ନୂଆଦିଲ୍ଲୀ,୧୧।୮: କ୍ରମାଗତ ଭାବେ ଭାରତୀୟ ଡ୍ରୋନ୍ ବଜାର ଦ୍ରୁତ ଅଭିବୃଦ୍ଧି ପଥରେ ରହିଛି, ଯାହା ୧୭.୦ %ର ଏକ କମ୍ପାଉଣ୍ଡ ଆନୁଆଲ ଗ୍ରୋଥ୍ ରେଟ୍ (ସିଏଜିଆର୍)ରେ ୨୦୨୪ର ୬୫୪ ମିଲିୟନ ଡଲାରରୁ ୨୦୨୯ରେ ୧୪୩୭ ମିଲିୟନ ଡଲାରକୁ ବୃଦ୍ଧି ପାଇବ ବୋଲି ଆକଳନ କରାଯାଇଛି। ଏପରିକି ଏହି ବୃଦ୍ଧି କୃଷି, ପ୍ରତିରକ୍ଷା ଓ ଇ-କମର୍ସ ଭଳି ବିବିଧ ପ୍ଲାଟ୍ଫର୍ମ(କ୍ଷେତ୍ର)ଗୁଡିକରେ ବଢୁଥିବା ଚାହିଦା ଦ୍ୱାରା ବହୁମାତ୍ରାରେ ପରିଚାଳିତ ହୋଇଛି। ଏପରିକି ୨୦୩୦ ସୁଦ୍ଧା ଭାରତ ଡ୍ରୋନ୍ ଟେକ୍ନୋଲୋଜି କ୍ଷେତ୍ରରେ ଏକ ଗ୍ଲୋବାଲ ଲିଡର ହେବ ବୋଲି ଆକଳନ କରାଯାଉଛି। ଏହି ପରିପ୍ରେକ୍ଷୀରେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦ୍ୱାରା ‘କୌଶଳ ରଥ’ ଅଭିଯାନର ଔପଚାରିକ ଉଦ୍ଘାଟନ ନିକଟରେ ହୋଇଯାଇଛି। ଏହା ସହ ଓଡ଼ିଶା ଦ୍ରୁତ ଅଭିବୃଦ୍ଧିଶୀଳ ଶିଳ୍ପରେ ଏକ ପ୍ରମୁଖ ରାଜ୍ୟ ଭାବେ ପରିଣତ ହେବାର ଆକାଂକ୍ଷାକୁ ଏକ ମହତ୍ତ୍ୱପୂର୍ଣ୍ଣ ପ୍ରୋତ୍ସାହନ ମିଳିଛି। ସେହିଭଳି ସ୍କିଲ୍ଡ-ଇନ୍-ଓଡ଼ିଶା ମିଶନ ଅଧୀନରେ ଏହି ପଦକ୍ଷେପର ଏକ ଅଂଶ ଭାବେ ଓଡ଼ିଶାରେ ଅବସ୍ଥାପିତ ଏକ ଡ୍ରୋନ୍ ଟେକ୍ନୋଲୋଜି ଓ ଆନାଲିଟିକ୍ସ କମ୍ପାନୀ ‘ଆଇଜି ଡ୍ରୋନ୍ସ’ ଜାତୀୟ ଦକ୍ଷତା ବିକାଶ ନିଗମ (ଏନ୍ଏସ୍ଡିସି) ଦ୍ୱାରା ଅନୁମୋଦିତ ପାଠ୍ୟକ୍ରମଗୁଡିକୁ ବିଭିନ୍ନ ଶିକ୍ଷାନୁଷ୍ଠାନରେ ଆରମ୍ଭ କରିଛି। ଏହା ମାଧ୍ୟମରେ ଆଡ୍ଭାନ୍ସଡ ଡ୍ରୋନ୍ ଟେକ୍ନୋଲୋଜି ଫଣ୍ଡାମେଣ୍ଟାଲ୍ସ ସହିତ ଏ କ୍ଷେତ୍ରରେ ୧୦,୦୦୦ରୁ ଅଧିକ ଯୁବପିଢ଼ିଙ୍କୁ ପ୍ରଶିକ୍ଷଣ ପ୍ରଦାନ କରିବା ପାଇଁ କମ୍ପାନୀ ପ୍ରସ୍ତୁତ ରହିଛି। ଆଇଜି ଡ୍ରୋନ୍ସ ନିକଟରେ ସ୍ବତନ୍ତ୍ର ଭାବେ ନିର୍ମିତ ଏକ ଅତ୍ୟାଧୁନିକ ଡ୍ରୋନ୍ ସିମୁଲେଟର ରହିଛି, ଯାହାକି ସ୍ବଦେଶୀ ଭାବେ ବିକଶିତ ଓ ଭାରତର ପ୍ରଥମ ସିମୁଲେଟର । ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପସ୍ଥିତିରେ ଶୁଭାରମ୍ଭ କରାଯାଇଥିଲା। ସେହିପରି ୨ ଯୁବ ଓଡ଼ିଆ ଉଦ୍ୟୋଗୀ ବୋଧିସତ୍ୱ ସଂଘପ୍ରିୟା ଓ ଓମ୍ପ୍ରକାଶଙ୍କ ଦ୍ୱାରା ସ୍ଥାପିତ ଆଇଜି ଡ୍ରୋନ୍ସ ୨୦୩୦ ସୁଦ୍ଧା ଭାରତକୁ ଏକ ଗ୍ଲୋବାଲ ଡ୍ରୋନ୍ ହବ୍ରେ ପରିଣତ କରାଇବା ଯାତ୍ରାରେ ଓଡ଼ିଶାକୁ ଏକ ଗୁରୁତ୍ୱପୂର୍ଣ୍ଣ ରାଜ୍ୟ ଭାବେ ଅବସ୍ଥାପିତ କରିବା ଲାଗି ପ୍ରତିବଦ୍ଧ ରହିଛନ୍ତି। ଏପରିକି କମ୍ପାନୀର ପ୍ରୟାସଗୁଡିକ ରାଜ୍ୟର ପ୍ରତିଭାମାନଙ୍କୁ ଉପଯୋଗ କରିବା ସହ ସେମାନଙ୍କୁ ଡ୍ରୋନ୍ ଟେକ୍ନୋଲୋଜି କ୍ଷେତ୍ରରେ ଅତ୍ୟାଧୁନିକ ଦକ୍ଷତା ପ୍ରଦାନ କରିବା ଦିଗରେ ପ୍ରସ୍ତୁତ ରହିଛି, ଯାହାର ନିଯୁକ୍ତି ବଜାରରେ ଯଥେଷ୍ଟ ଅଧିକ ଚାହିଦା ରହିଛି। ଏ ସମ୍ପର୍କରେ ଆଇଜି ଡ୍ରୋନ୍ସର ଏମ୍ଡି ବୋଧିସତ୍ୱ ସଂଘପ୍ରିୟା କହିଛନ୍ତି,ଡ୍ରୋନ ଶିଳ୍ପରେ ଏକ ପ୍ରମୁଖ ଖେଳାଳି ହେବା ପାଇଁ ଓଡ଼ିଶା ନିକଟରେ ଅପାର କ୍ଷମତା ରହିଛି। ଏପରିକି କୌଶଳ ରଥ ଅଭିଯାନ ମାଧ୍ୟମରେ ଆମେ ଯୁବପିଢ଼ିଙ୍କୁ ଡ୍ରୋନ୍ ଟେକ୍ନୋଲୋଜି ଓ ଆର୍ଟିଫିସିଆଲ ଇଣ୍ଟେଲିଜେନ୍ସ କ୍ଷେତ୍ରର ଅତ୍ୟାଧୁନିକ ଦକ୍ଷତା ସହ ସୁସଜ୍ଜିତ କରିବା ପାଇଁ ଲକ୍ଷ୍ୟ ରଖିଛୁ, ଯାହା ଭବିଷ୍ୟତ ପାଇଁ ଜରୁରୀ । ଆମର ସ୍ବତନ୍ତ୍ର ଆଭିମୁଖ୍ୟ ବ୍ୟବହାରିକ ଅଭିଜ୍ଞତା ଉପରେ ଗୁରୁତ୍ୱ ଦେଉଛି, ଯାହା ଆମର ପ୍ରଶିକ୍ଷାର୍ଥୀମାନେ ଯେପରି ନିଯୁକ୍ତି ପାଇଁ ପ୍ରସ୍ତୁତ ରହିବେ ଏବଂ ବିଭିନ୍ନ ଶିଳ୍ପରେ ଏଭଳି ଦକ୍ଷତାଗୁଡିକୁ ଉପଯୋଗ କରିବାକୁ ସକ୍ଷମ ହେବେ ତାହା ସୁନିଶ୍ଚିତ କରୁଛି। ସେହିଭଳି ସରକାରୀ ଆଇଟିଆଇ ଲକ୍ଷ୍ମୀପୁର କୋରାପୁଟର ପ୍ରିନ୍ସିପାଲ ଇଞ୍ଜିନିୟର ସୁଭେନ କୁମାର ବେହେରା କହିଛନ୍ତି, ଓଡ଼ିଶା ସରକାରଙ୍କ ଏକ ପ୍ରଶଂସନୀୟ ପଦକ୍ଷେପ କୌଶଳ ରଥ ମୋ ଶିକ୍ଷାନୁଷ୍ଠାନର ଛାତ୍ରୀଛାତ୍ରମାନଙ୍କୁ ଆଇଜି ଡ୍ରୋନ୍ ମାଧ୍ୟମରେ ଡ୍ରୋନ୍ ଟେକ୍ନୋଲୋଜିର ମୌଳିକତା ଉପରେ ତାଲିମ ପ୍ରଦାନ କରିଛି। ଏହି କାର୍ଯ୍ୟକ୍ରମ ସେମାନଙ୍କୁ ସ୍କିଲ୍ ଇଣ୍ଡିଆ ଏନ୍ଏସ୍ଡିସି ଅନୁମୋଦିତ ପାଠ୍ୟକ୍ରମଗୁଡିକର ଜ୍ଞାନ ସହ ସମୃଦ୍ଧ କରିଛି। କୌଶଳ ରଥ ଅଭିଯାନକୁ ବିଶେଷକରି ସୁଦୂର ଅଣସଂରକ୍ଷିତ ଅଞ୍ଚଳଗୁଡିକରେ ଓଡ଼ିଶାର ଛାତ୍ରୀଛାତ୍ରମାନଙ୍କୁ ଅତ୍ୟାଧୁନିକ ଦକ୍ଷତା ବିକାଶ ସୁଯୋଗ ପ୍ରଦାନ କରିବା ପାଇଁ ଡିଜାଇନ କରାଯାଇଛି।