ବେଙ୍ଗାଲୁରୁ,୧୩।୩: ବେଙ୍ଗାଲୁରୁରେ ଭାରତ ଏବଂ ଶ୍ରୀଲଙ୍କା ମଧ୍ୟରେ ଖେଳାଯାଇଥିବା ପିଙ୍କ୍ ବଲ ଟେଷ୍ଟରେ ପ୍ରଶଂସକମାନେ ବିରାଟ କୋହଲିଙ୍କ ୭୧ ତମ ଶତକକୁ ଅପେକ୍ଷା କରିଥିଲେ। କିନ୍ତୁ ଏହି ଟେଷ୍ଟର ପ୍ରଥମ ଇନିଂସରେ ସେ ୨୩ ରନ କରି ଆଉଟ ହୋଇଥିଲେ ଏବଂ ଦ୍ୱିତୀୟରେ ମଧ୍ୟ ସେ ୧୩ ରନ ସଂଗ୍ରହ କରିଥିଲେ। ବର୍ତ୍ତମାନ ଉଭୟ ଇନିଂସରେ ବିଫଳ ହେବା ପରେ କୋହଲିଙ୍କ ଟେଷ୍ଟ ହାରାହାରି ମଧ୍ୟ ୫୦କୁ ଖସି ଆସିଛି। କୋହଲିଙ୍କ ହାରାହାରି ୫୦କୁ ବଜାୟ ରଖିବା ପାଇଁ ଏହି ମ୍ୟାଚରେ ୪୩ ରନ କରିବାର ଥିଲା। କିନ୍ତୁ ସେ ଏହା କରିବାରେ ବିଫଳ ହୋଇଥିଲେ। କୋହଲି ବର୍ତ୍ତମାନ ୧୦୧ ଟେଷ୍ଟ ମ୍ୟାଚରେ ହାରାହାରି ୪୯.୯୫ରେ ୮୦୪୩ ରନ କରିଛନ୍ତି। ଏହି ସମୟ ମଧ୍ୟରେ, ୨୭ଟି ଶତକ ଏବଂ ୨୮ ଅର୍ଦ୍ଧଶତକ ସେ କରିଛନ୍ତି। ନୀର୍ଘ ୫ ବର୍ଷ ପରେ କୋହଲିଙ୍କ ହାରାହାରି ୫୦ ତଳକୁ ଖସିଛି।
୨୦୧୭ରେ ଶ୍ରୀଲଙ୍କା ବିପକ୍ଷ କୋଲକାତା ଟେଷ୍ଟର ଦ୍ୱିତୀୟ ଇନିଂସ ପରଠାରୁ ବିରାଟ କୋହଲିଙ୍କ ଟେଷ୍ଟ ବ୍ୟାଟିଂ ହାରାହାରି ୪୦ଟି ଟେଷ୍ଟରେ ପ୍ରଥମ ଥର ପାଇଁ ୫୦ ତଳକୁ ଖସି ଆସିଛି। ନଭେମ୍ବର ୨୦୧୯ରେ ବିରାଟ କୋହଲି ଅନ୍ତର୍ଜାତୀୟ କ୍ରିକେଟରେ ଶେଷ ଶତକ ସ୍କୋର କରିଥିଲେ। ସେ ବାଂଲାଦେଶ ବିପକ୍ଷରେ କୋଲକାତା ଟେଷ୍ଟ ମ୍ୟାଚରେ ୧୩୬ ରନ ସ୍କୋର କରିଥିଲେ।
