିଗଡ଼ର ଏହି ଖେଳାଳିଙ୍କୁ ହୁଏତ ଏହି ପୋଜିଶନ ସୁହାଉ ନ ଥିବା ଅନେକେ କହୁଛନ୍ତି। ପରବର୍ତ୍ତୀ ବିଶ୍ୱକପ୍ ୨୦୨୬ରେ ହେବ। ଏହା ପୂର୍ବରୁ ରିଙ୍କୁଙ୍କୁ ସେଟ୍ କରିବା ଲାଗି ଅଧିନାୟକ ସୂର୍ଯ୍ୟକୁମାରଙ୍କ ନିକଟରେ ଯଥେଷ୍ଟ ସମୟ ଅଛି। ଚଳିତ ସିରିଜରେ ରିଙ୍କୁ ଦୁଇଟି ଗେମ୍ରେ ୬ ନମ୍ବର ଏବଂ ଅନ୍ୟଟିରେ ୭ ନମ୍ବର ସ୍ଥାନରେ ବ୍ୟାଟିଂ କରିବାକୁ ଆସି ମୋଟ (୧୧, ୨, ୮) ୩୪ ବଲ୍ରେ ୨୮ ରନ ସଂଗ୍ରହ କରିଛନ୍ତି। ରିଙ୍କୁ ହେଉଛନ୍ତି ଜଣେ ଫିନିଶର ସ୍ପେଶାଲିଷ୍ଟ। ଯେତେବେଳେ ବ୍ୟାଟିଂ ଅର୍ଡରରେ ତାଙ୍କୁ ୫ମ ସ୍ଥାନରେ ପଠାଯାଇଛି, ସେ ଭଲ ପ୍ରଦର୍ଶନ କରିଥିବା ପରିଲକ୍ଷିତ ହୋଇଛି। କିନ୍ତୁ ସଞ୍ଜୁ ସାମସନ ଇତିମଧ୍ୟରେ ଜଣେ ଓପନର ଭାବେ ସେଟ୍ ହୋଇସାରିଛନ୍ତି। ତିଲକ ବର୍ମା ୩ନମ୍ବର ସ୍ଥାନର ପ୍ରକୃତ ଦାବିଦାର ଭାବେ ସାବ୍ୟସ୍ତ କରିପାରିଛି। ହାର୍ଦ୍ଦିକ ପାଣ୍ଡ୍ୟାଙ୍କୁ ଅତିକ୍ରମ କରି ରିଙ୍କୁ ଆଗକୁ ଯାଇପାରିବେ ନାହିଁ।ଏହି ସମସ୍ୟାର ଯେତେଶୀଘ୍ର ସମାଧାନ କରାଯାଇପାରିବ ସେଦିଗରେ ଟିମ୍ ମ୍ୟାନେଜମେଣ୍ଟ ଧ୍ୟାନଦେବା ଉଚିତ।
ସିରିଜ ପାଇଁ ମନୋନୀତ ୧୫ ଖେଳାଳିଙ୍କ ମଧ୍ୟରେ ୧୨ଜଣ ପ୍ରଥମ ୩ଟି ମ୍ୟାଚରେ ଖେଳିସାରିଛନ୍ତି। ପିଚ୍ ପେସ୍ ବୋଲିଂକୁ ସୁହାଉଥିବା କୁହାଯାଉଥିବାରୁ ଏଥର ଯଦି ଦଳ ପରିବର୍ତ୍ତନ କରାଯାଏ ତେବେ ଦୁଇଜଣ ନୂଆ ପେସ୍ ବୋଲର ୟସ ଚୋପ୍ରା ଓ ଭିସାଖ ବିଜୟ କୁମାରଙ୍କ ମଧ୍ୟରୁ ଜଣଙ୍କୁ ଖେଳିବା ସୁଯୋଗ ମିଳିପାରେ।
ଏହି ମ୍ୟାଚ୍ ଭାରତୀୟ ସମୟ ୮.୩୦ରେ ଆରମ୍ଭ ହେବ। Sports18ରେ ଏହି ମ୍ୟାଚ୍ର ଲାଇଭ୍ ଦେଖିପାରିବେ। ଏହା ସହ ଜିଓ ଜିନେମାରେ ଏହି ମ୍ୟାଚ୍ର ଲାଇଭ୍ ଷ୍ଟ୍ରିମିଂ ହେବ।