ନୂଆଦିଲ୍ଲୀ,୧୪।୧୨:ନିକଟରେ ବିସିସିଆଇ ବିରାଟ କୋହଲିଙ୍କୁ ଦିନିକିଆ ଅଧିନାୟକରୁ ହଟାଇ ରୋହିତ ଶର୍ମାଙ୍କୁ ନୂତନ ଅଧିନାୟକ ଦାୟିତ୍ୱ ଦେଇଛି। ଏହାକୁ ନେଇ ଟିମ ଇଣ୍ଡିଆରେ କିଛି ବିବାଦ ଲାଗି ରହିଛି। ବିରାଟ କୋହଲି ବିସିସିଆଇର ଏହି ନିଷ୍ପତ୍ତି ଉପରେ ଖପ୍ପା ଅଛନ୍ତି ଏବଂ ଦକ୍ଷିଣ ଆଫ୍ରିକାରେ ଅନୁଷ୍ଠିତ ହେବାକୁ ଥିବା ଦିନିକିଆ ସିରିଜରୁ ବିଶ୍ରାମ ନେବା କହି ଓହରି ଯାଇଥିବା ବିଭିନ୍ନ ଗଣମାଧ୍ୟମରେ ଚର୍ଚ୍ଚା ହେଉଛି। କୋହଲି ଏପରି ନିଷ୍ପତ୍ତି ରାଗରେ ନେଇଥିବା କୁହାଯାଉଛି। ବିରାଟ କୋହଲିଙ୍କ ବିଶ୍ରାମ ଖବର ମଧ୍ୟ ଆଶ୍ଚର୍ଯ୍ୟଜନକ କାରଣ ସେ ତିନି ମ୍ୟାଚ ବିଶିଷ୍ଟ ଟି-୨୦ ଅନ୍ତର୍ଜାତୀୟ ସିରିଜ ଏବଂ ଟି -୨୦ ବିଶ୍ୱକପ ୨୦୨୧ ପରେ ନ୍ୟୁଜିଲାଣ୍ଡ ବିପକ୍ଷରେ ଗୋଟିଏ ଟେଷ୍ଟ ମ୍ୟାଚରୁ ବିଶ୍ରାମ ନେଇଥିଲେ। ଏଭଳି ପରିସ୍ଥିତିରେ ବିରାଟ କୋହଲି କାହିଁକି ଏହି ପଦକ୍ଷେପ ନେଉଛନ୍ତି ବୋଲି ବଡ ପ୍ରଶ୍ନ ହେଉଛି।
ଏହାର ଅର୍ଥ ରୋହିତ ଶର୍ମାଙ୍କ ଅଧିନାୟକତ୍ୱରେ ବିରାଟ କୋହଲିଙ୍କୁ ଦେଖିବାକୁ ମିଳିବ ନାହିଁ। ଦକ୍ଷିଣ ଆଫ୍ରିକା ଗସ୍ତ ଭାରତ ଡିସେମ୍ବର ୨୬ରୁ ଆରମ୍ଭ କରିବ। ଏଠାରେ ସେମାନଙ୍କୁ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଏବଂ ଏକ ମ୍ୟାଚ ବିଶିଷ୍ଟ ଦିନିକିଆ ସିରିଜ ଖେଳିବାକୁ ପଡିବ। ଜାନୁଆରୀ ୧୯ରୁ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ପ୍ରଥମ ଦିନିକିଆ ମ୍ୟାଚ ଖେଳାଯିବ।
ଦକ୍ଷିଣ ଆଫ୍ରିକା ବିପକ୍ଷରେ ତିନି ମ୍ୟାଚ ବିଶିଷ୍ଟ ଟେଷ୍ଟ ସିରିଜରୁ ରୋହିତ ଶର୍ମା ବାଦ ପଡିଛନ୍ତି। ତାଙ୍କ ଆଘାତ ଗୁରୁତର ବୋଲି କୁହାଯାଉଛି ଏବଂ ଏଭଳି ପରିସ୍ଥିତିରେ ସେ ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ ବିଶିଷ୍ଟ ଦିନିକିଆ ସିରିଜ ଖେଳିବା ନେଇ ସନ୍ଦେହ ରହିଛି। ଏବେ ବିସିସିଆଇର ସମସ୍ୟା ହେଉଛି ଯେ ଦିନିକିଆ ସିରିଜରେ କିଏ ଟିମ ଇଣ୍ଡିଆକୁ ଅଧିନାୟକ କରିବ? ଏହାପୂର୍ବରୁ ବିସିସିଆଇ ଟିମ ଇଣ୍ଡିଆର ଉପ-ଅଧିନାୟକଙ୍କ ନାମ ଦିନିକିଆ ସିରିଜ ପାଇଁ ଘୋଷଣା କରିନାହିଁ।