ଭୁବନେଶ୍ୱର,୨୯।୧୨ (ଅଭୟ ଦାଶ):ଦେଶର ସର୍ବବୃହତ୍ ଟେଲିକମ୍ କମ୍ପାନୀ ଜିଓ ଆଇଆଇଟି,ବମ୍ବେ ସହ ମିଶି ‘ଭାରତ ଜିପିଟି’ ପ୍ରୋଗାମ ନିର୍ମାଣ କରିବା ଉପରେ କାର୍ଯ୍ୟ କରୁଛି ବୋଲି ରିଲାଏନ୍ସ ଜିଓ ଇନ୍ଫୋକମ୍ର ଅଧ୍ୟକ୍ଷ ଆକାଶ ଅମ୍ବାନୀ ଆଇଆଇଟି,ବମ୍ବେର ବାର୍ଷିକ ଟେକ୍ ଫେଷ୍ଟ କାର୍ଯ୍ୟକ୍ରମରେ ଯୋଗଦେଇ କହିଛନ୍ତି। ଏଥିସହ କମ୍ପାନୀ ମଧ୍ୟ ଟେଲିଭିଜନ ପାଇଁ ଏକ ନୂଆ ଅପରେଟିଂ ସିଷ୍ଟମ୍ (ଓଏସ୍) ଆରମ୍ଭ କରିବା ଦିଗରେ କାର୍ଯ୍ୟ କରୁଥିବା ବେଳେ କମ୍ପାନୀ ପାଇଁ ବିକାଶର ପରିବ୍ୟବସ୍ଥା ନିର୍ମାଣ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ‘ଜିଓ-୨.୦’ର ଭିଜନ ଉପରେ କାମ ଚାଲିଥିବା ସେ ବିସ୍ତୃତ ଭାବେ ମତପ୍ରକାଶ କରିଛନ୍ତି। ସେହିଭଳି ଜିଓ ପକ୍ଷରୁ ଆଇଆଇଟି, ବମ୍ବେ ସହ ଭାରତ ଜିପିଟି ପ୍ରୋଗ୍ରାମ ଆରମ୍ଭ କରିବା ପାଇଁ ଏକ ପ୍ରକଳ୍ପ ଉପରେ କାମ କରାଯାଉଥିବା ସୂଚନା ଦେବା ସହିତ ବର୍ତ୍ତମାନ ଲାର୍ଜ ଲାଙ୍ଗୁଏଜ୍ ମଡେଲ ଏବଂ ଜେନେରେଟିଭ୍ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ଉପରେ କାମ ଚାଲିଥିବା ଆକାଶ ମତବ୍ୟକ୍ତ କରିଛନ୍ତି। ଏଆଇ ଅର୍ଥ ଆର୍ଟିଫିସିଆଲ ଇଣ୍ଟେଲିଜେନ୍ସ, କିନ୍ତୁ ଏହା ସମସ୍ତଙ୍କ ପାଇଁ ଉଦ୍ଦିଷ୍ଟ ବୋଲି ସେ କହିଛନ୍ତି। ସେହିପରି ଟିଭି ପାଇଁ ଜିଓ ନିଜର ଓଏସ୍ ଉପରେ ବେଶ୍ କିଛି ସମୟ ହେବ କାର୍ଯ୍ୟ କରୁଛି ଏବଂ ଏହାକୁ କିପରି ଶୁଭାରମ୍ଭ କରାଯିବ ସେ ନେଇ ମଧ୍ୟ ଆମେ ବ୍ୟାପକ ଭାବେ ଚିନ୍ତା କରୁଛୁ ବୋଲି ଆକାଶ କହିଛନ୍ତି। ଆଗାମୀ ଦିନରେ ଦେଶ ପାଇଁ ଏଆଇ ପ୍ଲାଟ୍ଫର୍ମ ନିର୍ମାଣ ଦିଗରେ ଜିଓ କାର୍ଯ୍ୟ କରୁଥିବା ପ୍ରକାଶ କରିବା ସହିତ ଏହି କ୍ଷେତ୍ରରେ କମ୍ପାନୀ ଗଣମାଧ୍ୟମ, ବାଣିଜ୍ୟ,ଯୋଗାଯୋଗ ଏବଂ ନୂଆ ଉପକରଣ ବା ଡିଭାଇସ୍ ଆଦି ଉପରେ ମଧ୍ୟ କାର୍ଯ୍ୟ କରୁଥିବା ଆକାଶ କହିଛନ୍ତି। କମ୍ପାନୀ ୫ଜି ଘରୋଇ ନେଟ୍ୱର୍କ ପ୍ରଦାନ କରିବାକୁ ବେଶ୍ ଉତ୍ସାହିତ ଏବଂ ଯେକୌଣସି ଆକାରର ଉଦ୍ୟୋଗକୁ ଏହା ୫ଜି ଷ୍ଟାକ୍ ପ୍ରଦାନ କରିବ। ଜିଓକୁ ବିଶ୍ୱର ସର୍ବବୃହତ୍ ଷ୍ଟାର୍ଟଅପ୍ ବୋଲି ଅଭିହିତ କରି ଆକାଶ କହିଛନ୍ତି, ଯୁବ ଉଦ୍ୟୋଗୀମାନେ ବିଫଳ ହେବାକୁ ଭୟ ନ କରିବାର ଆବଶ୍ୟକତା ରହିଛି। ସେମାନଙ୍କୁ ସେ ସାମାଜିକ ଉନ୍ନତି ପାଇଁ କାମ କରିବାକୁ ଆହ୍ବାନ ଦେବା ସହ ଜିଓ ସର୍ବଦା ଭବିଷ୍ୟତର ପ୍ରଯୁକ୍ତି ଉପରେ ନଜର ରଖିଛି ବୋଲି ଆକାଶ କହିଛନ୍ତି। ଆସନ୍ତା କିଛି ବର୍ଷ ମଧ୍ୟରେ ଭାରତ ବିଶ୍ୱକୁ ସବୁଠାରୁ ଶ୍ରେଷ୍ଠ ସେବା ଓ ସବୁଠାରୁ ଶ୍ରେଷ୍ଠ ଉତ୍ପାଦ ପ୍ରଦାନ କରିବାର କେନ୍ଦ୍ର ଭାବେ ଉଭାହେବ ବୋଲି ଆକାଶ ଆଶା ପ୍ରକାଶ କରିଛନ୍ତି। ଅମ୍ବାନୀ ଭାରତକୁ ଆଗାମୀ ଦଶନ୍ଧି ପାଇଁ ସବୁଠାରୁ ବଡ଼ ଉଦ୍ଭାବନ ତଥା ନବସୃଜନ ବା ଇନୋଭେଶନ କେନ୍ଦ୍ର ବୋଲି ଅଭିହିତ କରିବା ସହ ଦଶନ୍ଧି ଶେଷ ସୁଦ୍ଧା ଦେଶ ୫ ରୁ ୬ ଟ୍ରିଲିୟନ ଡଲାର ଅର୍ଥନୀତିରେ ପରିଣତ ହେବ ବୋଲି ବିଶ୍ୱାସ ପ୍ରକଟ କରିଛନ୍ତି। ଅପରପକ୍ଷରେ ୨୦୨୪ ଅମ୍ବାନୀ ପରିବାର ପାଇଁ ଏକ ସ୍ବତନ୍ତ୍ର ବର୍ଷ ହେବ। କାରଣ ଅନନ୍ତ ଏମ୍ ଅମ୍ବାନୀ ୨୦୨୪ରେ ବିବାହ କରିବାକୁ ଯାଉଥିବା ଆକାଶ କହିଛନ୍ତି।