ଭାରତୀୟ ମହିଳା କ୍ରିକେଟ ଦଳ ପ୍ରାୟ ଏକ ବର୍ଷ ପରେ ପଡ଼ିଆକୁ ଫେରିଛନ୍ତି। ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ୫ ମ୍ୟାଚ ବିଶିଷ୍ଟ ଏକଦିବସୀୟ ସିରିଜ ରବିବାର ଠାରୁ ଆରମ୍ଭ ହୋଇଛି। ପ୍ରଥମ ଦିନିକିଆରେ ଦକ୍ଷିଣ ଆଫ୍ରିକା ଟସ ଜିତି ଭାରତକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା। ଭାରତୀୟ ମହିଳା ଦଳ ୩୬୪ ଦିନ ପରେ ପଡ଼ିଆରେ ଅବତରଣ କରିଥିଲେ। ଭାରତର ତାରକା ମହିଳା କ୍ରିକେଟର ମିଥାଲି ରାଜ ପଡ଼ିଆରେ ଅବତରଣ କରିବା ପରେ ତାଙ୍କ ନାମରେ ଅନେକ ରେକର୍ଡ କରିଥିଲେ। ମିତାଲି ଅନ୍ତର୍ଜାତୀୟ କ୍ରିକେଟର ଚତୁର୍ଥ ଦଶନ୍ଧି ଖେଳୁଛନ୍ତି। ୧୯୯୯ରୁ ଅନ୍ତର୍ଜାତୀୟ ଏକଦିବସୀୟ କ୍ରିକେଟରେ ଡେବ୍ୟୁ କରିଥିଲେ। ଏହା ସହ ସେ ଦୀର୍ଘ ଦିନର ଏକଦିବସୀୟ କ୍ୟାରିୟର ପ୍ରସଙ୍ଗରେ ବିଶ୍ୱ ଭେଟେରାନ ଶ୍ରୀଲଙ୍କା କ୍ରିକେଟର ସନଥ ଜୟସୁରିୟାଙ୍କୁ ଅତିକ୍ରମ କରିଛନ୍ତି। ସଚିନ ତେନ୍ଦୁଲକରଙ୍କ ପରେ ମିତାଲି ଦୀର୍ଘ ଏକଦିବସୀୟ କ୍ୟାରିୟରବିଶିଷ୍ଟ ଖେଳାଳି ହୋଇଛନ୍ତି।
ସଚିନଙ୍କ ଏକଦିବସୀୟ କ୍ୟାରିୟର ୨୨ ବର୍ଷ ୯୧ ଦିନ ଥିଲା। ଏଥି ସହିତ ମିତାଲି ରାଜଙ୍କ ଏକଦିବସୀୟ କ୍ୟାରିୟର ୨୧ ବର୍ଷ ୨୫୪ ଦିନ ହୋଇସାରିଛି। ଦୀର୍ଘତମ ଏକଦିବସୀୟ କ୍ୟାରିୟର ସହିତ କ୍ରିକେଟର ତାଲିକାରେ ସନଥ ଜୟସୁରିୟା ତୃତୀୟ, ଯାହାଙ୍କ କ୍ୟାରିୟର ୨୧ ବର୍ଷ ୧୮୪ ଦିନ ଥିଲା। ଜାଭେଦ ମିଆନ୍ଦାଦ ୨୦ ବର୍ଷ ୨୭୨ ଦିନ ସହିତ ଚତୁର୍ଥ ସ୍ଥାନରେ ଏବଂ କ୍ରିସ୍ ଗେଲ ୧୯ ବର୍ଷ ୩୩୭ ଦିନ ସହିତ ପଞ୍ଚମ ସ୍ଥାନରେ ଅଛନ୍ତି। ୩୮ ବର୍ଷ ବର୍ଷିୟା ମିତାଲି ଜୁନ୍ ୨୬, ୧୯୯୯ରେ ଆୟର୍ଲାଣ୍ଡ ବିପକ୍ଷରେ ଦିନିକିଆ ଡେବ୍ୟୁ କରିଥିଲେ। ସେ ୨୦୯ଟି ଏକଦିବସୀୟ ମ୍ୟାଚ୍ ଖେଳି ୬ ହଜାର ୮୮୮ ରନ କରିଛନ୍ତି। ସେଥିରେ ସେ ୭ଟି ଶତକ ଏବଂ ୫୩ ଅର୍ଦ୍ଧଶତକ ଅଛି। ଏହା ବ୍ୟତୀତ ମିତାଲି ମଧ୍ୟ ୧୦ଟି ଟେଷ୍ଟ ଏବଂ ୮୯ଟି -୨୦ ମ୍ୟାଚରେ ଭାରତର ପ୍ରତିନିଧିତ୍ୱ କରିଥିଲେ।
