ନୂଆଦିଲ୍ଲୀ,୨୯ା୧୦: ଟି-୨୦ ବିଶ୍ୱକପ୍ରେ ଭାରତ-ଦକ୍ଷିଣ ଆଫ୍ରିକା ମଧ୍ୟରେ ରବିବାର ହେବ ହାଇଭୋଲ୍ଟେଜ ମୁକାବିଲା। ଦୁଇ ଦଳ ମଧ୍ୟରେ ମ୍ୟାଚ ବେଶ୍ ରୋମାଞ୍ଚକର ହେବ ବୋଲି ଆଶା କରାଯାଉଛି। ପର୍ଥ ଗ୍ରାଉଣ୍ଡରେ ଖେଳାଯିବାକୁ ଥିବା ଏହି ମ୍ୟାଚ୍ରେ ଭାରତୀୟ ବ୍ୟାଟିଂ ଏବଂ ଦକ୍ଷିଣ ଆଫ୍ରିକାର ବୋଲିଂ ମଧ୍ୟରେ ମୁକାବିଲା ହେବ ବୋଲି କହିଛନ୍ତି ପୂର୍ବତନ ଦକ୍ଷିଣ ଆଫ୍ରିକା ଅଲ୍ରାଉଣ୍ଡର ଲାନ୍ସ କ୍ଲୁଜନର।
ଭାରତ ଗ୍ରୁପ ୨ରେ ଦୁଇଟି ବିଜୟ ସହ ଶୀର୍ଷରେ ରହିଥିବା ବେଳେ ଦକ୍ଷିଣ ଆଫ୍ରିକା ୩ ପଏଣ୍ଟ ପାଇ ଦ୍ୱିତୀୟରେ ରହିଛି। ପର୍ଥରେ ଆଉ ଜଣେ ଦ୍ରୁତ ବୋଲରଙ୍କୁ ଦଳରେ ସାମିଲ କରିବା ସମ୍ଭାବନା ରହିଥିବା କ୍ଲୁଜନର କହିଛନ୍ତି।
ଅନ୍ୟପକ୍ଷେ ଭାରତ ତା’ର ବିଜୟ ଅଭିଯାନ ଜାରି ରଖିବାକୁ ଆପ୍ରାଣ ଚେଷ୍ଟା କରିବ। ଏପରିକି ମ୍ୟାଚ ଜିତି ବିଶ୍ୱକପ୍ରେ ନିଜ ସ୍ଥିତି ସୁରକ୍ଷିତ କରିବ ବୋଲି ଦଳ ଆଶା ରଖିଛି।